Jobo 39 - Baibo Busansulushi Bwa Libuku Ili

¹ “Sa ciindi balukoka mabwe ncebashalilamo ulicishi? Sa tookwe kubonawo kale nsefu mpoishalila?

² Sa inga wabelenga myeenshi kuswa ciindi ndyeshimita kushikila ndyeshitumbuka? Sa ciindi nceshishalilaamo ulicishi?

³ Sa ciindi ndyeshinyonwa mumala ayi shitumbuke akuba atwana twa nshisho ulicishi?

⁴ Twana twa nshisho ndyetukomena akuba ankusu akuya cakutapilukila tubili kubamanyinawabo.

⁵ “Ngani wakapa lwaanguluko kumbongolo sha muluundu? Ino ngani wakashaangulula ntambo?

⁶ Ndime ndakashipa luyanga lwakwikalaamo akushilekela ayi shinookala kumisena icite shikula.

⁷ Shilekala kulaale amandabala anene kuli coongo. Tashisuniiwo akweembelwa, sobwe.

⁸ Shileendaana mutulundu mumafulo a nshisho akuya ciyandoola cili coonse cicitontola.

⁹ “Sa nyaati inga yasumina kukusebensela? Sa inga yasumina koona mucimpati cako mashiku?

¹⁰ Sa inga wakonsha kwiicaila ayi ilime? Sa inga weelengesha kukwela cisansu mumuunda kubotesha bweenshi?

¹¹ Sa inga wacinka manungo munkusu shiinji sha njiyo akwiilangila kwaamba ayi itoocita milimo yako iyumu?

¹² Sa inga wacinka manungo muli njiyo ayi itookututila shili anga ngamaila shako akushibunganya kulubansa lwako lwakulupwitaawo?

¹³ “Mapapaminwa a ntibatiba alaya bupepuluka cakusangalala, sombi inga teekoonshi kuuluka anga ninkobokobo.

¹⁴ Ntibatiba mayi a njiyo ilaashalilabo panshi akwaaleka ayi kaakasaalilwa mumuseese

¹⁵ cakutayeeyawo ayi bantu inga balyatawo akwaapwayoola nabi ayi banyama ba muluundu inga baalyatoola.

¹⁶ Mayi a njiyo ilaalangabo anga teshi a njiyo cakutayeeyawo ayi inga ndapengela kapongo kafwite.

¹⁷ Ndime ndakeema ntibatiba busongo, ee, ndime ndakayiima maano akwishiba shintu.

¹⁸ Sombi yalo na yaamba ayi icice, ilacica kwiinda paliaki awooyo ulitantite.

¹⁹ “Sa Jobo ndiwe wakapa nkusu maaki akwaapa booya bwa pamwaala bunyamooka anga ngamaaba?

²⁰ Sa ndiwe wakaapa ayi anoosotooka anga ninsoshi? Sa ndiwe wakalengesha ayi kaafomashika cabukali?

²¹ Alafukoola bulongo cabukali akusangalala munkusu sha ngawo. Lyalo alashipukila munkondo ankusu sha ngawo shoonse.

²² Taaloondiwo cintu cili coonse nabi kuboola pesule na abona mipeeni.

²³ Shakulwanisha isho shinyamwite beshikwaatanta shilaya bukolonkonsha akuya bubekooka kulisuba.

²⁴ Maaki ayo alabimba kubukali akucicila kukondo, taakoonshi kukalikana na lupeenga lwa nkondo lwalilabo.

²⁵ Na lupeenga ulo lwalilabo, alafoomashika. Bweema bwa nkondo alabunyumfwilabo kaacilibo kulaale alimwi alanyumfwila shitokwaambilisha bamatanjilili ba bashilumamba.

²⁶ “Sa ndiwe wiisha cikupwi kuuluka ndyaayala mapapaminwa akwe kululama kumalenge?

²⁷ Sa ndiwe ulwiita muumbankwashi ayi ooluke akuya mukuyakila ciinswa peculu lya tulundu peene?

²⁸ Ulekala peculu lya mabwe, ncakwiila nsonga sha mabwe ndyelilinga lyakwe.

²⁹ Peenka apo mpwaabonena shakulya shakwe. Meenso akwe alashibonenabo kulaale.

³⁰ Kuli koonse kuli cafwa, alakwe nkwaacanika. Bana bakwe abalo nkobacanika kabanwabo bulowa.”