Jobo 26 - Baibo Busansulushi Bwa Libuku Ili

Jobo mbwaakakumbula

¹ Lyalo Jobo wakakumbula ayi,

² “Wakacafwa buyani nebo nemuntu utacite nkusu? Nducafwonshi ndowakapa nemuntu upengete ulefukite?

³ Wampaanda maano abotu nebo nemuntu utacite maano. Waaba lushibo lwako lukankamika kuli ndime nemuluya.

⁴ Ngani wakucafwa kwaamba maswi aya? Ngani wakulengesha kwaamba mushobo uyu?

⁵ “Myuuya ya bafu ilatutuma kuboowa, ee, ilatutuma mumaanshi kuunshi lya cishi uko nkweebete.

⁶ Cishi ca bafu cilibo bwaashi kuli Lesa. Musena wakunyonyookela tooyubiteewo kuli nguwe.

⁷ Wakafungulula liculu pamusena wakalinga bwaashi akwaanjika cishi ca panshi patakalingawo cintu.

⁸ Ulafungeela maanshi mumakumbi akwe, aalo taapasukiiwo nabi lilemenwe buyani.

⁹ Ulafwekelesha mweenshi uli kumunshinshe, ncakwiila ulaufwekelesha amakumbi akwe.

¹⁰ Wakatala manyinsa palweenge, mukupansaanya mumuni amunshinshe.

¹¹ Macinko acatilila liculu alatenkaana ceebo ca bukali bwakwe Lesa.

¹² Wakootobeka lweenge munkusu shakwe akunyonyoola shinshimwe wiitwa ayi Laabu ceebo ca busongo bwakwe.

¹³ Muuya wakwe ngowakalengesha ayi liculu litube. Lyaansa lyakwe ndilyakoma mulongolo wa mulweenge wakalinga kucica.

¹⁴ Sombi iyi njimilimo yakwe ya peculubo. Muli njiyo, swebo tulanyumfwabo kutepeta kwakwe. Anu ngani weenga weshiba mankalunkalu atondesha nkusu shakwe?”