Jobo 24 - Baibo Busansulushi Bwa Libuku Ili

¹ “Ceebonshi Shinkusu shoonse ncaatana kubambila ciindi cakoombolosha? Ceebonshi abo bamusebensela ncebalangilila bushiku ubo kwakubula kububona?

² Bantu balasenya manyinsa kukomenya shishi shabo. Baleembela shifubwa nshebakeepa.

³ Balabwesa mbongolo sha bana banshiwa. Balacata musune wa mukalubinje kushikila walipila nkongole njaacite.

⁴ Balashindika bakandu ayi baswe mumikwakwa. Ico cilabalengesha kuya mukuyuba nabi kabatasuni.

⁵ “Lyalo bakandu balaya ciingailabo muluyanga anga nimbongolo sha muluundu. Baleengooka muluyanga kwaamba ayi bayandoole shakulya. Ncakwiila muluyanga momuswa shakulya sha bana babo.

⁶ Balaya citebula myuunda ya bantu bamwi akuya bubweselela minyansa icaala mumyuunda ya bamucita shibi.

⁷ Balabuceshabo kabalete butuntu, kubula acakulifweka ciindi ca mpewo.

⁸ Balalokwa mfula iswita kutulundu akulityanikisha mumabwe ayi bayuunse.

⁹ “Bamucita shibi balakusha bakateta batacite baishi kunkolo akubatola ceebo ca nkongole shitana kulipilwa.

¹⁰ Ceebo cakubula shakufwala, bakandu baleendabo matakosha. Balekalabo ansala nakubi kwaamba ayi balatebula witi wa bamwi.

¹¹ Baleenga mafuta kuswa kumaolifi. Balatyana minyansa akupanga waini, sombi balo balekalabo anyotwa.

¹² Mumandabala anene mulanyumfwika kutongela kwa bantu batooyanda kufwa, akulila lucafwo kwa baabo bacisikwa, sombi Lesa taakumbuliiwo kusenga kwabo, sobwe.

¹³ “Kuli bamwi bakaka mumuni, abo batooshiiwo napaceyi alimwi batasuni kuya nkoobatanjilila.

¹⁴ Na lisuba lyepila mucayi ulanyamuka akuya mukucaya bakandu. Lyalo mumunshinshe wa mashiku ulaya mukwiipa.

¹⁵ Shibulale ulalindila muntungulya. Ulayeeya ayi, ‘Taakuuwo weshi amboone.’ Ncakwiila ulashisa ciwa cakwe.

¹⁶ Mashiku beepi ndibapwaya maanda. Ono malumwi balalicalila ceebo tabasuni kucita shintu mumumuni.

¹⁷ Na kwashiya balo ndyebuca, tabaloondiiwo ashiyoosha mumunshinshe.

¹⁸ “Mucita shibi ulatolwa amukuuku wa maanshi. Musena wakwe mucishi wakashinganwa aLesa cakwaamba ayi taakoonshi kuya mukusebensa mumuunda wakwe wa minyansa.

¹⁹ Bweenka mbuli lumwi acilanga mboshisungulula caandwa, mbweeke ubo cuumbwe mbocisompola mucita shibi.

²⁰ Abalo banyina balamulubaako. Mapila aalo alamulya cakutamushiyaako. Ulanyonyoolwabo bweenka bunyonyoolwa cisamu cawa.

²¹ Ishi shilacitika ceebo wakapensha ŋumba akutanyumfwilawo nkumbu mukalubinje.

²² Lesa ulanyonyoola shinkusu ankusu shakwe. Ulatata, sombi taacite buumi bwakuya palaamfu.

²³ Ulamulekabo ayi ekala cakuliiba, sombi nshila shakwe shoonse ulishibwene.

²⁴ Ulaswitilila kwaciindi ciniinibo, lyalo ulayumabo anga ninsaku yasakwitwa. Ulaceyeshekwa akufwa mbuli bantu boonse. Ncakwiila ulatimboolwabo mbuli likunka lya maila.

²⁵ Ngani weenga waamba ayi ndabeeca? Ngani weenga waamba ayi maswi angu ngabubeshi?”