Joni 12 - Baibo Busansulushi Bwa Libuku Ili

Jesu mbwaakananikwa mafuta kuBetani

¹ Ndikwakacaala nshiku shosanwe abomwi kwaamba ayi bushiku bwa Pasika bwakwiibaluka kusotokela bushike, Jesu wakashika kuBetani kwakalinga kwikala Lasalo uyo ngwaakabusha kuswa kubafu.

² Kundabala uko Jesu bakamubambila cakulya ca macolesha, Malita nguwakalinga kubapa. Lasalo wakalinga womwi wa baabo bakalinga kulya aJesu.

³ Lyalo Maliya wakanyamuna musaashi wa mafuta anunkila kabotu amakwebo eetwa ayi nadi, ayo ngaakapuumwita pashimpanta shakwe Jesu akushipukuta amisusu yakwe mwiine. Mpeeke muŋanda mwakesulabo keema kabotu ka mafuta ayo.

⁴ Sombi Judasi lsikalyoti, womwi wa bashikwiiya bakwe (uyo eenka wakamwaaba kunembo) wakaamba ayi,

⁵ “Ceebonshi mafuta aya taakwe kuulishikwabo mweelo wa maali ali myaanda yotatwe akupa maali ayo kubakandu?”

⁶ Taakwe kwaamba boobo ceebo cakunyumfwila nkumbu bakandu, sombi mukwiinga wakalinga mwiipi. Judasi ngowakalinga kusunga coola ca maali, aboobo wakalinga kwiipaamo kaasebensesha mwiine.

⁷ Jesu wakakumbula ayi, “Amumuleeke mwiine, mafuta aya wakaabambila kufukilwa kwangu.

⁸ Bakandu muli abo nshiku shoonse, sombi nebo teshi nooli anu lyoonse.”

Mbobakapangana ayi bacaye Lasalo

⁹ Bantu baanji ndibakanyumfwa ayi Jesu uli muBetani, bakayaako. Tabakwe kuya mukubonabo Jesu eenka, sombi aLasalo ngwaakabusha kuswa kubafu.

¹⁰ Aboobo bamatanjilili ba bapailishi bakapangana ayi alakwe Lasalo bamucaaye

¹¹ ceebo baJuda baanji ndibakabona kubuka kwakwe Lasalo, bakatalika kukaka kwiisha kwabo akushomabo muli Jesu.

Jesu mbwaakenjila ca bulemu muJelusalemu

¹² Mpeeke bushiku bwakaboolaawo, bantu baanji baanji bakaya mukusekelela bushiku bwa Pasika bwa kwiibaluka kusotokela, bakanyumfwa ayi Jesu utoosa kuJelusalemu.

¹³ Lyalo bakatema malala akumucinsha munshila, kabaya coolobesha ayi, “Alumbaishikwe Lesa! Aape coolwe kuli wooyo utoosa muliina lya Mwaami Lesa! Aape coolwe Mwaami wa Isilaeli!”

¹⁴ Jesu wakacana mwanaambongolo akutantaawo kweelana ambokwakalembwa mumalembo akwe Lesa ayi,

¹⁵ “Utaloondi, ondabala inene ya Siyoni! Bona mwaami wako ngooyo utoosa, Kaatantite pamwanaambongolo.”

¹⁶ Paciindi ico, bashikwiiya bakwe tabakwe kwanyumfwishisha makani aya, sombi Jesu ndyaakabushikwa mubulemu, bakeebaluka ayi Malembo akwe Lesa akalinga kwaamba pali nguwe alimwi ayi shintu ishi shakacitilwa nguwe.

¹⁷ Bantu abo Jesu mbaakalingaabo ndyaakeeta Lasalo ayi aswe mucuumbwe, ndyaakamubusha kubafu, bakalinga kuya bwaambila bantu cikani ici.

¹⁸ Nceceeco bantu ncebakamucinshila mukwiinga bakanyumfwa ayi ngowakacita caankamiko ico.

¹⁹ Aboobo baFalisi bakatalika kulwiitana ayi, “Taaku ncetutoocita napaceyi! Amubone bantu boonse bakonkela nguwe!”

BaGiliki bamwi mbobakayandoola Jesu

²⁰ Ono pakalinga abaGiliki bamwi pakati kabaabo bakalinga baya mukulambila Lesa pabushiku bwakusekelela uko.

²¹ BaGiliki aba bakaya kuli Filipo wa kundabala ya Betisaida mucishi ca Galili akumwaambila ayi, “Nkambo, tutooyanda kubona Jesu.”

²² Filipo wakaya mukulwiita Andulu, lyalo Andulu aFilipo bakaya mukulwiita Jesu.

²³ Jesu wakakumbula ayi, “Ciindi cashikila cakwaamba ayi MwanaaMuntu alemekwe.

²⁴ Ntoomulwiita calushinisho ayi luseke lwa maila, na lwabula kulokela mubulongo akufwa, inga kalulibo lomwi lyoonse, sombi na lwalokela mubulongo akufwa, lyalo inga lwashala ashimwi shiinji.

²⁵ Muntu usunishi buumi bwakwe ulaakubusowa, sombi uyo upatite buumi bwakwe bwa mucishi ca panshi, ulaakuba abuumi butamaani.

²⁶ Uyo woonse utooyanda kusebensela ndime, ulyeelete kunkonkela kwaamba ayi nkweenga kaambete, alakwe musebenshi wangu akanooliiko. Abalo baTa balaakupa bulemu muntu woonse usebensela ndime.

Jesu mbwaakaamba shalufu lwakwe

²⁷ “Ono moyo wangu wapenshekwa. Sa ŋambe ayi, ‘Ta amumfuune kuciindi ca mapensho ici’? Sobwe, mukwiinga mapensho aya ngondakeshita.

²⁸ Ta, amuboneshe bulemu bwanu!” Mpomunyaawo liswi lyakanyumfwika kuswa kwiculu kalyaamba ayi, “Ndabubonesha kale, alimwi ncibubonesha.”

²⁹ Bantu bakalinga kwiimfwi waawo bakanyumfwa liswi, lyalo bamwi bakaamba ayi, “Ncilulumo ca mfula,” sombi bamwi ayi, “Ngumunjelo wamwaamboosha.”

³⁰ Lyalo Jesu wakabalwiita ayi, “Ili liswi talikwe kunyumfwika ceebo ca ndime, sobwe, sombi ceebo ca ndimwe.

³¹ Ono cashikila ciindi cakwaamba ayi bantu ba pacishi ca panshi boomboloshekwe. Ono Satana mweendeleshi wa panshi pano wakomwa.

³² Sombi nebo ndaakupopwa pamucilingano ndaakuyobolola bantu boonse kuli ndime.”

³³ (Jesu wakaamba boobo kwaamba ayi abatondeshe lufu ndweshi akafwe mbolubete.)

³⁴ Bantu bakamukumbula ayi, “Swebo twakanyumfwa muMilawo yakwe Mose ayi Usalitwe wakwe Lesa ulakunoolikobo lyoonse, ino ono inga waamba buyani ayi, ‘MwanaaMuntu ulyeelete kupopwa pamucilingano?’ Ino MwanaaMuntu uyo ngani?”

³⁵ Jesu wakabaambila ayi, “Mumuni ucili amwebo ciindi ciniinibo. Amweende, mumuni kauciliiko kwaamba ayi munshinshe utesi pali ndimwe. Mukwiinga uyo woonse weenda mumunshinshe taashibi nkwaatooya.

³⁶ Amushome mumumuni ndyeucili anu kwaamba ayi mube bantu ba mumumuni.” Jesu ndyaakamana kwaamba makani aya wakaswaawo akuya mukubayuba.

Bantu mbobatakwe kushoma Jesu

³⁷ Nakubi kwaamba ayi wakacita shaankamiko pameenso abo, tabakwe kumushoma.

³⁸ Ici cakacitika kweelana abwakaamba mulaluki mukulukulu Isaya ayi, “NoBaami baLesa, ngani wakashoma makani ngotwakashimikila? Anu nkusu shanu noBaami baLesa shakayubulwitwa baani?”

³⁹ Aboobo tabakwe kushoma mukwiinga Isaya alimwi wakaamba ayi,

⁴⁰ “Lesa wakabapofosha akuyumya mitwi yabo, cakwaamba ayi tabakoonshi kubona ameenso abo nabi kunyumfwishisha amyoyo yabo. Nabibo kusandukila kuli ndime ayi mbashilike.”

⁴¹ Isaya wakaamba boobo mukwiinga wakabona bulemu bwakwe Jesu, akwaamba shapali nguwe.

⁴² Nakubi boobo baanji pakati ka bamaloba ba baJuda bakashoma muli Jesu, ono tebakalinga kutondesha lushomo lwabo mukwiinga bakalinga kuloonda baFalisi ayi inga babatanda mucoonde cabo.

⁴³ Bamaloba aba bakalinga kusuni kulumbaishikwa abantu kwiinda kulumbaishikwa aLesa.

Maswi akwe Jesu alaakoombolosha bantu

⁴⁴ Lyalo Jesu wakoolobesha ayi, “Muntu na washoma muli ndime, taashomibo ndime, sombi ulashoma awooyo wakantuma.

⁴⁵ Uyo woonse ubona ndime, ingayi wabona awooyo wakantuma.

⁴⁶ Ndakesa mucishi ca panshi bweenka mbuli mumuni kwaamba ayi uyo woonse eshi ashome muli ndime atabi mumunshinshe.

⁴⁷ Na muntu wanyumfwa maswi angu, nakubi boobo wabula kwaakonkela teshi nkamoomboloshe mukwiinga nshina kwisa mukoombolosha bantu, sombi mukubapulusha.

⁴⁸ Uyo woonse ukaka ndime amaswi angu ulicite umwi eshi akamoomboloshe. Maswi ayo ngondaamba ngweshi akamoomboloshe pabushiku bwakweelaako.

⁴⁹ Ici ncalushinisho mukwiinga nshikwe kwaamba sha mumutwi wangu, sombi baTa abo bakantuma bakandwiita nsheenjelete kwaamba abwakwaamba.

⁵⁰ Ndishi kwaamba ayi milasho yabo ilapa buumi butamaani. Aboobo shoonse nsheŋamba, ndashaamba bweenka mbobakandwiita baTa.”