Jobo 35 - Baibo Busansulushi Bwa Libuku Ili

¹ Lyalo Eliyu wakatolelela akwaamba ayi,

² “Sa Jobo webo utooyeeya ayi ubo mbootokwaamba cililuleme? Sa webo ulyeelete kwaamba ayi, ‘Nebo ndiluleme pameenso akwe Lesa?’

³ Ono webo utoomwiipusha ayi, ‘Ino inga ndacanaamo mpindunshi? Anu nciinshi nceenga ndacanaamo nabi ndabula kubisha?’

⁴ “Ono ntookukumbula pantu pomwi ababyo mbooli abo.

⁵ Amulange mwiculu, mubone. Amubone pabetele makumbi kulaampa.

⁶ Na webo wabisha, ino Lesa cilamucisa buyani? Na shibiibi shako nshiinji, ino ico lakwe cilamucitilanshi?

⁷ Ono na uliluleme cilamucafwanshi lakwe? Nabi nciinshi ncaatambula kuswa kuli ndiwe?

⁸ Bubi bwako bulapenshabo muntu uli mbuli ndiwe. Abwalo bululami bwako bulacafwabo bantunyoko.

⁹ “Bantu na balyatililwa balatama. Balatamina umwi ayi abapulusheeko kubeshinkusu.

¹⁰ Sombi taakuuwo pakati kabo wiipusha ayi, ‘Uli kuli Lesa Mulengi wangu uyo unkalika caamba muciindi ca mapensho?

¹¹ Ulatwiisha maano kwiinda pabanyama ba mucishi, akutupa busongo bwiinda bayuni booluka.’

¹² Balalilila Lesa ayi abacaafwe, sombi lakwe taabakumbuli ceebo cakulisumpula kwa bamucita shibi.

¹³ Lesa taabiki maano kukusenga lucafwo kwabo kutaaku mbokubete. Ndushinisho Shinkusu shoonse taakutikiiwo mipailo yabo napaceyi.

¹⁴ Ino webo inga wakunyumfwila buyani na utokwaamba ayi toomuboniiwo? Mulandu wako ulishikite kale kuli nguwe, aboobo kolindililabo webo.

¹⁵ Peculu lya waawo utokwaamba ayi Lesa taapiiwo mulandu bamucita shibi. Utokwaamba ayi Lesa taabelengi shibiibi sha bantu.

¹⁶ Webo Jobo utokwaambabo shitacite ncito, utoolakookabo mukubula lushibo.”