Jobo 5 - Baibo Busansulushi Bwa Libuku Ili

¹ Jobo ita bulya tubone, sa kuliwo weenga wakukumbula? Anu ngumunjelonshi ngweenga wacicilaako?

² Ncakwiila bukali bulacaya muluya, awalo munyono ulacaya bataaku mbobabete.

³ Nebo ameenso angu ndakabonawo kale muluya waswitilila, sombi muciindi ciniinibo ndakashingana ŋanda yakwe.

⁴ Bana bakwe tabacite shikubafuna, balalyatililwa munkuta ceebo taaku aubacafwa.

⁵ Beshinsala balalya shishango shakwe, kubwesela kumwi ashimena mumyuumfwa. Ncakwiila beshinyotwa balakumbwa buboni bwakwe.

⁶ Mapensho taaswiwo panshi nabi makatasho kuswa mubulongo.

⁷ Sombi muntu lakwe ulashalilwa mapensho bweenka mbuli mulilo mbootolooka kuya mwiculu.

⁸ “Kaandi ndime, nendasandukila kuli Lesa alimwi akumwaambila cikani cangu.

⁹ Lesa ulacita shaankamiko nshetutakoonshi kwishiba, ee, shitondesho sha nkusu sha kwiculu shiinji shitabelengwa.

¹⁰ Ulalokesha mfula pacishi ca panshi, alimwi akutuma maanshi mumyuunda.

¹¹ Ncakwiila balibombya, ulabasumpula. Balila abalo ulaboomusha akubafukata.

¹² Ulalyatilila miyeeyo ya bantu bacenjete kwaamba ayi bataswitilili mumicito yabo.

¹³ Ulacatisha basongo kwiinda mubucenjeshi bwabo alimwi ulafulunganya maano abacenjete cakufwambaana.

¹⁴ Balaba mumunshinshe ciindi ca malumwi akutalika kupampanshapampansha anga ndimashiku.

¹⁵ Sombi Lesa ulafuna bakandu kuswa kubalwani babo alimwi ulabafuna kuswa kubantu beshinkusu.

¹⁶ Aboobo bakandu balalangila, sombi babiibi baloomunabo tontolo.

¹⁷ “Ulicite coolwe muntu uyo Lesa ngwaalulamika. Aboobo utanyanshi kukalalila kwa Shinkusu shoonse.

¹⁸ Lesa ulacisa akushilika mwiine eenka, ncakwiila ulalengesha shilonda akushilengesha koosha mwiine eenka.

¹⁹ Nabi mapensho ali buyani akupolela, Lesa ulaakukufuna kwaamba atakuciisi.

²⁰ Munsala ulaakukufuna kwaamba ayi utafwi, amwalo munkondo ulaakukufuna kwaamba ayi utayaswi mupeeni.

²¹ Lesa ulaakukufuna kuswa kubeshikucaya meena alimwi tooelete kuloonda muciindi cakunyonyoolwa.

²² Nsala akunyonyoolwa ulaakushiseka alimwi tooelete kuloonda banyama ba muluundu.

²³ Myuunda njeshi ukanoolima teshi ikabeewo amabwe alimwi banyama ba muluundu teshi bakakuluume.

²⁴ Aboobo ulaakunookala muluumuno muŋanda yako ashalo shifubwa shako shilaakunookwenebo lyoonse.

²⁵ Ulaakuba abaana baanji, ee, bamulunyungu balaakufula anga mbwiisu pacishi ca panshi.

²⁶ Ulaakwikala buumi bulaamfu abuumbi alimwi ulaakunoolibo muyumu kushikila bushiku waakufwa.

²⁷ “Ono ishi shoonse twakashiiya akushilangalanga kwaciindi cilaamfu. Nshalushinisho, aboobo webo Jobo ulyeelete kushitambula akushikonkela.”