Jobo 21 - Baibo Busansulushi Bwa Libuku Ili

Jobo mbwaakakumbula

¹ Lyalo Jobo wakakumbula ayi,

² “Amunyumfwishe maswi ngweshi ŋambe. Kunyumfwa uko akube nkokuumbulusha nkweshi mumpe.

³ Mumpe ciindi cakwaamba ayi ŋambe. Ono ndamanisha kwaamba inga mwatolelela kuncelebula.

⁴ “Sa nebo ntoopikishanya amuntubo? Ndishi ncentoobulila kukalikila moyo nemwiine.

⁵ Taanguna amunangilishe, mubone mboontooboneka. Sa te mutoocatabo pamilomo ceebo cakukankamana?

⁶ Ndeenjeeya shintu ishi shakancitikila ndaloonda, ndushinisho mubili wangu ulatutuma abuumbi.

⁷ “Ceebonshi bamucita shibi balatolelela kuba abuumi? Ceebonshi balo balacembela akuswitilila mushintu shoonse?

⁸ Balaba abaana abamashikulu, balaba boomi kushikila bashikulu babo bakula.

⁹ Mumaandaabo mulaba luumuno, taaku ncebaloonda. Musako wakwe Lesa wa mapensho tooboomiiwo.

¹⁰ Bacende babo baliciteko kushasha. Mpwishi shabo ashalo shilashala cakutasansulawo, sobwe.

¹¹ Bana babo balacicacica akusekana anga mbana ba mbelele. Ee, bana babo baniininiini balashanashana palubansa.

¹² Baleemba nyimbo akulisha misebe atulumbu akusangalala kunyimbo shiimbwa amitoolilo.

¹³ Balekala cakuliiba alimwi balafwa muluumuno.

¹⁴ Nakubi boobo balaambila Lesa ayi, ‘Tuleke sobeene. Tatucite ciindi cakwishiba nshila shako.

¹⁵ Anu Shinkusu shoonse ngani kwaamba ayi katumusebensela? Ino nimpindunshi ili mukupaila kuli nguwe?’

¹⁶ Balalinyumfwa ayi balaswitilila kwiinda munkusu shabo beene. Sombi nebo nshisumini mukuyeeya kwabo kwa mushobo uyu.

¹⁷ “Sombi ngamankanda ongaye lilampi lya buumi bwabo ndyelishimishikwa? Ino ngamankanda ongaye mapensho ndyeesa pali mbabo? Mankanda ongaye Lesa ngaakabapa mulandu mubukali bwakwe?

¹⁸ Ngamankanda ongaye ndibapepelushikwa kumuuwo anga mbwiisu? Ee, ngamankanda ongaye ndibaba anga mbuungu buya acipuupu cinene?

¹⁹ “Ono mulaamba ayi, ‘Lesa ulapa mulandu mwaana ceebo ca shibiibi sha mushali wakwe.’ Sobwe, aape mulandu bamucita shibi beene kwaamba ayi beshibe ayi nceebo ca shibiibi shabo.

²⁰ Mucita shibi alibonene mwiine kunyonyooka kwakwe. Ee, mwiine aalinyumfwile bukali bwakwe Lesa Shinkusu shoonse.

²¹ Sa lakwe uliciteewo acakulisukama pabamuŋanda yakwe bacaala na myaaka ya buumi bwakwe yamana?

²² “Sa kuli weenga weeisha Lesa busongo, ceebo lakwe ngowoombolosha bamaami balemekwa?

²³ Amubone bamwi bantu balafwa kabacilinyumfwite. Balafwabo kabasangalete alimwi cakubula kulisukama.

²⁴ Ayalo mibili yabo ilaba kayiinite. Ncakwiila kabacilyabo kabotu.

²⁵ Sombi bamwi balafwa kaboongumene abuumbi mumyoyo, kufwabo kabatana kulyaawo shibotu mubuumi bwabo.

²⁶ Sombi boonse aba balafwa akoona mubulongo. Ndushinisho boonse balalitwa pantu pomwi kumapila.

²⁷ “Ndishi kabotu kabotu nshemutooyeeya, ee, miyeeyo yanu ibiibi pali ndime ndiishi.

²⁸ Mulaamba ayi, ‘Ino ŋanda ya muntu ulemekwa ulya ili kuli? Ili kuli ŋanda mwakalinga kwikala mucita shibi?’

²⁹ Sa tamwiipushi beshikweenda? Sa te mulanyumfwila nshebamulwiita?

³⁰ Balaamba ayi pabushiku bwa bukali bwakwe Lesa mucita shibi ngoopulushikwa. Ee, ayi mucita shibi lakwe ngoofunwa mubushiku bwa bukali ubu.

³¹ Ngani weenga wapa mucita shibi mulandu? Ngani weenga wamupilushisha shibiibi nshaacita?

³² Atembwa kutolwa kucuumbwe, cuumbwe cakwe cilalamwa abeshikulindilila.

³³ Bantu bamushindikila kucuumbwe mbaanji abuumbi. Ncakwiila uloona tontolo mucuumbwe cakwe.

³⁴ Ono mwebo, mutookakatila kuŋumbulusha amaswi abuluya. Taaku ncemutokwaamba apa, sombi mbubeshibo bweenka.”