Joni 10 - Baibo Busansulushi Bwa Libuku Ili

Cikoshanyo ca mweembeshi

¹ Jesu wakaamba ayi, “Ntoomulwiita calushinisho ayi muntu utanjilili kumulyango wa cimpati ca mbelele, sombi watantilabo pamwi, ngumwiipi alimwi ngumupambi.

² Sombi muntu uyo unjilila kumulyango, ngomweembeshi wa mbelele.

³ Shikulindilila cimpati ulamucalwita ashalo mbelele shilanyumfwa liswi lyakwe. Mpeeke mbelele shakwe ulashiita meena akushitanjilila kumafulo.

⁴ Na washikusha ulashitanjilila ashalo shilamukonkela mukwiinga shilishi liswi lyakwe.

⁵ Mweensu inga tashimukonkeli napaceyi, sombi lakwe shilamuloonda mukwiinga liswi lyakwe tashilishi.”

⁶ Jesu wakasebensesha cikoshanyo ici, sombi tabakwe kunyumfwishisha.

Jesu ngomweembeshi mubotu

⁷ Aboobo Jesu wakabaambila alimwi ayi, “Ntoomulwiita calushinisho ayi ndime mulyango wa mbelele.

⁸ Boonse abo bakesa nebo kaantana kwisa, mbeepi alimwi mbapambi, ashalo mbelele tashikwe kubanyumfwila.

⁹ Ndi mulyango alimwi uyo woonse unjila kwiinda muli ndime ulaakupulushikwa. Ulaakwinjila akuswa alimwi akucana cakulya.

¹⁰ Mwiipi ulesabo mukwiipa, kucaya akunyonyoola, sombi nebo ndakesa ayi bantu babe abuumi, buumi bwancinencine.

¹¹ “Ndi mweembeshi mubotu. Mweembeshi mubotu ulaaba buumi bwakwe ceebo ca mbelele shakwe.

¹² Sombi mweembeshi wakenjilabo ncito uteshi mwinesho, na wabona umpe keesa kumbelele ulashishiya, wacica. Lyalo umpe ulacatawo shimwi mpeeke shimwi shilapalangana.

¹³ Muntu uyo ulacica ceebo teshi ngomwinesho, aboobo taalisukami.

¹⁴ Nebo ndi mweembeshi mubotu, ndishi mbelele shangu ashalo shilinshi.

¹⁵ Bweenka mbuli baTa mbobenshi anebo ndibeshi. Paceebo ceeco ndisuminite kwaaba buumi bwangu ceebo ca mbelele shangu.

¹⁶ Nkoshili ashimwi mbelele shiteshi sha mucimpati ici. Ndyeelete kushileta ashalo. Ncakwiila ashalo shilaakunyumfwa liswi lyangu alimwi shilaakuba litanga lyomwi amweembeshi womwi.

¹⁷ “BaTa ncebansunini ncakwaamba ayi ndisuminite kwaaba buumi bwangu kwaamba ayi nkabaabo alimwi.

¹⁸ Taaku muntu weenga wanyaya buumi, ntoobwaaba nemwiine mukuyanda kwangu. Ndicite nkusu sha kubwaaba akububoosha. Uyu ngomulawo wakampa baTa.”

¹⁹ Ceebo ca maswi aya baJuda bakapansaana alimwi.

²⁰ Baanji mulikoto lyabo bakaamba ayi, “Ulicite shikaswa, ngushincinko, anu ngwaanshi wakukutika?”

²¹ Sombi bamwi bakaamba ayi, “Ucite shikaswa teshi mbwaamba ubo. Sa shikaswa inga wabonya bantu boofu?”

BaJuda mbobakakaka Jesu

²² Cakalinga ciindi ca kusekelela kwiibaluka kusalashikwa akuyakwa cipya kwa Ŋanda yakwe Lesa muJelusalemu alimwi wakalinga mupewo.

²³ Ono Jesu wakalinga kweendeenda mumwinjililo ushitilishitwe wakwe Solomoni muŊanda yakwe Lesa.

²⁴ Mpeeke baJuda bakabungana akwaamba ayi, “Ino ulaakutuyubulwita lili na ndiwe Usalitwe wakwe Lesa kwaamba ayi tucileeke kutonsha? Ono tulwiite cakuteenda mweela.”

²⁵ Jesu wakakumbula ayi, “Ndakamulwiita kale, sombi tamushomi. Milimo ya nkusu sha kwiculu njeencita muliina lya baTa, njeincitila bukamboni.

²⁶ Nakubi boobo tamushomi mukwiinga tamwishi mbelele shangu.

²⁷ Mbelele shangu shilanyumfwa liswi lyangu, ndishishi ashalo shilankonkela.

²⁸ Ndashipa buumi butamaani alimwi teshi shikafweewo. Taaku muntu weenga wanyaya.

²⁹ BaTa abo bakampa mbelele ishi baleendaawo nkusu pabantu boonse. Taaku weenga washikusha mulyaansa lyabo.

³⁰ Nebo abaTa tulibo womwi.”

³¹ BaJuda bakabwesa mabwe alimwi kwaamba ayi baume Jesu.

³² Sombi Jesu wakabaambila ayi, “Ndakamubonesha milimo ibotu iyo yakaswa kuli baTa. Ono pamilimo yoonse iyi, ngumulimonshi ngomutooyanda kunguminaawo mabwe?”

³³ Balo bakakumbula ayi, “Tatutookuuma mabwe ceebo ca milimo ibotu, sobwe, sombi mukwiinga wa kucobola Lesa. Webo uli muntubo, sombi utoolyaamba ayi ndiwe Lesa.”

³⁴ Jesu wakakumbula ayi, “Sa muMilawo yanu tamulembetweewo ayi Lesa wakaamba ayi, ‘Muli balesa.’

³⁵ Lesa wakabanda bantu abo bakapekwa maswi akwe ayi mbalesa. Tulishi ayi Malembo akwe Lesa ngalushinisho lyoonse.

³⁶ Ono cilaakweela kuli kuwooyo Ishi ngwaakasala akutuma mucishi ca panshi? Anu nceebonshi mutokwaamba ayi ndacobola Lesa mukwiinga ndaamba ayi, ‘Ndi Mwanaakwe Lesa?’

³⁷ Na nshintoocita milimo ya baTa, mutanshomi.

³⁸ Sombi na ndaicita nabi mubule kushoma muli ndime, mushomebo mumilimo njeencita kwaamba ayi mwishibe akunyumfwishisha ayi baTa bali muli ndime, anebo ndi muli baTa.”

³⁹ Apalo apa bakeelesha kumucata, sombi wakabapusumuka.

⁴⁰ Lyalo Jesu wakaboolela kwitala lya Mulonga wa Joodani, uko nkwaakalinga kubombekela Joni kaaciliiwo, akwikala nkomunya uko.

⁴¹ Mpeeke bantu baanji bakesa kuli nguwe akwaamba ayi, “Joni taakwe kucitawo caankamiko, sombi shintu shoonse nshaakaamba pamuntu uyu nshalushinisho.”

⁴² Aboobo bantu baanji kumusena uyo bakashoma muli Jesu.