Jobo 40 - Baibo Busansulushi Bwa Libuku Ili

¹ Lyalo Mwaami Lesa wakaambila Jobo ayi,

² “Sa webo inga wapikishanya aShinkusu shoonse? Kumbula tunyumfwe nowalinga kupikisha.”

³ Mpeeke Jobo wakakumbula Mwaami Lesa ayi,

⁴ “Nebo ndi muntubo, taakuuwo mboombete. Anu inga ndamukumbula ayinshi? Taakuuwo nceeshi ŋambewo nabi comwi.

⁵ Ndakaamba kale lutaanshi, bulya cakamana. Pacecino ciindi taaku nceenga ndaamba.”

⁶ Lyalo Mwaami Lesa wakakumbula Jobo kuswa mucipuupu cinene ayi,

⁷ “Imikana cabusankwa, nkwiipushe. Awebo ukumbule miipusho yangu.

⁸ Sa webo utookakatila kwaamba ayi nebo nshiluleme? Sa webo utoompa mulandu mukwaamba ayi webo uboneke kululama?

⁹ Sa webo inga weelana andime nkusu? Sa liswi lyako lilakonsha kukalooka bweenka mbuli lyangu?

¹⁰ Na mboobete, imikana mubulemu bwako akulilumbaisha. Lifwalike bwaami alimwi ampuuwo.

¹¹ Langa beshikulisumpula, ubakalalile akubabombya.

¹² Ee, langa beshikulisumpula boonse akubaboosha panshi. Bamucita shibi abalo ubalyatoole peenka apo mpobabete.

¹³ Bafukile abo boonse mubulongo akubaangilila mumusena wa bafu.

¹⁴ Wacita boobo ndyeshi nsumine ayi ncakwiila ulicite nkusu, ee, nkusu isho nsheenga walipulushishaako omwiine.

¹⁵ “Bona mfubu njendakalengela pantu pomwi andiwe iyo ilyabo bwiisu anga ngumusune.

¹⁶ Bona nkusu nsheecite mumubili wa njiyo alimwi ankusu shili mushiso sha njiyo.

¹⁷ Mucila wa njiyo uliimfwibo anga ncisamu ca sida ashalo shiso sha myeendo ya njiyo nshiyumu abuumbi.

¹⁸ Mafuwa a njiyo ngayumu anga ngubulonse, amyeendo ya njiyo ilibo anga njimingwala ya nshimbi.

¹⁹ Ngomunyama wiindaawo nkusu pabanyama boonse mbondakalenga. Nebo neenka nemulengi wa njiyo ndimebo neenga ndeekoma.

²⁰ Bwiisu mbweelya bulacanika kutulundu uko kusekanina banyama ba muluundu boonse.

²¹ Iloona munshi lya shinkwewa keeyubite mumatete amushitolo.

²² Shinkwewa shileeshisa mushimfule sha nshisho. Ashalo shisamu sha masompe shileeshinguluka.

²³ Teeloondiwo nabi mulonga ukunke amukuuku unene buyani. Teetenkaniiwo nabi maanshi a mumulonga wa Joodani asempookile buyani kumeenso a njiyo.

²⁴ Ngani ukonsha kwiilobolamo meenso akwiicata? Ngani ukonsha kwiiloba munshono akwiicatisha?