Joni 14 - Baibo Busansulushi Bwa Libuku Ili

Jesu njenshila yakuya kuli baishiwesu

¹ “Myoyo yanu itapengi. Amushome muli Lesa alimwi mushome amuli ndime.

² Muŋanda ya baTa muli misena iinji yakwikalaamo, necatalinga boobo naakwiinga ndamulwiita. Ntooya kuli baTa mukumubambila misena.

³ Ndaakumana kumubambila misena, ndaakuboola mukumubwesa kwaamba ayi mutole kooko nkweshi nkanoobete ayi amwebo mukabe nkuko.

⁴ Ncakwiila nshila iya kooko nkoontooya muliishi kale.”

⁵ Mpeeke Tomasi wakeepusha Jesu ayi, “Nkambo, tatwishiiko nkomutooya, ino inga tweeshiba buyani nshila?”

⁶ Jesu wakakumbula ayi, “Nebo ndi nshila, ndi lushinisho alimwi ndi buumi. Taaku muntu weenga washika kuli baTa, sombibo kwiinda muli ndime.

⁷ Nemwalinga kwinshi kabotu, abaTa nemwalinga kubeshi. Nakubi boobo kuswa sunu mwabeshiba alimwi mwababona.”

⁸ Mpomunyaawo Filipo wakaambila Jesu ayi, “Nkambo, ncetusunibo nkwaamba ayi mututondeshe baIshiwanu.”

⁹ Jesu wakakumbula ayi, “Ciindi kukomena ncendekalaanu, ono anu abobulya Filipo toona kwinshiba? Uyo wabona ndime wabona abaTa. Ono inga waamba buyani ayi, ‘Mututondeshe baIshiwanu’?

¹⁰ Sa tooshomi kwaamba ayi ndimuli baTa, abalo baTa bali muli ndime? Maswi ngoomulwiita taaswi muli ndime nemwiine, sombi muli baTa bekala muli ndime, mbobasebensa milimo yabo.

¹¹ Mulyeelete kushoma na ndaamba ayi ndimuli baTa, abalo baTa bali muli ndime, nabibo kushoma shaankamiko nsheencita.

¹² Ntoomulwita calushinisho ayi uyo woonse ushoma muli ndime, ulaakukonsha kucita nsheencita. Ncakwiila ulaakucita ashiinda pasheesho nsheencita ceebo ntooya kuli baTa.

¹³ Aboobo cili coonse nceshi mukasenge muliina lyangu, ndaakucicita kwaamba ayi baTa bakapekwe bulemu kwiinda muMwanaabo.

¹⁴ Nkokwaamba ayi coonse nceshi mukasenge muliina lyangu ndaakucicita.

Jesu mbwaakashomesha kutuma Mushimu Usalashi

¹⁵ “Na mulinsuni, munanoolama milawo yangu.

¹⁶ Lyalo ndaakusenga kuli baTa kwaamba ayi bakamupe Mucafwi umwi, uyo eshi akekale amwebo inshiku shoonse.

¹⁷ Mucafwi uyo nguMushimu Usalashi wiisha shalushinisho. Bamucishi tabakoonshi kumutambula mukwiinga tabamuboni nabi kumwishiba. Sombi mwebo mulimwishi mukwiinga ulekala amwebo alimwi ulaakwikala muli ndimwe.

¹⁸ “Teshi nkamushiye nweenka anga mbana banshiwa, ndaakwisa alimwi kuli ndimwe.

¹⁹ Muciindi ciniini bamucishi teshi bakamboneewo alimwi, sombi mwebo mulaakumbona. Mukwiinga nebo ndimuumi amwebo mulaakuba boomi.

²⁰ Pabushiku ubo mulaakwishiba ayi ndimuli baTa, amwebo muli muli ndime, bweenka mboondi muli ndimwe anebo.

²¹ Uyo usumina milawo yangu akucita mboyaamba, ngowooyo unsuni. Uyo usuni ndime, abalo baTa balaakumusuna, anebo ndaakumusuna akuliyubulula kuli nguwe.”

²² Lyalo Judasi (kutaamba Judasi Isikalyoti) wakeepusha ayi, “Nkambo, ino mulaakuliyubulula buyani kuli ndiswe kuteshi kubamucishi ca panshi?”

²³ Jesu wakakumbula ayi, “Uyo unsuni ulakonkela kwiisha kwangu alimwi baTa balaakumusuna. Lyalo nebo abaTa tulaakwisa kuli nguwe akwikala anguwe.

²⁴ Sombi uyo woonse utansuni taakonkeli kwiisha kwangu. Aya maswi ngomutoonyumfwa teeshi angu nemwiine, alaswa kuli baTa abo bakantuma.

²⁵ “Ndamulwiitila limwi shintu ishi kaancili anu.

²⁶ Nakubi boobo Mucafwi, Mushimu Usalashi, uyo baTa ngweshi bakatume muliina lyangu ulaakumwiisha shintu shoonse, akumwiibalusha shintu shoonse nshindakamulwiita.

²⁷ “Ndamushiila luumuno. Ndamupa luumuno lwangu. Nshipi bweenka mbuli bamucishi ca panshi, sobwe. Myoyo yanu itapengi nabi kuloonda.

²⁸ Mwanyuumfwa ndindalinga ndaamba ayi, ‘Ntooya, sombi ndaakwisa alimwi kuli ndimwe.’ Nemwalinga kunsuni, naakwiinga mwakondwa ceebo ntooya kuli baTa abo beenda pali ndime.

²⁹ Ono ndamulwiitila limwi kashitana kucitika kwaamba ayi shaakucitika mukashome.

³⁰ Teshi ntolelele kwaamba amwebo mukwiinga mwaami wa mucishi ca panshi utoosa. Taacite nkusu pali ndime,

³¹ sombi ntoocitabo kweelana ambobakandasha baTa kwaamba ayi bantu ba mucishi beshibe ayi baTa ndibasuni. “Amunyamuke ono tunooya.