Jobo 41 - Baibo Busansulushi Bwa Libuku Ili

¹ “Sa webo inga wakonsha kuloba shinshimwe andoobo nabi kwaanga mulaka wakwe alutambo?

² Sa inga wakonsha kumupusha lutambo munshono nabi kumukoba ndobo mumicendwa yakwe?

³ Na wamucatisha boobo, sa inga wakukombelela ayi umunyumfwileko nkumbu? Sa inga wakukombelela aliswi libombu ayi umuleeke?

⁴ Sa inga wapanga cipangano andiwe ayi ulaakunookusebensela mubuumi bwakwe boonse?

⁵ Sa inga wamusekanya bweenka mboosekanya bayuni? Sa inga wamubika mucinsangala ayi basebenshi bako banakashi kabeebela?

⁶ Sa basulishi inga bacikonsha kumuulisha? Sa inga bamutimboola ayi bamwaabane kabotu beshimakwebo?

⁷ Sa inga watulula cipaya cakwe kumyoondo? Sa inga watulula mutwi wakwe kulisumo linene?

⁸ Ansha ukeeleshewo kumucata, ncakwiila nkondo iyo teshi ukeelubeewo alimwi teshi ukaciboosheewo tubili.

⁹ “Uyo weenga wamuyeeyela kumukonsha, ingayi utoobecabo ceebo na muntu wamubonabo, mumanungo mulaboolabo tontolo akuwa peenka apo.

¹⁰ Taakuuwo nabi womwi ucite nkusu shakwaamba ayi inga wamusumuna. Ono ngani uyo weenga weemikana ayi apikishanye anebo neLesa?

¹¹ Ngani ngondakabwesela cintu utoonsesa ayi mupilushishe? Shintu shoonse shili pacishi ca panshi nshaangu.

¹² “Nebo inga nshaalilwiiwo kupandulula bubete myeendo yakwe shinshimwe. Ndakonsha kwaamba shankusu shakwe ambuli mbwaabumbitwe.

¹³ Ngani weenga wakonsha kufunda cipaya cakwe? Ngani weenga wakonsha kuyasa cikanda cakwe?

¹⁴ Ino ngani weenga walyaaba kumucenamuna mibanga yakwe bulya micendwa yakwe iyo mbooicite meeno aloondesha?

¹⁵ Pamusana wakwe paliilinkene maamba anga ngamayawo ayo apaankene cankusu cakuyumabo anga ndibwe.

¹⁶ Maamba aya alicatene cankusu cakwaamba ayi taapuuwo amuuwo mpweenga weendila.

¹⁷ Lyomwi alyomwi lilicatite kulibye cakwaamba ayi taakuuwo weenga wakonsha kwaalamatula.

¹⁸ Kutyamuka kwakwe kulabekabo anga ngumulilo, aalo meenso akwe alafubelabo pyu anga ndisuba pakuswa.

¹⁹ Mukanwa mwakwe mulaswa mibengebenge ya mulilo alimwi mulaswa akakongolo ka mulilo utootolooka.

²⁰ Munshono yakwe mulasunta bwiishi anga mbwa matete atoopya munshaanongo.

²¹ Muuya wakwe ulakonsha kunyasha mulilo pamalasha. Mukanwa mwakwe mulaswa mibengebenge ya mulilo.

²² Nkusu shakwe shili kunshingo alimwi boonse bamukumanya balaloonda.

²³ Acalo cipaya cakwe nciyumu nta cakwaamba ayi taaku weenga wakonsha kucifunda.

²⁴ Ntiti yakwe njiyumubo anga ndibwe. Njiyumubo nta anga ndibwe lyakupelelawo.

²⁵ Na wabukabo, beshinkusu boonse balaloonda. Ncakwiila balatutuma abuumbi na bamunyumfwa kaaondenkanya luundu.

²⁶ “Taaku mupeeni ukonsha kumuyasa napaceyi. Ncakwiila taakoonshi kuyaswawo lisumo, mufwi nabi moondo.

²⁷ Ceebo kuli nguwe nshimbi ilibo anga mbwiisu, awalo bulonse kuli nguwe ulibo anga ndukuni lubolete.

²⁸ Mifwi teekoonshi kumulengesha kucica. Mabwe awaalwa acipaya cakuwaalisha alibo anga mbuungu kuli nguwe.

²⁹ Nkoli kuli nguwe ilibo anga nkabwiisu. Bantu na batoowala masumo kuli nguwe, lakwe ulasekabo.

³⁰ Maamba akwe apalifumo lyakwe ali anga ntukaye. Mumatipa mwaainda mulaya butalwa anga mweenda cileyi cakulupusha.

³¹ Ulafundoola maanshi a mulweenge akuboneka anga ninongo ya maanshi atooselooka, kuselookabo anga ngamafuta munongo ili pamulilo.

³² Munshila mweenga weenda mulacaala kamubembelabo. Lweenge lulaboolabo tuu kulyoofu ndyaashiya.

³³ Muno mucishi ca panshi taaku nceenga ceelanaakwe ceebo lakwe ngumunyama utacite boowa.

³⁴ Lakwe ulanyansha banyama boonse bakali ceebo ngomwaami wa banyama boonse bamuluundu.”