Jobo 2 - Baibo Busansulushi Bwa Libuku Ili

Satana mbwaakasunka Jobo alimwi

¹ Bumwi bushiku baanjelo ndibakesa mukulitondesha pameenso a Mwaami Lesa alimwi, alakwe Satana wakesaabo.

² Mpeeke Mwaami Lesa wakeepusha Satana ayi, “Ino waswita kuli?” Satana wakakumbula ayi, “Ndalinga kuya ceendeenda mucishi ca panshi coonse.”

³ Mpomunyaawo Mwaami Lesa wakeepusha Satana ayi, “Sa wabonaawo musebenshi wangu Jobo? Ngumuntu utacite kampenda, ululeme, undemeka alimwi ushomeka kuli ndime. Nakubi kwaamba ayi wakanyungoola ayi nkuleeke umupeenshe pataapu ceebo, Jobo ucishomekabo bweenka mbuli kataanshi.”

⁴ Satana wakakumbula ayi, “Muntu ulakonsha kupa shintu shoonse nshaacite kwiinda kufwa.

⁵ Amweeleshe kucisa mubili wakwe, mulinyumfwile mbweshi amushingane.”

⁶ Mpeeke Mwaami Lesa wakaambila Satana ayi, “Ncibotu, ndamubika mumaansaako, sombi kubuumi bwakwe kutacataako.”

⁷ Mpomunyaawo Satana wakaswaawo pameenso a Mwaami Lesa akuya mukupa Jobo shilonda mubili woonse.

⁸ Mpeeke Jobo wakaya mukukalila kuntantaala akubwesa cikaye cakulikwanyishako shilonda.

⁹ Mpomunyaawo mukaakwe wakamwambila ayi, “Sa abobulya mucishomekabo? Amushinganebo Lesa, mufwe.”

¹⁰ Sombi Jobo wakamukumbula ayi, “Utokwaambabo anga ngumuluya. Sa ulisuni ayi katutambulabo shibotu sheenka kuswa kuMwaami Lesa kuleka mapensho?” Mumapensho aya oonse, Jobo taakwe kubishaawo kwiinda mumaswi ngaakaamba.

Babye Jobo mbobakamufwakashila

¹¹ Ono babye Jobo botatwe, Elifasi mwine Temani, Biludadi mwine Shuwa aSofa mwine Naama, ndibakanyumfwa mapensho oonse a mubyaabo, bakanyumfwana ayi baye bakamuumbulushe.

¹² Kabacili palaale bakabona Jobo, sombi tabakwe kumwishibaawo. Ono ndibakamwishiba bakatalika kulila cakooloma, bakakwamoona shakufwala shabo ceebo ca buumba akulitukweeta bulongo kumitwi.

¹³ Mpeeke bakekala panshi anguwe kwanshiku shosanwe ashobilo. Taaku nabi womwi wakalinga kubandika ceebo bakabona kukomena kwa mapensho ngaakalingaamo.