Jobo 30 - Baibo Busansulushi Bwa Libuku Ili

¹ Sombi sunu banike kuli ndime batoonseka. Bamaishiwabo tebakalinga kweelelwa akucafwa bakabwa bangu kweembela mbelele.

² Nshindakalinga kucite abo ncito ceebo bakalinga bamana nkusu.

³ Bakalinga bantu bakandu abuumbi alimwi beshi nsala. Bakalinga kunootafunabo miyanda iyumu ya muluundu mashiku ceebo ca nsala.

⁴ Bakalinga kunoosepabo shisepo sha muluundu, akunoolya miyanda ya bafuute itacitewo amise.

⁵ Bakalinga kunootandwa kubantunyinaabo, ee, kunooya coolobesha pakubatanda bweenka mbuli butandwa beepi.

⁶ Aboobo bakalinga kunookalabo mutulonga tuyuminite, amushimfwengo sha mabwe kutulundu.

⁷ Bakalinga kunoolilabo anga mbanyama ba muluundu uko nkobakalinga kunoobungene mumakupu.

⁸ Lwakalinga ndusubo lutaaku mbolubete. Ndushinisho bakalinga bantu batanditwe mucishi.

⁹ “Ono sunu bana babo batalika kuncobola munyimbo shabo. Ncakwiila ndababo pakulendekela mumibandi yabo.

¹⁰ Balimpatite alimwi balekala kulaale andime. Tacibalenshiiwo abunyengele kunshipila mate kumeenso.

¹¹ Ceebo cakwaamba ayi Lesa wanyaya nkusu akumbombya, bangalookila akunoocitabo shili shoonse nshebasuni kumeenso angu.

¹² Likoto lya bantu abo litoombukila ciindi coonse. Ndushinisho bambukila akuya cintandaanya. Bamambila nshila shakunyonyweetaamo.

¹³ Bashinkila nshila yangu yakulobokelaamo. Baswitilila mumiyeeyo yabo yakunyonyoola kwakubula nabi womwi ubakashaako.

¹⁴ Baliindilitebo kwinjila mushilyango sha lilinga lyangu akumfuumukila kwisa mukundyatooka mumatongo.

¹⁵ Paceebo ceeci boowa bwancata cine, bulemu bwangu bwakayabo anga bwatolwa amuuwo. Kuswitilila kwangu kwashiminganabo anga ndikumbi.

¹⁶ “Ono bulya ndipafwaafwi akufwa alimwi kupenga kwangu takutoomana.

¹⁷ Mafuwa angu atoopwayooka mashiku oonse, ashalo shitoocisa tashitooboolawo pesule, sobwe.

¹⁸ Lesa wancata munteneshi ya cakufwala cangu cankusu akumpombaanya cakumfundilisha.

¹⁹ Wansowela panshi mumatipa. Ndababo anga ndanana lusuko nabi milota.

²⁰ “NobaLesa, ntoomulilila, sombi mwebo tamutoonkumbulaawo. Ndeemikana kumukombelela, sombi mwebo mulanangabo caminsuula.

²¹ Mulanangilishabo cabukali akumpensha alyaansa lyanu lya nkusu.

²² Mulanyamuna akapupuulwa kanu, mulanyempoosha mucipuupu canu cibiibi.

²³ Ndeshiba kale ayi mutoontola kulufu. Ndushinisho mutoontola kuya bantu boonse.

²⁴ “Ceebonshi mutoopensha muntu wakanyonyoolwa kale, utakoonshi kucitawo cimwi, sombi kulililabo nkumbu mumapensho akwe?

²⁵ Sa nshindakalinga kulililako bakandu? Sa nshindakalinga kuungumana ceebo ca babo bali mumapensho?

²⁶ Ndakalinga kulangila shibotu, sombi kwakalinga kwisa bubi. Ndakalinga kulangoola mumuni, sombi kwakalinga kwisa munshinshe.

²⁷ Moyo wangu walungula abuumbi kukulisukama akushitoocisa. Ncakwiila walungula ceebo cakupenga bushiku abushiku.

²⁸ Ndeendabo acikanda cishiya, sombi kuteshi kulisuba. Ndeemikana palikoto lya bantu akulilila lucafwo pakati kabo.

²⁹ Ndababo mbuli mwaaba ubwabo eenka nabi mbuli mwiina ulilililabo mwine eenka.

³⁰ Cikanda cangu cashiyabo mbi, awalo mubili wangu utoopya abuumbi kucimpwita.

³¹ Kalumbu kangu kaba kakulishishako nyimbo sha buumba awalo mutoolilo wangu utokwiimbabo nyimbo sha malilo.