Jobo 19 - Baibo Busansulushi Bwa Libuku Ili

Jobo mbwaakakumbula

¹ Lyalo Jobo wakakumbula ayi,

² “Anu mutoocileka lili kuncisa kumoyo? Mutoocileka lili kuntyoloola amaswi anu?

³ Mutooncobola ciindi aciindi cakubulaawo acoopa nkoye mbuli mbomutoonsebaanya.

⁴ Ono nabi cilaamba ayi ndakabisha, ino mwebo ico inga camupensha buyani?

⁵ Mwebo mutooyeeya ayi muli kabotu kwiinda ndime akulanga mapensho angu ayi ncecitondesho cakwaamba ayi ndicite mulandu.

⁶ Sa mwebo tamubwene kwaamba ayi nguLesa wacita shintu ishi? NguLesa wanteya koose kwaamba ayi ncatwe.

⁷ “Ndalilishaanya pabukali bwakwe ubu, sombi taaku nabi womwi utoonkutika. Ncakwiila taakuuwo utookutika kulila kwangu pakoombolosha kululeme.

⁸ Lesa washinkila nshila yangu, aboobo ntokwaalilwa kwiinda. Washisa nshila yangu mumunshinshe.

⁹ Buboni bwangu boonse wabulobya alimwi wancaya aliina.

¹⁰ Wanguma mumbasu shoonse. Kulangila kwangu wamana kukunyonyoola akunshiyabo anga ncisamu cashulwa.

¹¹ Lesa utoosuntabo kubukali pali ndime. Ncakwiila nebo ulambelengela pabalwani bakwe.

¹² Watuma likoto lyakwe lya bashilumamba kuli ndime. Bayaka mukuti wakutantaawo akumbika pakati ayi bandwaane. Ncakwiila bayaka misumba kushinguluka ŋanda yangu.

¹³ “Lesa walengesha bamakwesu kuba baswamashi kuli ndime. Ncakwiila beensuma boonse baba beensu abuumbi kuli ndime.

¹⁴ Beshikamukowa wangu bampalangana. Abalo beensuma banduba.

¹⁵ Abo mbondakalinga kutamba kwisa kuŋanda yangu abasebenshi bangu banakashi boonse balambona anga ndi mweensu. Ee, balananga anga ndi muswamashi.

¹⁶ Musebenshi wangu na ndamwiita, taakumbuli nabi ndamukombelela buyani.

¹⁷ Muuya wangu bakaangu balaucimwa. Ncakwiila ntoolensha bunya akubamakwesu.

¹⁸ Bulya nabibo mwanike muniini ulanshibuluka. Kulilabo na ndabonekela balangwela akunseka.

¹⁹ Boonse beensuma beene beene balanaama. Ncakwiila abo boonse mboonsunishi bangalookila.

²⁰ Ndamana cakucaalabo mafuwa yokolo. Amwalo mukanwa mwacaalabo shishiili.

²¹ “Mwebo muli beensuma, ndapapaata amunyumfwileko nkumbu. Lesa wantula lyaansa lyakwe lya mapensho.

²² Ino amwebo mutoontandaanyishilanshi mbweeke butoocita Lesa? Mwampeensha paboneka we!

²³ “Inga cabota abuumbi na umwi weebaluka maswi angu. Ee, na waalemba mulibuku.

²⁴ Ncakwiila inga cabota na waalemba pamuntomfwe acakulembesha ca ceela, nabi kwaatala pamabwe ayi abe amuyayaya!

²⁵ Sombi ndishi kwaamba ayi Mupulushi wangu ngumuumi alimwi ayi kumeelelesho ulaakwiimikana pacishi ca panshi.

²⁶ Ono nabi cikanda cangu camana kunyonyoolwa, sombi mumubili wangu uyu weenka ndaakubona Lesa.

²⁷ Nebo nemwiine ndaakumubona a meenso angu, nebo, kuteshi umwi, sobwe. Awalo moyo wangu mbootookumbwaako kumubona!

²⁸ “Ono mwebo nomwaamba ayi, ‘Anu inga twamupensha buyani bulya mulandu mboobete wakwe mwiine?’

²⁹ Mwebo nobeene amulisukame amupeeni ee, mupeeni uleta bukali bwakwe Lesa pabamucita shibi kwaamba ayi mwishibe ayi nkwaali umwi woombolosha.”