Joni 1 - Baibo Busansulushi Bwa Libuku Ili

Liswi mbolyakaba muntu

¹ Kumatalikilo a cishi uyo wiitwa ayi Liswi wakalingaako kale. Uyu Liswi wakalinga pantu pomwi aLesa alimwi nguLesa.

² Kuswabo kumatalikilo wakalinga aLesa.

³ Lesa wakalenga shintu shoonse kwiinda muli nguwe. Naatalinga nguwe naakwiinga taaku cakalengwa nabi comwi.

⁴ Muli nguwe momwakalinga buumi alimwi buumi ubu bwakalinga mumuni wa bantu.

⁵ Mumuni uyo ulamunika mumunshinshe, sombi munshinshe tookoonshi kuukoma.

⁶ Lesa wakatuma muntu wakwe wiitwa ayi Joni.

⁷ Uyo wakesa mukuba kamboni wa Mumuni, kwaamba ayi bantu boonse banyumfwe makani akwe akwaashoma.

⁸ Lakwe mwiine taakalinga Mumuni, sombi wakesa mukuba kamboni wa Mumuni.

⁹ Uyu ngoMumuni wancinencine wakesa mucishi ca panshi mukumunikila bantu boonse.

¹⁰ Lakwe wakalingaamo mucishi cino alimwi cishi cakalengwa kwiinda muli nguwe. Nakubi boobo bantu ba mucishi tabakwe kumwishiba.

¹¹ Wakesa mucishi cine mishaabo, sombi bene mishaabo baanji tabakwe kumutambula.

¹² Sombi kubaabo boonse bakamutambula akumushoma, wakabapa nkusu shakuba bana bakwe Lesa.

¹³ Kuba bana bakwe Lesa uku, takukwe kuswa kubashali. Nkokwaamba ayi takukwe kuswa mukuyanda kwa muntu, sombi bakashalwa munkusu shakwe Lesa.

¹⁴ Mpeeke Liswi ili lyakaba muntu akwisa mukwikala pakati kesu, kaaswite luse alushinisho. Twakabona bulemu bwakwe ubo mbwaakatambula ceebo wakalinga Mwaana eenkabo wa baIshi.

¹⁵ Joni wakapa bukamboni pali nguwe akoolobesha ayi, “Ngowooyu uyo ngondakalinga kwaamba ayi, ‘Utoosa pesule lyangu uleendaawo nkusu pali ndime mukwiinga wakalingaako nebo kaantana kushalwa.’ ”

¹⁶ Muluse lwakwe luunji swebo twakatambula shoolwe shiinji abuumbi.

¹⁷ Mukwiinga Lesa wakapa Milawo kwiinda muli Mose, sombi luse alushinisho shakesa kwiinda muli Jesu Klistu.

¹⁸ Taaku muntu wakabonaawo kale Lesa, sombi Mwanaakwe wakashalwabo eenka, uyo usunikwi abuumbi abaIshi, ngowakalengesha ayi ashibikwe.

Bukamboni bwakwe Joni Mubombeki

¹⁹ Ono ubu mbobukamboni bwakwe Joni baJuda ba kuJelusalemu ndibakatuma bapailishi alimwi abene Lefi bamwi kumwiipusha ayi, “Ino ndiwaani?”

²⁰ Joni taakwe kukaka kukumbula, sombi wakakumbula cakutashisa ayi, “Nebo teshi ndime Usalitwe wakwe Lesa.”

²¹ Bakamwiipusha ayi, “Ino ndiwaani? Sa ndiwe Elija?” Lakwe wakakumbula ayi, “Sobwe, teshi ndime Elija.” Bakamwiipusha alimwi ayi, “Sa ino ndiwe mulaluki ngotutoolindila ulya?” Sombi wakaamba ayi, “Sobwe.”

²² Lyalo bakamwiipusha ayi, “Ino ndiwaani? Ceebo tulyeelete kuya mukulwiita baabo batutuma. Ono omwiine ulaamba ayi ndiwaani?”

²³ Lyalo Joni wakakumbula kwiinda mumaswi akaamba Isaya mulaluki mukulukulu ayi, “Ndime muntu umwi utokoolobesha muluyanga ayi, ‘Amululamike nshila ya Mwaami!’ ”

²⁴ Abo bantu bakalinga kwiipusha Joni, bakabatuma mbaFalisi.

²⁵ Bakeepusha Joni ayi, “Ono na teshi ndiwe Usalitwe wakwe Lesa, Elija nabi mulaluki ngotutoolindila ulya, utoobombekelanshi?”

²⁶ Joni wakabakumbula ayi, “Nebo ntoobombekabo amaanshi, sombi pakati kanu mpwaali uyo ngomuteshi.

²⁷ Lakwe ngootoosa pesule lyangu, sombi nebo nsheelete akukotama kwaamba ayi ŋangulule nsapato shakwe.”

²⁸ Ishi shoonse shakacitikila mundabala ya Betani kulubasu lwakwicwe lya Mulonga wa Joodani, uko Joni nkwaakalinga kubombekela.

Jesu Mwanaambelele wakwe Lesa

²⁹ Mpeeke bushiku bwakaboolaawo Joni wakabona Jesu keesa kuli nguwe. Lyalo wakoolobesha ayi, “Amubone Mwanaambelele wakwe Lesa uyo ukusha shibiibi sha bantu ba mucishi coonse ca panshi!

³⁰ Uyu, ngowoolya ngondakalinga kwaamba ndindakaamba ayi, ‘Utoosa pesule lyangu uleendaawo nkusu pali ndime mukwiinga lakwe wakalingaako nebo kaantana kushalwa.’

³¹ Nebo palwaangu nshindakalinga kumwishi, sombi ndakesa mukubombeka amaanshi kwaamba ayi bamwishibe bene Isilaeli.”

³² Joni wakapa bukamboni mukwaamba ayi, “Ndakabona Mushimu Usalashi kauswa kwiculu anga nimpolobe akwikala pali nguwe.

³³ Nebo palwaangu nshindakalinga kumwishi, sombi Lesa uyo wakantuma mukubombeka amaanshi ngowakandwiita ayi, ‘Uyo ngweshi ukabone waselukilwa Mushimu Usalashi akwikala pali nguwe, ukeshibe ayi ngowooyo ubombeka aMushimu Usalashi.’

³⁴ Ono nebo nemwiine ndalibonena alimwi nceceeco ncendaambila cakutatonsha ayi, ‘Uyu nguMwanaakwe Lesa!’ ”

Bashikwiiya bakwe Jesu bataanshi

³⁵ Bushiku bwakaboolaawo Joni wakalinga kwiimfwi pamusena weenka uyo alimwi abashikwiiya bakwe bobilo.

³⁶ Ndyaakabona Jesu kaainda, wakaamba ayi, “Amubone, ngulya Mwanaambelele wakwe Lesa!”

³⁷ Mpomunyaawo bashikwiiya bobilo abo, ndibakanyumfwa cakaamba Joni, bakakonkela Jesu.

³⁸ Lyalo Jesu ndyaakacebuka wakabona kabamukonkela, mpeeke wakabeepusha ayi, “Mucafweeko?” Bakakumbula ayi, “Labi, ino mulekala kuli?” (Labi cilaamba ayi mufundishi.)

³⁹ Jesu wakakumbula ayi, “Kamwisa mukaboneeko.” Aboobo bakaya akubona nkwaakalinga kwikala. Bakekalaakwe bushiku ubo ceebo lyakalinga kale macolesha.

⁴⁰ Pabaabo bobilo bakanyumfwa maswi akwe Joni akukonkela Jesu, umwi wakalinga Andulu mukwabo Simoni Pita.

⁴¹ Cintu citaanshi ncaakacita Andulu, nkubona Simoni akumwaambila ayi, “Twamucana Klistu.” (Ili liina lilaamba ayi “Usalitwe wakwe Lesa.”)

⁴² Kuswawaawo Andulu wakatola Simoni kuli Jesu. Jesu wakalangilisha Simoni akumwaambila ayi, “Webo liina lyako ndiwe Simoni mwanaakwe Jona. Sombi unanookwiitwa ayi Kefasi.” (Liina ili lilasansulula ayi “Pita” nkokwaamba ayi “Mwaandami.”)

Jesu mbwaakeeta Filipo aNatanaelo

⁴³ Bushiku bwakaboolaawo Jesu wakayeeya kuya kucishi ca Galili. Mpeeke wakacana Filipo akumwaambila ayi, “Nkonkele!”

⁴⁴ Filipo wakalinga kwikala kundabala ya Betisaida uko kwakalinga kwikala Andulu aPita.

⁴⁵ Lyalo Filipo wakacana Natanaelo, mpeeke wakamwaambila ayi, “Twamucana muntu uyo Mose ngwaakalemba mumabuku a Milawo alimwi abalo balaluki bakulukulu ngobakalemba mumabuku abo, nguJesu wa kuNasaleti, mwanaakwe Josefu.”

⁴⁶ Natanaelo wakeepusha Filipo ayi, “Sa muNasaleti amwalo inga mwaswa cintu cibotu?” Filipo wakakumbula ayi, “Kosa, ukalibonene omwiine.”

⁴⁷ Ono Jesu ndyaakabona Natanaelo keesa kuli nguwe wakaamba ayi, “Anooyu mwine Isilaeli wancinencine, muli nguwe taamu kampenda.”

⁴⁸ Natanaelo wakamwiipusha ayi, “Ino mwaanshiba buyani?” Jesu wakakumbula ayi, “Kaatana kukwiita Filipo, ndalinga kukubwene kale kooli mucisamu ca mukuyu.”

⁴⁹ Natanaelo wakakumbula ayi, “NoBafundishi, ncakwiila muli Banababo baLesa! Muli Baami ba bene Isilaeli!”

⁵⁰ Jesu wakaamba ayi, “Sa washooma ceebo cakukwaambila ayi, ‘Ndalinga kukubwene kooli mucisamu ca mukuyu?’ Ulaakubona shintu shiinda waawa!”

⁵¹ Lyalo wakabaambila ayi, “Ncakwiila, ntoomulwiita ayi mulaakubona liculu lyacaluka abaanjelo bakwe Lesa kabatanta akuseluka paMwanaaMuntu.”