Joni 11 - Baibo Busansulushi Bwa Libuku Ili

Lufu lwakwe Lasalo

¹ Ono musankwa umwi wiitwa ayi Lasalo, wakalinga kwikala kuBetani, wakaciswa. Betani njendabala yakalinga kwikalaamo Maliya aMalita mukwabo.

² (Maliya uyu ngowakapuumwita mafuta anunkila kabotu kushimpanta sha Mwaami Jesu akushipukuta amisusu yakwe. Lasalo uyo wakaciswa, wakalinga nandumi yakwe.)

³ Aboobo banankashi shakwe bobilo bakatuma nkombe kuli Jesu ayi, “Nkambo, ulya mubyaanu ngomusunishi abuumbi ngumulwashi.”

⁴ Jesu ndyaakanyumfwa makani aya wakaamba ayi, “Kuciswa uko teshi kumucaaye, sobwe. Sombi kwacitika kwaamba ayi Lesa alemekwe alimwi kwaamba ayi Mwanaakwe Lesa alemekwe ceebo ca bulwashi ubo.”

⁵ Jesu wakalinga kunyumfwana bumbi aMalita, mwanike wakwe alimwi aLasalo.

⁶ Nakubi boobo Jesu ndyaakanyumfwa ayi Lasalo ngumulwashi, uko nkwakalinga wakekalaako nshinku shobilo ashimwi.

⁷ Kuswawaawo wakaambila bashikwiiya bakwe ayi, “Atuboolele kucishi ca Judeya.”

⁸ Sombi bashikwiiya bakwe bakakumbula ayi, “Bafundishi, ndyoonoonobo apa baJuda bakokulya kweenka ndibakalinga kusuni kumuuma mabwe, ono nkomutooyanda kuya alimwi?”

⁹ Jesu wakakumbula ayi, “Sa te malumwi alicite maawala likumi aobilo? Mukwiinga muntu weenda malumwi taakoonshi kulisuntula ceebo uleenda mumumuni wa lisuba.

¹⁰ Sombi na weenda mashiku ndyaalisuntula mukwiinga taaku mumuni.”

¹¹ Jesu ndyaakamana kwaamba boobo, wakaambila bashikwiiya bakwe ayi, “Mubyeesu Lasalo ulilete, sombi ntooya nkamubushe.”

¹² Bashikwiiya bakakumbula ayi, “Nkambo, na ulilete ingayi utooba kabotu.”

¹³ Jesu wakalinga kwaamba ayi Lasalo wafwa, sombi bashikwiiya bakwe bakayeeya ayi utokwaamba koonabo kwa tulo.

¹⁴ Aboobo Jesu wakabalwiita cakutashisa ayi, “Lasalo ulifwite.

¹⁵ Ono ceebo ca ndimwe ndakondwa kwaamba ayi nshindalingaako uko, kwaamba ayi mushome. Katiya kuli nguwe.”

¹⁶ Lyalo Tomasi (uyo wakalinga kwiita ayi Mpuundu) wakaambila bashikwiiyanyina ayi, “Katiya soonse uko abaFundishi tukafwite pantu pomwi.”

Jesu ngoobusha bafu alimwi ngoopa buumi

¹⁷ Jesu ndyaakashika, wakacana ayi peenda kale nshiku shone kuswa bushiku ndibakamubika mucuumbwe Lasalo.

¹⁸ Ndabala ya Betani ilibo pafwaafwi aJelusalemu.

¹⁹ Bantu baanji ba muJudeya bakalinga besa mukulishanyako Malita aMaliya palufu lwa nandumi yabo.

²⁰ Malita ndyaakanyumfwa ayi Jesu utoosa, wakamucinsha, sombi Maliya wakacaala kuŋanda.

²¹ Malita wakaambila Jesu ayi, “Nkambo, nimwakalingaako naakwiinga nandumi yangu taafwi.

²² Nabi paciindi cino ndishi kwaamba ayi Lesa utoomupa coonse nceshi mumusenge.”

²³ Jesu wakamulwiita ayi, “Nandumi yako utoobuka alimwi.”

²⁴ Malita wakakumbula ayi, “Ndishi kwaamba ayi ulaakubuka alimwi baakubuka bafu pabushiku bwakweelaako.”

²⁵ Lyalo Jesu wakamwaambila ayi, “Ndime mbusha bantu kuswa kubafu alimwi ndime mpa buumi. Aboobo uyo woonse ushoma muli ndime ulaakuba abuumi nabi wafwa.

²⁶ Alakwe uyo woonse muumi ushoma muli ndime teshi akafweewo. Sa ulashoma boobo?”

²⁷ Malita wakakumbula ayi, “Ee Nkambo, ndashoma kwaamba ayi ndimwe Usalitwe, Mwanaakwe Lesa, uyo wakalinga kulangilwa mucishi ca panshi.”

Jesu mbwaakalila

²⁸ Mpeeke ndyaakamana kwaamba boobo, Malita wakaya weeta Maliya nankashi yakwe kulubasu akumulwiita ayi, “Bafundishi besa, batookwiita.”

²⁹ Maliya ndyaakanyumfwabo boobo, wakeendililabo kunyamuka, waya kuli Jesu.

³⁰ (Paciindi ico Jesu kaatana kushika mumushi, kaacilibo peenka pakamukumanishisha Malita.)

³¹ BaJuda bakalinga aMaliya muŋanda kabamulishaanyaako, ndibakabona mbuli mbwaakanyamuka akuswita pansengwe, bakamukonkela kabayeeya ayi waya mukulilila kucuumbwe.

³² Maliya ndyaakashika pamusena pakalinga Jesu, ono ndyaakamubona, wakafukama muliimfwa lyakwe akwaamba ayi, “Nkambo, nemwalingaako naakwiinga nandumi yangu taafwi.”

³³ Mpeeke Jesu ndyaakabona Maliya kaalila alimwi abaJuda abo mbaakesaabo abalo kabalila, wakacatwa buumba akupenshekwa abuumbi.

³⁴ Lyalo wakeepusha ayi, “Nkuli kucuumbwe nkomwakamubika?” Abalo bakakumbula ayi, “Nkambo nkuno kamwisa mubone.”

³⁵ Jesu wakalila.

³⁶ Mpomunyaawo baJuda bakaamba ayi, “Amubone ncakwiila bakalinga kunyumfwana.”

³⁷ Sombi bamwi bakaamba ayi, “Ono uyu muntu wakabonya musankwa uyo moofu taakwe kucitilawonshi comwi kwaamba ayi Lasalo atafwi?”

Jesu mbwaakabusha Lasalo kuswa kubafu

³⁸ Jesu kaacicite buumba alimwi akupenshekwa mumoyo wakashika kucuumbwe. Cakalingabo cimfwengo kakucalitwe libwe.

³⁹ Lyalo Jesu wakabalwiita ayi, “Amukusheko libwe!” Malita nankashi yakwe mulobe wakaamba ayi, “Nkambo, kutooba keema kabiibi mukwiinga shaba nshiku shone kuswa bushiku nditwakamubika.”

⁴⁰ Lyalo Jesu wakeepusha ayi, “Sa nshikwe kukulwiita ayi na ulashoma ulakonsha kubona bulemu bwakwe Lesa?”

⁴¹ Aboobo bakakushako libwe. Mpeeke Jesu wakalanga kwiculu akwaamba ayi, “Ndamulumba Ta ceebo mwanyumfwa ncendasenga.

⁴² Ndishi kwaamba ayi lyoonse mulanyumfwa nceenga ndaseenga, sombi ndaamba boobo ceebo ca bantu bali waano, kwaamba ayi beshibe ayi ndimwe mwakantuma.”

⁴³ Jesu ndyaakamana kwaamba boobo, wakeeta aliswi lya peculu ayi, “Lasalo, swaamo umo!”

⁴⁴ Alakwe wakaswaamo kaapombeletwe ashisani shipombelwa bafu kumaansa, kumyeendo alimwi apameenso. Lyalo Jesu wakaamba ayi, “Amumwaangulule, anooya.”

BaJuda mbobakapangana shakucaya Jesu

⁴⁵ Aboobo baanji pakati ka baJuda abo bakesa mukulilashaanyako Maliya, bakashoma Jesu ndibakabona nshaakacita.

⁴⁶ Sombi bamwi bakaya mukulwiita baFalisi cakacita Jesu.

⁴⁷ Lyalo bamatanjilili ba bapailishi abaFalisi alimwi abeendeleshi ba nkuta bakabungana akwiipushanya ayi, “Tutoocita buyani? Amubone shaankamiko kufula nshaatoocita muntu uyu!

⁴⁸ Na tumuleeke ayi atolelele bweenka bulya, bantu boonse batooshoma muli nguwe alimwi bene Loma balaakwisa mukunyonyoola Ŋanda yakwe Lesa alimwi amushobo wesu.”

⁴⁹ Ono womwi pakati kabo wakalinga kwiitwa ayi Kayafasi, uyo wakalinga mupailishi munene mwaaka uyo, wakaamba ayi, “Anu mulishinshi mwebo?

⁵⁰ Sa mwebo tamwishi kwaamba ayi ncibotu muntu womwi kufwita bantu baanji, kwiinda kwaamba ayi mushobo woonse ulobe?”

⁵¹ Kayafasi taakwe kwaambabo sha mumutwi wakwe mwiine, sobwe, sombi kweelana ambwaakalinga mupailishi munene mumwaaka uyo, wakalaluka ayi Jesu ulaakufwita mushobo wa baJuda.

⁵² Ncakwiila teeshibo mushobo wabo weenka, sombi akuleta pantu pomwi bana bakwe Lesa abo bakalinga kupalangene mucishi coonse.

⁵³ Lyalo kuswa pabushiku ubo baJuda bakapangana ayi bakacaye Jesu.

⁵⁴ Paceebo ceeco, Jesu wakatalika kweenda cakuyubayuba mucishi ca Judeya. Lyalo wakaswaako uko akuya kumusena wakalinga pafwaafwi aluyanga, mumushi wa Efulaimu, uko nkwaakaya mukwikala abashikwiiya bakwe.

⁵⁵ Mpomunyaawo bushiku bwa Pasika bwa kwiibaluka kusotokela ndibwakashika pafwaafwi, bantu baanji bakaswa mumishi akuya kuJelusalemu mukulisalasha kweelana ambobakalinga kushibite bushiku ubo kabutana kushikila.

⁵⁶ Bantu bakalinga kuyandoola Jesu uko. Ndibakabungana muŊanda yakwe Lesa bakalinga kwiipushanya ayi, “Mutooyeeya buyani, sa teshi acanikweewo pakusekelela uku?”

⁵⁷ Sombi bamatanjilili ba bapailishi abaFalisi bakalinga bashibisha bantu ayi, uli woonse ushi kubete Jesu ulyeelete kubalwiita ayi bamucate.