Jobo 32 - Baibo Busansulushi Bwa Libuku Ili

Eliyu mbwaakaamba

¹ Mpeeke babye abo botatwe bakacileka kukumbula Jobo ceebo lakwe mwiine wakalinga kulibona ayi uliluleme.

² Sombi kwakalinga muntu umwi wakalinga kwiitwa ayi Eliyu mwanaakwe Balakelo mwine Busi wamucipani cakwe Lama, wakakalala abuumbi ndyaakanyumfwa Jobo mbwaakalinga kulilulamika akutongooka Lesa.

³ Wakakalalila ababye Jobo balya botatwe ceebo cakwaalilwa kukoma Jobo mukubandika, ico cakabonesha anga Lesa ncakwiila ulilubite.

⁴ Ciindi ndibakalinga kubandika aJobo, Eliyu lakwe wakalingabo tontolo ceebo boonse bakalinga bamanene pali nguwe.

⁵ Ono ndyaakabona ayi babye abo baalilwa kukoma Jobo mukubandika, wakakalala abuumbi.

⁶ Mpomunyaawo Eliyu mwanaakwe Balakelo mwine Busi wakaamba ayi, “Nebo ndi mwanike mukushalwa, mwebo muli bamanene. Aboobo ndalinga ndaloonda kumwaambila miyeeyo yangu.

⁷ Nebo ndalinga kuyeeya ayi bamanene mbobeelete kwaamba ceebo tulaamba ayi, ‘Munene mushiye kulubilo, sombi kumaano inga toomushiyi.’

⁸ Sombi ndabona ayi nguMushimu wakwe Lesa Shinkusu shoonse uyo useluka pabantu akubapa busongo.

⁹ Anu teshi bunene bulengesha muntu kuba abusongo. Ee, teshi bucembele bulengesha muntu kwishiba ciluleme.

¹⁰ Ono bulya amunkutike anebo. Ndisuni kumulwiita nsheentooyeeya.

¹¹ Ndalinga kumukutikabo ndimwalinga kwaamba. Ndalinga kumulindilila ndimwalinga kuyandoola maswi akubandika.

¹² “Ndamukutika kabotu kabotu, sombi ndabona kwaamba ayi noonse mwaalilwa. Taaku nabi womwi pakati kanu watondesha ayi shitokwaamba Jobo nshakubeca.

¹³ Ino inga mwalyaamba buyani ayi muli basongo? Anu mwebo mbomwaalilwa, Lesa mwiine ngooelete kumupikisha.

¹⁴ Jobo walinga kwaamba kuli ndimwe kuteshi kuli ndime, sobwe. Nakubi boobo nebo inga nshikumbuli mbuli mbomwalinga kumukumbula, tau.

¹⁵ “Jobo basankwa aba tabacite shakukukumbula. Ncakwiila maswi akwaamba abamanina.

¹⁶ Sa noocibalindilabo bulya mboboomwitebo? Apa mpobeemfwi tabacitewo maswi akwaamba.

¹⁷ Sobwe! Anebo ntookukumbula ono. Ee, ntookwaambila mboontooyeeya.

¹⁸ Ndicite maswi aanji ngoonsuni kwaamba, aboobo nshikoonshi kufwitabo mukati, sobwe.

¹⁹ Ceebo na mbule kwaamba, caamba cangu inga capasuka. Ndushinisho inga capasuka anga ninkomwe sha shipaya sha waini upya shafundililwa.

²⁰ Ndaalilwa kulicata, ndyeelete kwaamba ceebo na ŋambe ndyeshi njoye.

²¹ Taaku ngoontoosalulula pakati kanu nabi kulumbaisha umwi uli woonse cakubeca.

²² Nebo nshicishiiwo kulumbaisha muntu cakubeca. Na ndacita boobo, Mulengi wangu inga wampa mulandu cakufwambaana.