Jobo 33 - Baibo Busansulushi Bwa Libuku Ili

¹ “Ano webo Jobo nyumfwa maswi angu, ukutike kabotu kabotu nsheentokwaamba.”

² Ono bulya ntooyanda kutalika kwaamba. Mulomo wangu walibambila kwaamba shili mumoyo wangu.

³ Maswi angu alaswa mumoyo ululeme. Mulomo wangu awalo ulaamba shalushinisho.

⁴ Mushimu wakwe Lesa ngowakanenga, ee, muuya wa Shinkusu shoonse ngoompa buumi.

⁵ “Nkumbule tunyumfwe, na inga wacikonsha. Ncakwiila bulya libambile kumpikisha.

⁶ Webo anebo tulyeelenebo pameenso akwe Lesa. Soonse sobilo twakabumbwabo kuswa kubulongo.

⁷ Aboobo taapu nceenga wanoondela nebo. Maswi angu taakoonshi kukucisa bunene kumoyo.

⁸ “Ndanyuumfwa shoonse nshewaamba. Ee, ndanyuumfwa maswi ako oonse akwaamba ayi,

⁹ ‘Nebo ndisalalite, nshicitewo cibiibi, tau. Ndiluleme, nshikwe kubishawo, sobwe.

¹⁰ Sombi Lesa wampa mulandu akunanga ayi ndi mulwani wakwe.

¹¹ Ulaŋanga ancetani kumyeendo. Nshila shangu shoonse ulashilangishisha abuumbi, mukulangishisha moonse moonja cilyata.’

¹² “Ono webo Jobo ntookwaambila ayi mumakani aya ulilubite ceebo Lesa ngumunene kwiinda muntu uli woonse.

¹³ Ceebonshi utootongookila Lesa mukumutongookila ayi taatookukumbula?

¹⁴ Lesa ulaambila munshila shipusenepusene, sombi muntu lakwe kaateshi kwaamba ayi wakumbula.

¹⁵ Na bantu kabalete mutulo mashiku, Lesa ulabandikaabo mushiloto amushili anga nshiloto.

¹⁶ Cimwi ciindi ulaamba kabalinyumfwila amatwi abo akubalengesha kuba aboowa ceebo cakucenjesha kwakwe.

¹⁷ Lesa ulabaambila ayi baswe mushibiibi shabo alimwi akubakasha ayi batanoolisumpula.

¹⁸ Ulacita boobo mukufuna buumi bwabo kuswa kumusena wa bafu, ncakwiila kufuna buumi bwabo ayi batacaikwi kumipeeni.

¹⁹ Muntu umwi ulalulamikwa ndyaaciswa akoona pabulo, ee, mukuba akucisa kutamaani mumafuwa akwe.

²⁰ Ncakwiila kumoyo wakwe kulashiyabo mbi kulya. Ee, nabi cakulya cibotu buyani, cilamufundoosha kumoyo.

²¹ Lyalo ulanyanga abuumbi cakucaalabo mafuwa yokolo.

²² Aboobo lufu lulamununkila, buumi bwakwe bulaya cisenena kumusena wa bafu.

²³ “Cimwi ciindi kulamupolela munjelo kwisa mukumucafwaako, ee, munjelo kuswa pamakoto amakoto a baanjelo bakwe Lesa, kwisa mukumwiibalushako shintu shiluleme nshaaelete kucita.

²⁴ Munjelo uyu ulamufwita nkumbu akwaamba ayi, ‘Amumulekelele kwaamba ayi atayi kumusena wa bafu mukwiinga kulubulwa kwakwe ndakucana.’

²⁵ Lyalo mubili wakwe ulaboolabo mbuli mwaana muniini. Ndushinisho ulaba ankusu akuyuma nta mbuli cikula bwangu.

²⁶ Lyalo ulapaila kuli Lesa akukumbulwa. Aboobo muntu uyo ulalumbaisha Lesa cakusangalala alakwe Lesa ulamuboosha mbwaakalinga pakataanshi.

²⁷ Pesule muntu uyu ndyaambila bantu ayi, ‘Nebo ndakabisha. Ndakaalilwa kukonkela shintu shiluleme. Sombi alakwe Lesa taakwe kumpa mulandu weelete.

²⁸ Wakafuna buumi bwangu ayi ntayi kumusena wa bafu. Wakandekelela kwaamba ayi noocibona mumuni.’

²⁹ “Ncakwiila Lesa ngwaacita sha mushobo uyu kumuntu. Nkokwaamba ayi ulacita boobo kumuntu mankanda aanji aanji.

³⁰ Ulapulusha buumi bwa muntu kwaamba ayi ekale kaasangalete mubuumi bwakwe.

³¹ “Bikaako maano Jobo, ukutike nsheshi ŋambe. Uumunebo tontolo, nebo ndanokwaamba.

³² Ono na ulicite cakwaamba, ucaambe ceebo ndisuni kwaamba ayi uliluleme.

³³ Sombi na taaku cakwaamba, uumunebo tontolo unkutike. Uumunebo kwaamba ayi nkwiishe shabusongo.”