Jobo 38 - Baibo Busansulushi Bwa Libuku Ili

Mwaami Lesa mbwaakakumbula Jobo

¹ Lyalo Mwaami Lesa wakakumbula Jobo mucipuupu cinene ayi,

² “Anu ndiwe ni webo nootootongooka busongo bwangu akunokwaamba maswi akubula lushibo?

³ Imikana cabusankwa, nkwiipushe. Awebo ukumbule miipusho yangu.

⁴ “Sa wakalingaako ndindakalinga kuyaka lwiimbi lwa cishi? Ndwiite tubone na ulicite lushibo luunji.

⁵ Ino ngani wakapima mboceelete kukomena? Ngani wakafungulula ntambo kucipima? Sa te shoonse isho ulishishi?

⁶ Ino macinko a ncico aliimfwi pali? Ngani wakayaamikako libwe lyakwaamba ayi cishi cishimpileeko?

⁷ Sa wakalingaako nyenyeenshi sha kumuyamaca ndishakalinga kwiimba abaanjelo ba kwiculu ndibakalinga koolobesha cakusangalala?

⁸ “Ino ngani wakacala kumilyango ya lweenge ndilwakapoomoka, ee, ndilwakaswa mucishi anga ngukateta waswa mumala?

⁹ Ncakwiila ndime ndakalufwekelesha amakumbi akuluputilisha mumunshinshe.

¹⁰ Ndakapima molweelete kweela alimwi akubika milyango ampingilo sha ndulo mposheelete kubeta.

¹¹ Ndakalulwiita ayi, ‘Unanokweela waawa, kuteendililaawo, sobwe.’ Ndakalulwiita ayi, ‘Apa mpopeelete kweela maaba ako ankusu.’

¹² “Jobo, sa wakaambilawo kale bushiku ayi buce? Sa wakaambawo kale ciindi ceelete kuba kumuyamaca?

¹³ Sa wakaambilawo kale kumuyamaca ayi kumunikile cishi coonse ca panshi, ee, kwaamba ayi kutandaanye bamucita shibi mumisena umo mobayuba?

¹⁴ Kuca kulabika patuba tulundu ashinyika ayi shiboneke anga njimikonya ya pacisani, ee, kuboneka patuba anga ngukalamatila wa keshibilo pabulongo.

¹⁵ Mumuni wa kumuyamaca ulakasha bamucita shibi kusebensa milimo yabo. Ncakwiila ulabashinkila kunyamuna maansaabo a bucayi.

¹⁶ “Sa wakayako kale kutuntupu twa mulweenge? Sa wakeendawo kale panshi peene palweenge?

¹⁷ Sa kuli wakakutondeshawo kale minjililo ya musena wa bafu? Sa mwakabonawo kale milyango ya musena wa munshinshe?

¹⁸ Sa webo ulishi cishi mbocibete kukomena? Ndwiite tunyumfwe na ulishishi shoonse ishi.

¹⁹ “Sa kuswita mumuni ulibweneeko? Sa kwikala munshinshe ulishiiko?

²⁰ Sa inga washipilushamo nkoshikala? Sa nshila iya kumisena ya nshisho uliibwene?

²¹ Ndishomete ayi ulyeelete kushishiba ceebo cishi ndicakalengwa kooli washalwa kale. Ncakwiila wekala myaaka iinji abuumbi pacishi ca panshi.

²² “Sa wakenjilamo kale mumaanda akusungilamo caandwa? Sa wakenjilamo kale mumaanda akusungilamo mfula ya mabwe?

²³ Shintu ishi ndashisungila ciindi ca mapensho aciindi cakulwana nkondo.

²⁴ Ino nshila iswitako lisuba ili kuli? Ino musena uko kuswita muuwo wa kwicwe uli kuli?

²⁵ Ino ngani wakakaba mufolo wakunokwiindamo mfula akubamba nshila mwakwiinda kubeka kwa mfula?

²⁶ Ino ngani ulengesha ayi mfula inooloka muluyanga kutekaali bantu?

²⁷ Ngani utilila cishi ciyumu nta citacite bantu kwaamba ayi mumene bwiisu amwalo?

²⁸ Sa mfula ilicite ishi? Ngani ushala mindoondo ya mume?

²⁹ Ino mpewo yakaswa mumala muli baani? Ino wakashala caandwa ngani?

³⁰ Ee, isho shilengesha maanshi kuyumabo anga ndibwe akulengesha maanshi peculu lya lweenge kwaanga.

³¹ “Sa webo inga wakonsha kwaangilila pomwi nyenyeenshi shiitwa ayi Puleiyadesi? Nabi kwaangulula ntambo sha nyenyeenshi shiitwa ayi Olyoni.

³² Sa inga weendelesha nyenyeenshi ciindi aciindi ca mwaaka? Sa inga weendelesha nyenyeenshi shiitwa ayi Beya abana bakwe?

³³ Sa milawo yeendelesha shakwiculu uliishi? Sa inga wacikonsha kushilengesha kweendelesha cishi ca panshi?

³⁴ “Sa webo inga woolobesha kumakumbi akwaalengesha kulosha mfula ikonsha kukulobya?

³⁵ Sa inga watuma kubeka kwa mfula ayi kucitike? Sa kubeka uko kulaboola kuli ndiwe akwaamba ayi, ‘Ndiswe pano?’

³⁶ Ngani wakapa busongo makumbi kulosha mfula mumisenamisena? Ngani wakapa maano shikunku kutondesha ayi mfuula itooloka?

³⁷ Ngani musongo weenga wakonsha kubelenga makumbi? Ngani weenga wasendeka nongo sha kwiculu ayi shipoomone mfula

³⁸ kwaamba ayi lufukutu lucatane akulengesha shibuumbuuswa kucatana?

³⁹ “Sa webo inga wayandila nkalamu shakulya akusanina twana twa njiyo tufwite nsala

⁴⁰ na katuyubite mushimfwengo sha ntuto nabi na katulete mushisakasaka?

⁴¹ Ngani uyandweeta cikwangala cakulya cakwe baana bakwe ndibalilila ndime neLesa akunooya bwiingooka ceebo ca nsala?