Jobo 42 - Baibo Busansulushi Bwa Libuku Ili

Jobo mbwaakakumbula Lesa

¹ Lyalo Jobo wakakumbula Mwaami Lesa ayi,

² “NoBaami baLesa, ndishi kwaamba ayi mwebo mulicite nkusu shoonse alimwi ayi taakuuwo muyeeyo wanu weenga wabula kuswitilila.

³ Mwanjipusha citoompamya kutongooka busongo bwanu bulya nebo mboontacite lushibo napaceyuubo. Ndushinisho ndakalinga kwaambabo shintu nshendatalinga kunyumfwisha, ee, kwaamba shintu shikankamanisha isho nsheentakoonshi kwishiba.

⁴ “Mwaŋambila ayi nkutumane ndyemwalinga kwaamba, alimwi akwaamba ayi njeleshe kukumbula miipusho yanu.

⁵ Ndakalinga kunyumfwabo shapali ndimwe, sombi sunu ndalibonena ameenso angu nemwiine.

⁶ Aboobo ndicite nsoni abuumbi pamakani ngondakaamba, Ndasanduka kuswa kushibiibi shangu akwalabangana mulusuko amumilota.”

Lesa mbwaakapa Jobo coolwe alimwi

⁷ Ono Mwaami Lesa ndyaakamanishabo kwaambila Jobo, wakaambila Elifasi mwine Temani ayi, “Ndakalala abuumbi pali ndiwe ababyo bobilo ceebo mwebo tamukwe kwaamba makani a lushinisho pali ndime mbuli bwakacita musebenshi wangu Jobo.

⁸ Paceebo ceeci kamuya kuli Jobo musebenshi wangu mutolelele bacende bosanwe abobilo ambelele shisankwa shosanwe ashobilo kwaamba ayi mukalibengele mulambu wakutenta. Jobo utoomupaililako, anebo ntootambula mupailo wakwe kwaamba ayi ntamupi mulandu kweelana abuluya bwanu. Mwebo tamukwe kwaamba makani a lushinisho pali ndime mbuli bwakacita musebenshi wangu Jobo.”

⁹ Mpeeke Elifasi mwine Temani, Biludadi mwine Shuwa aSofa mwine Naama bakacita kweelana abwakabaambila Mwaami Lesa. Lyalo Mwaami Lesa wakakumbula mupailo wakwe Jobo.

¹⁰ Pesule Jobo ndyaakamana kupaililako babye, Mwaami Lesa wakamupa coolwe akumulengesha kubila alimwi. Wakamupa buboni busotoka pasheesho nshaakalinga kucite kataanshi.

¹¹ Lyalo bamakwabo, bamanankashi shakwe abaabo mbaakalinga kunyumfwanaabo kalekale bakaya mukulita kuŋanda yakwe mukumuumbulusha akumusangalasha pamapensho ayo Mwaami Lesa ngaakaleta pali nguwe. Womwi awomwi wakamupa maali a silifa alimwi aninga ya golodi.

¹² Mwaami Lesa wakapa Jobo coolwe cinene abuumbi munshiku shakwe shakweelaako kwiinda munshiku shitaanshi sha buumi bwakwe. Wakaba ambelele shili 14,000, ngamela shili 6,000, basune bali 2,000 alimwi ambongolo shili 1,000.

¹³ Wakashala abaana basankwa bali bosanwe abobilo abanakashi botatwe.

¹⁴ Mwanakashi munenebantu wakamutumba ayi Jemima, wabili ayi Kesiya alimwi awatatu ayi Keleni Apuki.

¹⁵ Taakuuwo mwanakashi nabi womwi mucishi coonse ca panshi wakalinga kweelene kubota abana bakwe Jobo banakashi. Jobo wakababaanishisha pomwi abanandumi shabo buboni bwakwe.

¹⁶ Pesule, Jobo wakekala myaaka ili 140. Wakekala kushikila bakula bana bakwe, bashikulu bakwe, bana ba bashikulu bakwe abalo abana babo.

¹⁷ Wakafwa kaacite myaaka iinji abuumbi.