Jobo 29 - Baibo Busansulushi Bwa Libuku Ili

Jobo mbwaakatolelela kwaamba

¹ Jobo wakatolelela kwaamba ayi,

² “Ndayeeya myeenshi ilya yakeenda kale. Ndayeeya nshiku shilya Lesa nshaakalinga kundama.

³ Muciindi ico lilampi lyakwe lyakalinga kumunikila. Wakalinga kumunikila ndindakalinga kweenda mumunshinshe.

⁴ Ndushinisho ciindi ico ndakalinga kuswitilila. Bushicibusa bwakwe Lesa bwakalinga kupa coolwe ŋanda yangu.

⁵ Munshiku isho Shinkusu shoonse wakalinga anebo, abalo bana bangu bakalingaawo.

⁶ Ŋombe ampongo shangu shakalinga kukamika abuumbi. Shisamu shangu sha maolifi shakalinga kukomena kabotu mubulongo bwa mabwe.

⁷ “Ndindakalinga kuya kumwinjililo wa ndabala inene mukwikala pacuuna cangu pakati ka bamalobama,

⁸ bacikula bwangu basankwa bakalinga kusoonoka munshila na bambonabo. Abalo bamacembele bakalinga kunokwiimikana mukundemeka.

⁹ Bamatanjilili bakalinga kucileka kwaamba. Ndushinisho bakalinga kufweka pamilomo amaansaabo.

¹⁰ Bacinenenene boonse bakalinga kuumunabo tontolo ayalo milaka yabo yakalinga kunoocatilila kwiculu mumulomo.

¹¹ “Uyo woonse wakalinga kunyumfwa mpooŋambila, wakalinga kwaamba shibotu pali ndime. Uyo woonse wakalinga kumbona, wakalinga kunumbaisha

¹² ceebo ndakalinga kufuna bakandu abo bakalinga kusenga lucafwo alimwi ndakalinga kucafwa bana banshiwa batakalinga kucite shikubacafwa.

¹³ Ndakalinga kulumbaishikwa kubantu bali pafwaafwi kufwa. Ndakalinga kucafwa abamukalubinje ayi banookala kabasangalete.

¹⁴ Ndakalinga kucita shintu shiluleme ciindi coonse. Ndushinisho milimo yangu yoonse yakalinga ibotu.

¹⁵ Ndakalinga meenso a mpofu alimwi ndakalinga myeendo ya balema.

¹⁶ Ndakalinga mbuli mushali kubakandu, alimwi ndakalinga kucafwa beensu mumakatasho abo.

¹⁷ Ndakalinga kunyonyoola nkusu sha bamucita shibi akubalengesha kuleka baabo mbobakalinga kupensha.

¹⁸ “Ciindi coonse ndakalinga kuyeeya ayi ndaakwikala nshiku shiinji. Ndakalinga kuyeeya ayi ndaakufwitabo muŋanda yangu muluumuno.

¹⁹ Ndakalinga mbuli cisamu cicite miyanda ili mumaanshi ayalo misampi ya ncico keetontola kumume mashiku.

²⁰ Ndakalinga kulumbaishikwa ciindi coonse ashalo nkusu shangu tashikwe kumanaawo napaceyi.

²¹ Pakupanda maano, bantu bakalinga kukutumanabo. Bakalinga kukutikisha kwaamba ayi banyumfwe nshentokwaamba.

²² Na ndamanisha kwaamba, taaku ncebakalinga kwiilikaawo ceebo maswi angu akalinga kubenjila kabotu kabotu.

²³ Bakalinga kulangila ndime bweenka mbuli balimi mbobalangila mfula. Bakalinga kutambula maswi angu bweenka bulongo mbobutambula mfula ya cilimo.

²⁴ Na batyongooka, ndakalinga kubasekela, aboobo bakalinga kuyuminishikwa ceebo ca cisangalashi cangu.

²⁵ Ndakalinga anga ngumwaami kuli mbabo mukubatondesha nshila nshebeelete kwiindaamo. Ndakalinga kubatanjilila anga ngumwaami abashilumamba bakwe akubatola kuya mukuboombulusha kumapensho abo.