Jobo 18 - Baibo Busansulushi Bwa Libuku Ili

Biludadi mbwaakakumbula

¹ Lyalo Biludadi mwine Shuwa wakakumbula ayi,

² “Jobo, sa inga tooumuniiko kwaamba ayi ukutike aswebo twaambeeko?

³ Ceebonshi utooyeeya ayi swebo tuli anga niŋombe? Ceebonshi utoobona ayi swebo tuli baluya?

⁴ Ono webo nootolityoloola kubukali bwako, sa cishi ca panshi cilyeelete kucaala matongo ceebo ca bukali bwako? Sa mwaandami ulyeelete kuswa pamusena wa nguwo?

⁵ “Ono mumuni wa buumi bwa mucita shibi walo cipangano nkushimishikwa. Ncakwiila teshi ukabonekeewo tubili koonyaka.

⁶ Mumuni uli muŋanda yakwe ulaakuba munshinshe. Lilampi lili muliimfwa lyakwe lilaakushimika.

⁷ “Wakalinga muyumubo, sombi bulya ulatalantanta. Walikoba amiyeeyo yakwe mwiine.

⁸ Wenjila mubukonde, lyalo myeendo yakwe yacatwa.

⁹ Tushindi twakwe twacatwa mukoose. Ncakwiila akalo kamucatisha abuumbi.

¹⁰ Bamuteya cilindi panshi, ee, munshila yakwe babikaamo koose.

¹¹ “Shiyoosha shitoomulindila kumbasu shoonse. Shilamukonkela kuli koonse nkweenga waya.

¹² Wakalinga mubile ono utoofwabo nsala. Kunyonyooka kulibo muliimfwa lyakwe.

¹³ Bulwashi bucaya bwacata mubili wakwe woonse. Bwalengesha mikono amyeendo yakwe kubola.

¹⁴ Watupulwa muŋanda mwaakalinga kwikala kwakubula cakulisukama. Watolanishikwa kuya mukukumana amwaami Lufu.

¹⁵ Muŋanda yakwe taamu caakwe ciciliimo. Mulasanseelwa salufa kucaya tulongolo tuleta malwashi.

¹⁶ Miyanda ya buumi bwakwe ilaakuyuma. Ayalo misampi ilaakunyana akuyuma.

¹⁷ Impuwo yakwe kumishaabo akumisena ya kulaale yamana. Taaku muntu nabi womwi ucimwiibaluka.

¹⁸ Ulaakukushikwa mucishi ca boomi, ee, kukushikwa mumumuni akutolwa mumunshinshe.

¹⁹ Taaku wamulunyungu lwakwe wacaalaawo nabi womwi Ncakwiila taaku nabi womwi wakapuluka.

²⁰ Kuswa kumbo tibili akwicwe boonse beshi bakanyumfwe shamapensho akamucitikila, balaakukankamana akunootutumabo kuboowa.

²¹ Ono ayo ngomapensho apolela bamucita shibi. Ee, ngaapolela bantu batashomi muli Lesa.”