Joni 13 - Baibo Busansulushi Bwa Libuku Ili

Jesu mbwaakasansha bashikwiiya bakwe kushimpanta

¹ Kabutana kushikila bushiku bwa Pasika bwa kwiibaluka kusotokela, Jesu wakalinga kwishi ayi ciindi cashikila cakuswa mucishi ca panshi akuya kuli baIshi. Lakwe wakalinga kusuni bantu bakwe abo bakalinga mucishi alimwi wakabasunisha.

² Jesu abashikwiiya bakwe ndibakalinga kulya mulalilo, Mubiibi wakalinga wabika kale muyeeyo muli Judasi, mwanaakwe Simoni Isikalyoti, wakaaba Jesu kubalwani.

³ Jesu wakalinga kwishi ayi wakapekwa shintu shoonse mumaansaakwe. Wakalinga kwishi alimwi ayi wakaswa kuli Lesa alimwi ulaakuboolela kuli nguwe.

⁴ Lyalo Jesu wakanyamukaawo mpobakalinga kulita, wafuula cakufwala capeculu akulyaanga cisani cakulikunkumusha mubukome.

⁵ Kuswawaawo wakabika maanshi mumbale yakusambilaamo, akutalika kusansha bashikwiiya bakwe kushimpanta akubakunkumuna acisani ceenka ico.

⁶ Ndyaakashika pali Simoni Pita, lakwe wakeepusha Jesu ayi, “Nkambo, sa inga mwansaansha kushimpanta?”

⁷ Jesu wakakumbula ayi, “Inga tooshibi ncentoocita bulya, sombi ulaakucishiba kunembo.”

⁸ Pita wakaamba ayi, “Tamweelete kunsansha, sobwe!” Jesu wakamukumbula ayi, “Na mbule kukusansha, teshi unoocili shikwiiya wangu.”

⁹ Lyalo Simoni Pita wakakumbula ayi, “Anu na mboboobo Nkambo, mutansanshibo kushimpanta, sombi akumaansa alimwi akumutwi koonse.”

¹⁰ Jesu wakamwaambila ayi, “Muntu wasamba kale watuba. Taaku ceebo nceenga wayandila kusamba, sombibo kushimpanta kweenka. Noonse mwatuba kukushakobo womwi.”

¹¹ Mukwiinga Jesu wakalinga kwishi kale wooyo eshi akamwaabe, nceceeco ncaakaambila ayi, “Noonse, mwatuba kukushakobo womwi.”

¹² Jesu ndyaakamana kubasansha kushimpanta, wakafwala cakufwala cakwe capeculu akuboolela mpaakalinga kushiite. Lyalo wakeepusha ayi, “Sa mwacinyumfwisha ncindaswa mukumucitila?

¹³ Mwebo ndyemunjita ayi, ‘Mufundishi,’ nabi ayi, ‘Nkambo,’ mulalulika mukwiinga ngondime.

¹⁴ Ono nebo neMwaami alimwi amuFundishi wanu, ndamusansha kushimpanta. Amwebo anu mulyeelete kusanshanya kushimpanta.

¹⁵ Ono ndacita citondesho kwaamba ayi amwebo mulyeelete kunoocitila bamwi bweenka mbondamucitila.

¹⁶ Ntoomulwiita calushinisho ayi, taaku musebenshi wiinda mwaami wakwe alimwi taaku mutumwi wiinda wooyo wakamutuma.

¹⁷ Ono bulya mbomweshiba shintu ishi, mulaakuba acoolwe na mukashiciite.

¹⁸ “Nshintokwaambila noonse, sombi ndibeshi abo mbondakasala. Ishi shacitika kweelana aMalembo akwe Lesa akwaamba ayi, ‘Uyo ngondakalinga kulyaakwe mbale yomwi wakambukila.’

¹⁹ Ndamulwiitila limwi ici kacitana kucitika kwaamba ayi caakucitika mukashome kwaamba ayi, ‘Ndime wooyo ngoombete!’

²⁰ Ntoomulwiita calushinisho ayi uyo woonse utambula womwi wa baabo mbondatuma, ulatambula ndime alimwi uyo woonse utambula ndime, ulatambula awooyo wakantuma.”

Jesu mbwaakaamba shakwaabwa kwakwe

²¹ Mpeeke Jesu ndyaakamana kwaamba boobo, wakapenshekwa abuumbi mumoyo akubaambila patuba ayi, “Ntoomulwiita calushinisho ayi womwi pakati kanu utoongaba.”

²² Bashikwiiya bakwe bakatalika kulanganalangana, kabateshi na ngani ngwaakalinga kwaamba.

²³ Shikwiiya umwi mulikoto lyabo, uyo Jesu ngwaakalinga kusunishi, wakalinga kubambene akwe.

²⁴ Simoni Pita wakaningila shikwiiya uyo akumwaambila ayi, “Beepushe wooyo ngobatokwaamba.”

²⁵ Mpomunyaawo shikwiiya uyo wakalinga muliimfwa lyakwe Jesu wakeepusha ayi, “Nkambo, anu ngani ngomutokwaamba?”

²⁶ Jesu wakakumbula ayi, “Ngooyo ngweshi mpe shinkwa uyu ndamana kubwenga.” Lyalo ndyaakamana kubwenga wakapa Judasi mwanaakwe Simoni Isikalyoti.

²⁷ Ingayi Judasi atambulebo shinkwa uyo, Satana wakamwinjila. Mpeeke Jesu wakamwaambila ayi, “Ico ncootooyanda kucita, cicite kufwambaana.”

²⁸ Nakubi boobo taaku nabi womwi pabaabo mbaakalinga kulyaabo wakeshiba ncaakamwaambilila boobo.

²⁹ Ono ceebo cakwaamba ayi Judasi ngowakalinga kulama nkomwe ya maali, bashikwiiya bamwi bakayeeya ayi mpashi Jesu wamutuma mukuula shakulya shiyandika pabushiku bwa Pasika, nabi mukupa bakandu.

³⁰ Judasi ndyaakatambula shinkwa uyo wakaswita pansengwe. Ico ciindi lyakalinga kale mashiku.

Mulawo upya

³¹ Judasi ndyaakaya, Jesu wakaamba ayi, “Ono MwanaaMuntu walemekwa alakwe Lesa walemekwa kwiinda muli nguwe.

³² Ono na Lesa walemekwa kwiinda muMwanaakwe, nkokwaamba ayi alakwe Lesa mwiine ulaakulemeka Mwanaakwe alimwi utoocita boobo paciindi ceenka cino.

³³ Nobana bangu, ndanooli amwebo kwaciindi ciniini. Mulaakunangoola, sombi ntoomulwiita bweenka mbondakalwiita baJuda ayi, ‘Uko nkoontooya, mwebo inga tamuyiiko.’

³⁴ Ntoomupa mulawo upya wakwaamba ayi, ‘Amusunane.’ Bweenka mboomusuni nebo, amwebo mulyeelete kusunana.

³⁵ Mukwiinga na kamusunene, bantu boonse balaakwishiba ayi muli bashikwiiya bangu.”

Jesu mbwaakaambila Pita ayi ulaakunkaka

³⁶ Simoni Pita wakeepusha Jesu ayi, “Nkambo, ino mutooya kuli?” Jesu wakakumbula ayi, “Uko nkoontooya tookoonshi kunkonkela bulya, sombi ulaakunkonkela kunembo.”

³⁷ Pita wakamwiipusha ayi, “Nkambo, ino nceebonshi nceenga shimukonkeleli bulya? Nebo ndilibambite kwaaba buumi bwangu ceebo ca ndimwe.”

³⁸ Jesu wakakumbula ayi, “Sa ncakwiila ulilibambite kwaaba buumi bwako ceebo ca ndime? Ntokwaambila calushinisho ayi kombwe kaatana kulila utokwaamba mankanda otatwe ayi toonshi.