Jobo 6 - Baibo Busansulushi Bwa Libuku Ili

Jobo mbwaakakumbula

¹ Lyalo Jobo wakakumbula ayi,

² “Mapensho angu naalinga kupimwa, makatasho angu naalinga kubikwa pacakupimisha,

³ ncakwiila naakwiinga alema kwiinda museese wa mulweenge. Nceceeco maswi angu ncaabeta abukali.

⁴ Mifwi yakwe Lesa Shinkusu shoonse ilinjasite. Bukali bwa njiyo butokweendeenda mumubili. Shintu shiyoosha shakwe Lesa sheelekwa kuli ndime.

⁵ “Sa mbongolo ya muluundu ilalila na bwiisu kabuliiwo? Sa musune alakwe ulalila na wasaninwa bwiisu bubotu?

⁶ Sa cakulya citontola inga calikwa kwakutalungamo mwiinyo? Sa cituba ca liyi cilanyumfwika kabotu ceenka?

⁷ Kumoyo kwangu kulashiya kulya shakulya sha mushobo uyo. Shakulya sha mushobo uyo shilanengesha kuluka.

⁸ “Mbweenga cabotaako na kusenga kwangu kwakumbulwa! Mbweenga cabotaako na Lesa wakumbula mupailo wangu!

⁹ Mbweenga cabotaako na Lesa wancaya, ee, na wandobyabo alyaansa lyakwe!

¹⁰ Lyalo moyo wangu inga wekala ceebo nshina kukakaawo maswi akwe Lesa Usalalite mukuciswa kwangu koonse nakukomeni.

¹¹ “Ino ninkusunshi nsheencite kwaamba ayi kancilindila? Ino ndaakucanamonshi mubuumi ubu nabi nkakatile?

¹² Sa ndi muyumu anga ndibwe? Sa mubili wangu ngwa bulonse?

¹³ Nebo nkusu shakulipulusha shamana. Shoonse shakalinga kuncafwa shantalamuka.

¹⁴ “Ciindi ca mapensho ambuli aya, kulayandika babyo bashomeka nakubi kwaamba ayi muntu uyo wacileka kuloonda Shinkusu shoonse.

¹⁵ Ono mwebo nobeensuma mutoombecabo anga ntulonga, ee, tulonga tuyuma muciindi ca cilimo.

¹⁶ Muli anga ntulonga tushiya mbi kumaanshi ciindi ca meensa, ee, anga ntulonga tukunka cakusefuka mfuula na yakomena.

¹⁷ Cilimo tulonga tulacileka kukunka ee, muciindi ca lumwi tulamana kuyuma.

¹⁸ Beshikweenda milongo balapambuka kuswa munshila kuyandoola maanshi, sombi tabaacaani, aboobo balafwa.

¹⁹ Beshikweenda baswa kuTema balayandoola maanshi, abalo beshikweenda baswa kuSheba balalangila kucana maanshi.

²⁰ Balatyongola ceebo balashoma ayi batokwaacana, sombi na bashika kukalonga balacana ayi taaku.

²¹ Ono mbweeke ubo amwebo mbomubete kuli ndime, mwabona mapensho ngooncite akuloonda.

²² Sa ndakamusengawo ayi muncaafwe, nabi kwaamba ayi mundubuleeko abuboni bwanu?

²³ Sa ndakasengawo kale ayi, ‘Amumfuune kuswa mumaansa a balwani bangu, nabi ayi mundubule kuswa mumaansa a beshikundyatilila?’

²⁴ “Amunjiisheeko ntokuumuna. Amuntondeshe mpondakabisha, ntookutika.

²⁵ Maswi alushinisho alacisa, sombi kulengulula kwanu taaku ncekwaamba.

²⁶ Sa mutooyeeya ayi inga mwandulika kumaswi anu? Sa mutooyeeya ayi maswi a muntu upengete taaku mbwaabete?

²⁷ Ncakwiila mwebo mulalyatilila bana banshiwa alimwi mwebo muloolisha babyaanu.

²⁸ “Ono amunangilishe kumeenso, sa nebo inga ndamubeca?

²⁹ Amunyumfwile nkumbu akucileka koombolosha cakutalulama. Mutampi mulandu ceebo taaku ncendakabisha.

³⁰ Sa mutooyeeya kwaamba ayi ntoobeca ncentokwaamba? Sa mutooyeeya ayi nshicite maano akwishiba cibiibi nabi cibotu?