Jobo 7 - Baibo Busansulushi Bwa Libuku Ili

¹ “Sa te buumi bwa muntu mbuyumu pacishi ca panshi? Sa te nshiku sha buumi bwakwe shili anga nsha musebenshi?

² Shilibo anga nsha musha utoolilila cimfule. Ncakwiila shili anga nsha musebenshi utoolindilila kufola.

³ Mbweeke ubo anebo nshiku shangu mboshitacite mpindu mweenshi amweenshi alimwi mashiku amashiku nkunoolibo amapensho atamaani.

⁴ Lyoonse na ndoona nkunooyeeyabo ayi, ‘Anu butooca lili?’ Bushiku bulalaampa cakunoosandookabo kushikila bwaca.

⁵ Mubili wangu uliswitebo mapila ashilonda. Shitootulookabo akunooswa mashina.

⁶ “Nshiku shangu shileenda lubilo kwiinda cakupombeleshako busalu. Shileenda lubilo akweela cakubula kulangila bubotu.

⁷ NobaLesa, amwiibaluke kwaamba ayi buumi bwangu bulibo anga nkuyoya kwa linkanda lyomwi. Nshiku shangu shakusangalala shamana kale.

⁸ Abo batoombona cino ciindi teshi bakambonewo tubili. Balaakunyandoola, sombi teshi nkacanikeewo.

⁹ Bweenka mbuli likumbi mbolisunguluka akumana, mbweeke ubo alakwe uya mucuumbwe mbwaalobelabo limwi.

¹⁰ Teshi akaboolewo tubili kuŋanda yakwe. Beshikamukowa wakwe abalo boonse balaakumulubaako.

¹¹ “Paceebo ceeco inga nshicileeki kwaamba, sobwe. Ndanokwaambabo ceebo moyo wangu wacisa, ee, ndanootongooka ceebo ca bukali buli mumoyo wangu.

¹² “Sa ndi shinshimwe wa mulweenge cakwaamba ayi munoonindilila?

¹³ Na ndayeeya ayi bulo bwangu butooŋumbulusha alimwi ayi tulo tutoontola akumanisha kutongela kwangu,

¹⁴ mwebo mulanjoosha kwiinda mumaloto abiibi, ee, mulanjoosha mushili anga nshiloto.

¹⁵ Paceebo ceeco ndayeeyabo kushinwa akufwa kwiinda kunoocili muumi mumubili uyu utoopenga.

¹⁶ Buumi bwangu ndabucimwa abuumbi cakwaamba ayi nshisuni akunoocili muumi. Amundekebo nemwiine mfwe ceebo buumi bwangu tabucite mpindu.

¹⁷ Anu muntu nciinshi uyo ngoomubikako maano? Muntu nciinshi kwaamba ayi kamuyeeya nshaacita?

¹⁸ Mulamusompasompa lyoonse macuunsa akumweelesha ciindi aciindi.

¹⁹ Ino mutoocileka lili kunangilisha? Ndabuula aciindi cakumina mate.

²⁰ Na ndakabisha nciinshi ncendamucitila, mwebo nobeshikunindilila? Ceebonshi ncemwanengeshela kuba cintu cakwiilawo lweela? Sa nkokwaamba ayi ndamupensha abuumbi?

²¹ Ceebonshi tamukoonshi kulekelela shibiibi shangu? Sa inga tamulekeleli kulubisha kwangu? Onoonobo ndaakuya kucuumbwe mulaakunangoola, sombi teshi nkacanikeewo.”