Jobo 3 - Baibo Busansulushi Bwa Libuku Ili

Jobo mbwaakatongookela Lesa

¹ Nshiku isho ndishakeenda, Jobo wakaamba akushingana bushiku mbwaakashalwa.

² Wakaamba ayi,

³ “Abulobelele bushiku mbondakashalilwaawo. Aalobelele mashiku ngondakamitilwaamo.

⁴ NobaLesa, amusandule bushiku ubo kuba munshinshe, mutakabwiibalukiwo tubili alimwi mutasuminishi mumuni kuba pali mbubo.

⁵ Amubulengeshe kuba bushiku bwa munshinshe ushiya mbi. Mubufwekeleshe amakumbi alemu. Ncakwiila akubule mumuni.

⁶ Mashiku ayo akafwekeleshekwe amunshinshe ulemu. Mutabuleeki ayi bubelengelwe kumwi anshiiku sha mumwaaka, nabi kubelengelwa kumwi anshiiku sha mumyeenshi.

⁷ Ee, mashiku ayo akukabule mwaana umitwa. Akukabule kunyumfwikawo liswi lyakusangalala muli ngawo.

⁸ Abo bacishi kushingana, abashingane bushiku ubo, ee, babushingane abo bacishi kweendelesha shinshimwe.

⁹ Ntanda itakabaliiwo pabushiku ubo, ncakwiila bushiku ubo butakaciiwo.

¹⁰ Aashinganwe mashiku alya ceebo cakutankasha kushalwa. Ee, aashinganwe ceebo cakutankasha kushalwa ayi ntaboni mapensho aya.

¹¹ “Anu nshina kufwitanshibo ndindakalinga kushalwa? Nshina kufwitanshi ndindakalinga kuswa mumala muli bama?

¹² Ceebonshi bama bakamfukata pamaansaabo? Ceebonshi bakanjamwisha kunkolo shabo?

¹³ Nendakasansulwa, naakwiinga sunu nshintoopenga. Ncakwiila naakwiinga ndiletebo tontolo

¹⁴ pantu pomwi abamaami alimwi abeshikubapandako maano abo bakaliyakila maanda a bwaami ayo bulya akaba matongo.

¹⁵ Ee, naakwiinga ndilete abaleli abo bakalinga kucite golodi alimwi abo bakalinga basusha maandaabo asilifa.

¹⁶ Ceebonshi nshikwe kubikwa mbuli kafunga, ee, mbuli kateta utana kubonawo kale lisuba?

¹⁷ Kushuumbwe bantu babiibi tabapenshi babyaabo alimwi uko bantu balemenetwe nkobookeshesha.

¹⁸ Bakaili abalo nkobacana luumuno uko alimwi nkobatanyumfwi liswi lya shintolongo wabo.

¹⁹ Bantu bapukite abatashibikitwe boonse nkobabete. Musha uko ulyaangulukite kumwaami wakwe.

²⁰ “Ceebonshi mumuni wa buumi ulashikila abali mumapensho? Ceebonshi buumi bulapekwa abaabo bali mubuumba?

²¹ Lufu talushiki kuli baabo balulila, ee, baluyandoola mbuli buboni bushisitwe.

²² Balasangalala abuumbi ee, balasangalala na bashika mucuumbwe.

²³ Ceebonshi buumi bwakapekwa kubaabo bacite nshila ishisitwe, abo Lesa mbwaakashingulusha lilinga lya mapensho ayi batakoonshi kubona nshila iyo?

²⁴ Minsonshi yaba ncecakulya cangu, akwalo kutongela kwangu takumaani.

²⁵ Shintu nsheenoonda shanshikila, shilya shintilimusha shambonekela.

²⁶ Nshookeshiiwo alimwi nshikaliwo muluumuno, sombibo mapensho akulisukama lyoonse.”