Jobo 37 - Baibo Busansulushi Bwa Libuku Ili

¹ “Kukalooka uku kulalengesha moyo wangu kuswa cakwaamba ayi ulaakulunkunta abuumbi.

² Ansha amukutike noonse kululuma kwa liswi lyakwe. Amukutike mankalunkalu aswa mumulomo wakwe.

³ Ulatuma kubeka kwakwe kucilingana liculu lyoonse. Ulakutuma kuswa kweela akweela lya cishi ca panshi.

⁴ Pesule ndikunyumfwika kululuma kwa liswi lyakwe akukalooka kwa liswi lyakwe licite bulemu. Muciindi ncemunya ico kubeka kulatolelela.

⁵ Ndushinisho Lesa ulaluluma aliswi liyoosha akucita shintu shinene abuumbi isho nshetwaalilwa kunyumfwisha.

⁶ Ulaambila caandwa ayi, ‘Lokela pacishi ca panshi.’ Ulaambila mfula yatepetepe ayi, ‘Komena.’

⁷ Ulalengesha bantu boonse kuleka kusebensa kwaamba ayi muntu woonse uyo ngwaakalenga eshibe milimo yakwe.

⁸ Banyama ba muluundu boonse balacica akuya mukuyuba. Balekalabo tontolo mushimfwengo shabo.

⁹ Cipuupu cinene cilaswita kumusena wa ncico, ayalo mpewo ilesa ceebo ca muuwo unene.

¹⁰ Muuya wakwe Lesa ulaleta caandwa, alimwi ulalengesha maanshi a mulweenge kwaangana.

¹¹ Ulalengesha makumbi kusula maanshi akulengesha kubeka mumakumbi ayo moonse.

¹² Lesa uleensha makumbi mbuli mbwaasuni. Ee, alaya bweenda mucishi ca panshi coonse kwaamba ayi acite shoonse nshaambilwa.

¹³ Lesa ulatuma mfula mukupa bantu mulandu nabi kutondesha nkumbu kuli mbabo.

¹⁴ “Jobo, ansha kutumanaako paniinibo, uyeeye milimo yakwe Lesa iyo ikankamika.

¹⁵ Sa ulishi Lesa mbwaaensha makumbi akulengesha mumakumbi umo kunoobeka?

¹⁶ Sa ulishi makumbi mbwaaseela mwiculu? Iyo njimilimo ikankamika ya wooyo ushi shintu shoonse.

¹⁷ Webo ulayuwabo kucikasaashi ca muuwo wa kumalenge,

¹⁸ ono sa inga wacikonsha kucafwa Lesa kuyala liculu cakwaamba ayi lyayuma nta mbuli cilola ca bulonse wakateshimishikwa?

¹⁹ “Tulwiiteeko mbotweelete kwaamba kuli Lesa ceebo swebo maano amana tatucitewo ashakwaamba shimwi.

²⁰ Sa ndyeelete kwaambila Lesa ayi ntooyanda kwaamba? Na ndacita boobo ingayi ndisunibo kunyonyoolwa.

²¹ “Ono taaku muntu weenga wakonsha kushinamisha kulisuba bulya mbolitowa mwiculu, muuwo na wapyangaamo makumbi oonse.

²² Lyalo citubilishi ciboneka anga ngugolodi cilaboneka kumatwa. Anu ubo Lesa mbwaatondesha bulemu bwakwe bukankamika.

²³ Ceebo ca nkusu shakwe shiinji swebo tulaalilwa kumusena pafwaafwi. Sombi lakwe uliluleme alimwi uloombolosha bantu cakutanyengelela.

²⁴ Anu nceceeco bantu boonse ncebamulemekela. Ono Lesa taabiki maano kubaabo baliyeeyela kuba basongo.”