Jobo 27 - Baibo Busansulushi Bwa Libuku Ili

Jobo mbwaakatolelela kwaamba

¹ Lyalo Jobo wakatolelela akwaamba ayi,

² “Ono bweenka mbocibete lushinisho ayi Lesa ngumuumi, ee, Lesa uyo wakaka kuŋombolosha cabululami, Shinkusu shoonse uyo wampa mpensha bulasha,

³ kulilabo na noociyoya, ndushinisho kulilabo Lesa kaacimpa buumi,

⁴ mulomo wangu uyu teshi ukaambewo shibiibi alimwi mulaka wangu uyu teshi ukaambewo shabubeshi.

⁵ Teshi nkasumineewo ayi mwebo namata muliluleme, sobwe. Ndaakunokwaambabo ayi nshicite mulandu kushikila nkafwe.

⁶ Ndanokwiimfwibo pakwaamba ayi ndiluleme, cakutalyatukaawo, sobwe. Nshicitewo kutonsha mucikani ici, napaceyi.

⁷ “Balwani bangu abapekwe mulandu kweelana anga mbamucita shibi. Abo bampatite abapekwe mulandu anga mbantu bataluleme.

⁸ Ino nkulangilanshi kucite bantu batashomi muli Lesa na bacaikwa? Ee, nkulangilanshi nkobacite ciindi Lesa ndyaabasesa buumi bwabo?

⁹ Sa Lesa ulanyumfwa kulila kwabo ciindi ndibapolelwa mapensho?

¹⁰ Sa balaakusangalalila muli Shinkusu shoonse? Sa balaakunoolilila Lesa ciindi coonse?

¹¹ “Ndaakumwiisha nkusu shakwe Lesa mboshibete. Teshi nkamushiseewo nshila sha Shinkusu shoonse.

¹² Ncakwiila mwebo noonse makani aya mulyaabwene. Ono ceebonshi mutokwaamba makani atacite ncito?

¹³ “Ono mboobulya Lesa mbwaapa mulandu mucita shibi. Nceeci cipansha ca beshilunkutwe ncebatambula kuli Shinkusu shoonse.

¹⁴ Nabi bana babo basankwa bafule buyani lufu lwabo ndwakucaikwa kunkondo. Bana babo teshi bakanoolya cakukuta, napaceyi.

¹⁵ Bamwi beshi bakacaaleewo balaakumana kufwa kumwaalu. Ncakwiila abamukalubinje babo teshi bakabalileewo.

¹⁶ Nabi babunjike silifa uunji mbuli museese akuba ashakufwala shiinji cakutabelengwa,

¹⁷ ndushinisho shakufwala isho shilaakufwalwa abantu baluleme. Bantu batacite milandu bamwi balaakwaabana silifa wakwe.

¹⁸ Ŋanda njaayaka ili mbuli yakwe shimutangatanga, nabi mbuli katungu ka shikulindilila kumyuunda.

¹⁹ Uloona kaali mubile, sombi lilaba linkanda lyakweelaako. Ncakwiila na wapapuka ulacana palinga buboni bwakwe ngumusenabo.

²⁰ Lyalo boowa bulashikilabo kumucata bweenka bupulumuka maanshi asefuka. Ndushinisho ulaloonda cakwaamba ayi ulatolekwabo kucipuupu cinene mashiku.

²¹ Cipuupu ciswa kwicwe cilaakumupyanga, kumupyanga kuswa paŋanda yakwe.

²² Cipuupu ici cilaakumupupila cakubula nkumbu. Cilaakumupupila cankusu nabi akeeleshe kucica.

²³ Akunoocica calo cilaakupuupa abuumbi akupanga coongo, kumukonga cakumutupula pamulyango wakwe.