Jobo 20 - Baibo Busansulushi Bwa Libuku Ili

Sofa mbwaakakumbula

¹ Lyalo Sofa mwine Naama wakakumbula ayi,

² “Webo Jobo wankalasha, ncecanengesha ayi mfwambaane kukumbula.

³ Nshewaamba ngumucobwe, sombi ndishi mbweshi nkukumbule.

⁴ “Ncakwiila ulishi ayi kuswa kalekale ee, muntu ndyaakabikwabo pacishi ca panshi,

⁵ kusangalala kwa mucita shibi nkwaciindi ciniinibo. Kukondwa kwa muntu utashomi Lesa nkuce.

⁶ Nabi kulisumpula kwakwe kushike kwiculu, cakwaamba ayi amutwi wakwe washika mumakumbi,

⁷ ulaakupepelushikwa bweenka mbuli lusuko. Abo bamwishi balaakunoomusula ayi, ‘Ino wakaya kuli?’

⁸ Ulaakushiminganabo bweenka mbuli ciloto Ee, kushiminganabo bweenka mbuli cili anga nciloto ca mashiku. Ulaakushimingana cakutabonwaawo tubili.

⁹ Liinso ilyo lyakamubona teshi likamubonewo tubili. Ncakwiila teshi akaboolewo kuŋanda yakwe alimwi.

¹⁰ Bana bakwe balaakupilusha shakabwesekwa kubakandu. Ee, balaakupilusha isho muntu uyo nshaakabwesa kuli mbabo.

¹¹ Mubili wakwe wakalinga kucite nkusu shabucikula bwangu, sombi nkusu shakwe isho shilaakuloba pantu pomwi anguwe mubulongo.

¹² “Nabi bubi bulicite mise mukanwa lyakwe alimwi ulabushisa kuunshi lya mulaka wakwe,

¹³ nabi kaatasuni kubushipa, kaabulamabo mumulomo wakwe,

¹⁴ mulifumo lyakwe cakulya ico cilasasa. Cilasanduka akuba anga mbuyoka bwa nsoka muli nguwe.

¹⁵ Lyalo ulaakuluka bubile mbwaakamina. Lesa ngweshi akalengeshe ayi aluke bubile ubo mbwaakeepa.

¹⁶ Mucita shibi nshaamina shili anga mbuyoka bwa nsoka. Bulaakumucaya anga ngumuntu walumwa nsoka ikali.

¹⁷ Teshi akekale buumi bulaamfu ayi akabone milonga ya mafuta a olifi, nabi kubona tulonga uto tukunka mukupa abuuci.

¹⁸ Teshi akacibonewo cakusangalala mububile mbwaakayuwila. Ndushinisho teshi akakondweleemo amumpindu ya makwebo akwe.

¹⁹ Ceebo wakapensha akulekelesha bakandu, akubwesa maanda ngaatakwe kuyaka.

²⁰ Ncakwiila bulyabi bwakwe tabukwe kumana, taakoonshi kulipulusha mwiine kwiinda mububoni bwakwe.

²¹ Wakalinga kulya buboni bwakwe cakumaninisha. Aboobo buboni bwakwe boonse bwamana cakufwambaana.

²² Kaacibilite, mapensho alaakumupolela. Ncakwiila buumba buyoosha bulaakumusakata.

²³ Amumuleeke akute mbuli mbwaasuni. Lesa ulaakumuloshesha bukali bwakwe.

²⁴ Ono nabi wacica mupeeni wa ceela, mufwi wa bulonse ulaakumuyasa.

²⁵ Ulapulinkana akuswita kwisule, mutwi wa nguwe ubembela kooyasite kulini. Lyalo boowa bulamucata abuumbi.

²⁶ Shoonse nshaacite shilanyonyoolwa. Mulilo utanyashikwi amuntu ulamutenta, ulatenta ashintu shoonse shili muŋanda yakwe.

²⁷ Liculu lilayubulula shibiibi shakwe. Acalo cishi ca panshi cilapa bukamboni bwakumushinina.

²⁸ Ŋanda yakwe ilaakutolekwa amukuuku wa maanshi aanji pabushiku bwa bukali bwakwe Lesa.

²⁹ Shamushobo uyu Lesa nshaapa kubamucita shibi. Ncakwiila ici ncecipansha Lesa ncaabila bataluleme.”