Jobo 28 - Baibo Busansulushi Bwa Libuku Ili

Kulumbaisha busongo

¹ “Kuli mukoti uko kukabwa silifa amusena golodi nkooboteshelwa.

² Mabwe a nshimbi alakabwa panshi mubulongo, awalo mukuba ulasungululwa kuswa kumabwe.

³ Bantu balanyamuna mimuni kuya mumunshinshe. Balayandoola mabwe kuunshi lya bulongo kwiine akuya mukwaakaba kwiine kushiya mbi.

⁴ Balakaba mikoti kulaale akwikalila bantu, ee, kumusena uko bantu nkobateendi. Balasebensa beenkabo mumikoti ilaamfu kabaleleela kuntambo.

⁵ Bulongo ubo bukusha shakulya, panshi lya mbubo bulapasoolwa kumulilo.

⁶ Mweenka mumabwe amubulongo mulaswa mabwe amakwebo a safaya, amwalo mulusuko lwa mbubo mulacanika golodi.

⁷ Taaku cikupwi ushi nshila ishi shiya mumikoti iyo alimwi taaku likubi lyakashibonaawo.

⁸ Taaku munyama mukali wiinda nshila isho. Taaku nkalamu nabi yomwi iinda muli nshisho.

⁹ “Bantu balapwayoola mabwe ayumu nta. Balakaba mutulundu kushika apanshi mpotweela.

¹⁰ Pakuya bukaba tushila twakwiindamo mumyaandami, balaya bucana aamwi mabwe amakwebo.

¹¹ Balalangoola kumatalikilo a milonga akuleta patuba shintu shiyubite.

¹² “Sombi nkuli kweenga kwacanwa busongo? Anu nkuli lushibo nkweenga lwacanikwa?

¹³ Busongo tabucanikwi kubantu alimwi taaku ukonsha kwishiba makwebo a mbubo.

¹⁴ Maanshi alaamfu atokwaamba ayi, ‘Tabubete muli ndiswe, sobwe.’ Lweenge lutokwaamba ayi, ‘Tabubete muli ndiswe, sobwe.’

¹⁵ Busongo tabukoonshi kuulwaawo agolodi wiine wiine, sobwe. Awalo mweelo wa mbubo tookoonshi kupimwa musilifa.

¹⁶ Tabukoonshi kweelana amweelo wa golodi wiindaawo kubota wa kuOfi, nabi mweelo wa mabwe amakwebo eetwa ayi onikisi amabwe a safaya.

¹⁷ Tabukoonshi kweelana agolodi nabi magilasi amakwebo. Tabukoonshi kuulwa ashakulibotesha sha golodi.

¹⁸ Busongo buleendaawo pamweelo wa mabwe eetwa ayi kolali nabi a jasipa. Ncakwiila mweelo wa mbubo ulasotoka pawa mabwe alubi.

¹⁹ Mabwe amakwebo eetwa ayi topasi a kuKushi mukulukulu inga teelaniiwo amweelo wa busongo ubo. Tabukoonshi kweelana nabibo amweelo wa golodi wiine wiine.

²⁰ “Ono nkuli kweenga kwacanwa busongo? Anu nkuli lushibo nkweenga lwacanikwa?

²¹ Taaku cilengwa ciyoya cili coonse cibubwene, ncakwiila abalo bayuni booluka tababubweneewo.

²² Lufu akunyonyooka ashalo shilaamba ayi, ‘Aswebo twakanyumfwabo maŋwiŋwi.’

²³ “Lesa eenka ngooshi nshila iya kubusongo, lakwe eenka ngooshiiko uko nkobucanika

²⁴ ceebo lakwe ulabona akweela cishi alimwi akubona shoonse shili kuunshi lya liculu.

²⁵ Lesa ndyaakapa nkusu kumuuwo akupima mweelete kweela lweenge,

²⁶ Lesa ndyaakaamba ciindi cakulokelawo mfula akubamba nshila mwakwiinda makumbi a mfula,

²⁷ nceciindi ncaakabona busongo akubweelesha. Lyalo wakapima mweelo wa mbubo akubwaamba ayi mbubotu.

²⁸ “Mpeeke Lesa wakaambila muntu ayi, ‘Kuloonda Mwaami Lesa mbobusongo. Kufutatila bubi ndolushibo lwiine lwiine.’ ”