Jobo 36 - Baibo Busansulushi Bwa Libuku Ili

¹ Lyalo Eliyu wakatolelela akwaamba ayi,

² “Nindileeko paniini ukutike nsheentokwaamba ceebo ndicite makani akukulwiita mukwiimikaninako Lesa.

³ Lushibo lwangu lulaswa palaamfu, aboobo ntoosebensesha lushibo lwangu kutondesha ayi Lesa Mulengi wangu uliluleme.

⁴ Nshintokwaambawo shabubeshi, sobwe. Webo shiba kwaamba ayi bulya uli amusongo mwiine mwiine.

⁵ “Lesa ngushinkusu, sombi taaku muntu ngwaanyansha. Taaku cintu nabi comwi ncaateshi.

⁶ Taaleki bamucita shibi ayi banoolibo boomi, sombi ulafuninina baabo balyatililwa.

⁷ Baluleme ulabalama ciindi coonse. Ulababika pashuuna sha bwaami akubasumpula ayi balemekwe kwalyoonse alyoonse.

⁸ Sombi na bantu baangwa ancetani akucatwa antaambo sha mapensho,

⁹ Lesa ulatondesha kubisha kwabo. Ee, kubatondesha shibiibi shabo shakulisumpula.

¹⁰ Ulabacalula matwi ayi banyumfwe kucenjesha kwakwe akubaambila ayi basanduke kuswa kushibiibi shabo.

¹¹ Na banyumfwila Lesa akumusebensela, balaakwikala muluumuno akuswitilila mubuumi bwabo boonse.

¹² Ono na babula kumunyumfwila, balaakufwa kumipeeni. Balaakufwabo cakubula alushibo.

¹³ “Bantu abo batashomi Lesa balatolelelabo kukalala. Tabaliliiwo Lesa ayi abacaafwe nabi kabali mumapensho.

¹⁴ Balafwabo kabacili banike, ee, kumana buumi bwabo cakufwambaana mukucita shilensha nsoni.

¹⁵ Nacibi boobo Lesa uleeisha bantu kwiinda mumapensho. Ulabaleka ayi bapenge abuumbi kwaamba ayi bacaluke meenso.

¹⁶ “Ono awebo Jobo, Lesa utookukusha mumapensho alimwi utoolengesha ayi ukale cakubula kulisukama. Utookutola kutebulu njoolitaawo iyo njaasusha shoolwe.

¹⁷ Sombi cino ciindi wapekwa mulandu weelete bamucita shibi. Koombolosha kululeme kwaselukila pali ndiwe.

¹⁸ Ucenjele ayi utacenjeekwi amakulo. Kutasoweka ceebo cakusuna buboni.

¹⁹ Sa utooyeeya ayi walila ndyeshi uswe mumapensho? Sa utooyeeya ayi nkusu shako inga shakucafwa?

²⁰ Utanoopetelelabo ayi kakushiya bwangu, ee, kutanoopetelelabo ciindi ico bantu ndibanyonyoolwa.

²¹ Cenjela kwaamba ayi utasandukili kushibiibi. Mapensho akupolela kwaamba ayi uswe muli nshisho.

²² “Yeeya nkusu kufula shicite Lesa. Anu ngani weenga weelana anguwe mukwiisha?

²³ Ngani weenga walwiita Lesa shakucita nabi kumwaambila ayi, ‘Mwebo mwabisha?’

²⁴ Lemeka milimo yakwe iyo bantu boonse njebalumbaisha kwiinda munyimbo.

²⁵ Bantu boonse bakabona milimo yakwe iyo, sombi cilabaalila kwiinyumfwisha.

²⁶ Tatukoonshi kunyumfwisha nkusu shiinji shakwe Lesa. Ayalo myaaka yakwe tatukoonshi kwiibelenga napaceyuubo.

²⁷ “NguLesa ukusha maanshi pacishi ca panshi akulengesha ayi abe mindoondo ya mfula.

²⁸ Ulalengesha makumbi kulosha mfula iyo ilokela pamuntu uli woonse.

²⁹ Taakuuwo muntu nabi womwi wishi ceensha makumbi, na kululuma kwa mfula mwiculu umo mwikala Lesa.

³⁰ Bona Lesa mbwaatuma kubeka kwa mfula mwiculu lyoonse cakwaamba ayi peela lweenge palacaalabo tuu.

³¹ Anu mukulosha mfula Lesa mwaalamina bantu akubapa shakulya shitalifulili.

³² Ulacata kalumba mumaansaakwe akukatondesha pamusena mpokeelete kulokela.

³³ Kululuma nkokwaambilisha ayi mfula ili pafwaafwi. Ashalo shifubwa shoonse nkoshishibila ayi itooyanda kuloka.