Jobo 31 - Baibo Busansulushi Bwa Libuku Ili

¹ “Ndakapangana cipangano ameenso angu ayi teshi nkalangilishewo mwanakashi calunkumbwa.

² Ino Lesa wakwiculu ulaakutucita buyani swebo? Ino ncilambunshi nceshi akatupe Shinkusu shoonse?

³ Sa bantu bataluleme tababoniiwo malwesa? Sa bamucita shibi tababoniiwo mapensho?

⁴ Lesa ulishibwene nshila shangu shoonse alimwi ulalangishisha nyendelo shangu shoonse.

⁵ “Na ndakeenda munshila shibiibi nabi na ndakacenjeekawo kale bantu bamwi,

⁶ Lesa ampiime pashipimo shalushinisho, utoocana kwaamba ayi nshicitewo mulandu.

⁷ Na ndakapambukawo kuswa munshila iluleme, na meenso angu akantola kushibiibi, nabi na maansaangu akacatawo shibiibi,

⁸ ngayi shakulya nshendakashanga ashikalikwe abantu bamwi nabi shishango shangu shoonse ashikanyonyoolwebo.

⁹ “Na moyo wangu wakakumbwawo kale mukamweensuma akuya mukulindilila kaanjubite kumulyango waŋanda yakwe,

¹⁰ ingayi mukaangu aakatelekele musankwa umwi akuuya mukukumanaakwe pabulo bwakwe.

¹¹ Ncakwiila uyo weenga wacita cibiibi ca mushobo uyo ulyeelete kupekwa mulandu wakucaikwa.

¹² Cibiibi ico cili anga ngumulilo unyonyoola shoonse, ndushinisho mulilo uyo ukonsha kunyonyoola shoonse nsheencite.

¹³ “Na ndakakaka kukutika musebenshi wangu musankwa nabi mwanakashi ciindi ndyaakalinga kunoontongookila,

¹⁴ ino nendakashika buyani pameenso akwe Lesa? Anu nendakaamba buyani pakwisa mukuŋombolosha?

¹⁵ Sa uyu wakamumba mulifumo lya bama teshi ngowakababumba abalo? Sa teshi mulengi womwi wakatupanga mumafumo abamanyinawesu?

¹⁶ “Nshindakalinga kwiima bakandu nabi kuleka bamukalubinje kuya bupenga,

¹⁷ nabi kunoolyabo shilyo neenka akuleka bana banshiwa koona nsala.

¹⁸ Sombi ndakalinga kubalama mbuli ishiwabo kuswabo kubunyamata bwangu akucafwa bamukalubinje kwabuumi bwangu boonse.

¹⁹ “Ndakalinga kucita na ndacaana upengete, utacitewo maali akuulaamo shakufwala,

²⁰ ndakalinga kumupa shakufwala sha booya bwa mbelele ee, booya bwakaswa mulitanga lyangu nemwiine. Lyalo alakwe wakalinga kunumbaisha amoyo wakwe woonse.

²¹ “Na ndakanyamuna lyaansa lyangu kubekesha mulandu mwanaanshiwa mukwishiba kwaamba ayi inga ndamukoma munkuta,

²² ingayi lyaansa lyangu alisutuke, ee, lisutukilebo mwiine molinunganina amubili.

²³ Ceebo Lesa ndamuloonda abuumbi, inga nshicicitiwo ca mushobo uyo.

²⁴ “Nshindakalinga kushomawo mububile ee, nshindakalinga kucinka manungo mugolodi wiine wiine.

²⁵ Nshikwe kusangalalilawo mububile buunji, ee, mububile ubo mbondakacana amaansaangu.

²⁶ Nshikwe kulambilawo lisuba mubulemu bwa ndilyo, nabi kulemeka mweenshi mububotu bwa nguwo.

²⁷ Nshikwe kulengeshekwawo kupambuka kwaamba ayi nshilemeke, ee, kushilemeka kwiinda mukufyonta lyaansa lyangu.

²⁸ Shoonse ishi nshibiibi muntu nshaaelete kupetwawo mulandu unene mukwiinga kucita boobo, ingayi wakaka Lesa Shinkusu shoonse.

²⁹ “Nshikwe kusangalalilawo mumapensho a balwani bangu. Ndushinisho nshikwe kukondwaawo ndibakapolelwa makatasho.

³⁰ Nshikwe kusuminisha mulomo wangu kubisha kwiinda mukushingana balwani bangu, sobwe.

³¹ Basebenshi bangu balanumbaisha ayi, ‘Anu ngani utana kulyaawo cakulya cakwe?’

³² Taaku mweensu ngondakaleka ayi oone pansengwe ceebo ndakalinga shikutambula beensu ciindi cili coonse.

³³ “Bantu bamwi balashisa shibiibi shabo, sombi nebo nshikwe kushisawo shibiibi shangu, sobwe.

³⁴ Nshikwe kuloondawo shakalinga kwaamba bantu nabi kukutumanaawo akulicalila muŋanda mukwiinga wakuloonda kushibulukwa kuli mbabo.

³⁵ “Sa taaku weshi akutikewo nsheentokwaamba? Ntoolumbila kwaamba ayi maswi angu aya oonse ngalushinisho. Lesa Shinkusu shoonse aanshinine. Mulwani wangu aalembe milandu njaatoompa.

³⁶ Ndushinisho milandu iyo naakwiinga ndeefwala pacifushi, ee, naakwiinga ndeefwala kumutwi anga ngumushini.

³⁷ Naakwiinga ndaambila Lesa shintu shoonse nshendakacita akuya mukubapolela mbuli mwanaamwaami kunembo lyakwe.

³⁸ “Na muunda uyo ngoondima ndakanyongomonabo muntu umwi,

³⁹ na ndalya shakulya isho shimenaamo akuleka mwine muunda kaakolwa nsala,

⁴⁰ ingayi amumene myuumfwa kuteshi witi alimwi mumene nsaku kuteshi bale.” Maswi akwe Jobo mpwaaela apa.