Jona 3 - Baibo Busansulushi Bwa Libuku Ili

Jona mbwaakanyumfwila Mwaami Lesa

¹ Ono Mwaami Lesa wakaambila Jona lyabili ayi,

² “Nyamuka uye kundabala inene iindaawo ya Ninife, ukashimikile bantu ba mumo makani ngondakakulwiita.”

³ Lyalo Jona wakanyumfwila Mwaami Lesa akuya kuNinife. Anu ndabala inene iindaawo iyo, yakalinga inene cakutola nshiku shotatwe kwiindaamo mubufwaafwi.

⁴ Mpomunyaawo wakanyamuka akweenda mundabala inene iyo, kuswa macuunsa kushikila amacolesha pabushiku butaanshi. Lyalo wakatalika kushimikila ayi, “Na peende nshiku shili makumi one, ndabala inene ya Ninife ilaakunyonyweetwabo limwi.”

⁵ Bene Ninife bakashoma makani ayo akwe Lesa. Lyalo bakasuminishanya kulikasha kulya, kuswa kubamanene abanike, boonse bakafwala masaka kubonesha ayi basanduka kuswa kushibiibi shabo.

⁶ Mwaami wa kuNinife ndyaakanyumfwa cikani ici, wakanyamuka pacuuna cakwe cabwaami, wafuula cakufwala cabwaami, walifweka masaka alimwi akwikala mumilota.

⁷ Kuswawaawo, bakatuma nkombe kubene Ninife ayi, “Inkombe iyi yaswa kumwaami abamaloba bakwe. “Kutabi muntu weelete kulya nabi kunwa cili coonse, alimwi taaku litanga lya shifubwa lyeelete kulya, nabi kunwa maanshi.

⁸ Sombi muntu uli woonse alifweke masaka alimwi akufweka shifubwa shoonse. Woonse muntu ulyeelete kufwambaana kupaila kuli Lesa akuleka bubi bwakwe, alimwi amibo itabete kabotu.

⁹ Mpashi Lesa inga wapilula miyeeyo abukali bwakwe kwaamba ayi tukabule kufwa!”

¹⁰ Ono Lesa ndyaakabona ayi basanduka kunshila shabo shabubi, wakabanyumfwila nkumbu. Aboobo taakwe kubanyonyoola kweelana ambwaakalinga aamba.