Jobo 16 - Baibo Busansulushi Bwa Libuku Ili

Jobo mbwaakakumbula

¹ Mpeeke Jobo wakakumbula ayi,

² “Shintu sha mushobo uyu ndakashinyumfwaawo kale. Mwebo kuumbulusha kwanu kulibo anga ngamaswi a bucayi.

³ Sa munanoocitekobo kwaamba cakutacilekaawo? Sa anu mwebo mulacita kamwaambabo kushikila makani anu amanaamo mukanwa?

⁴ Nemwalinga ndime, nebo kaandi ndimwe, naakwiinga anebo ndalinga kwaamba shoonse nshemutokwaamba. Ncakwiila naakwiinga ntoopukumunabo mutwi pali ndimwe akwaamba maswi aanji akumushinina.

⁵ Sombi naakwiinga ndamwaambila maswi akumuyumyayumya. Nendamwaambila maswi akonsha kumuumbulusha.

⁶ “Ono nabi ŋambe, taakuuwo citoocitika. Akwalo kuumunabo ngumushobo womwi, mapensho angu taatoomana.

⁷ NobaLesa mwanguma mumanungo. Ee, mwasuminisha bamuŋanda yangu kucaikwa.

⁸ Amubone mwaŋaanga akuba balwani bangu. Mbulya ndacaalabo mafuwa mucipaya. Ici caba bukamboni bwakwaamba ayi ndicite mulandu.

⁹ “Lesa wankwamoona mubukali bwakwe alimwi utoolumanyaako ameeno. Ee, mulwani wangu ulansaamwita meenso.

¹⁰ Bantu balanshibulukabo akungwela. Balambunganina akunguma mpaka pameenso.

¹¹ Lesa wangaba mumaansa a bamucita shibi. Ncakwiila wangaba munkusu sha bantu bataluleme.

¹² Ndakalinga muluumuno, sombi wakandyatoola. Wakancata panshingo akunguma. Wakangalula kuba cintu cakwiilawo lweela

¹³ akungwaala mifwi kuswa kumbasu shoonse, ee, mifwi iyo itoonjasa akuncisa. Utoocita boobo cakutanyumfwilaawo nkumbu.

¹⁴ Ucicitekobo kuncisa cakutacilekaawo bweenka bucita shilumamba weendilisha kukalala.

¹⁵ “Ntoolila akufwala masaka kutondesha buumba. Ndatondesha kulibombya kwiinda mukwikala mulusuko.

¹⁶ Ciwa cangu casalala kukulila. Meenso angu aalo alishimbite cakucalika.

¹⁷ Sombi nshiciteewo mulandu wakucisa bantu alimwi mupailo wangu kuli Lesa ngwa lushinisho.

¹⁸ “Ono ocishi ca panshi utashisi shibiibi nshendacitilwa. Akwalo kulila kwangu kwakoombolosha kululeme kakuyabo kunembo.

¹⁹ Kwiculu ndishi kwaamba ayi nkwaali kamboni wangu, ee, shikunjimikaninaako nkwaali uko.

²⁰ Beensuma batoonshibuluka. Sombi nebo ntoolilila kuli Lesa

²¹ Ndisuni muntu weshi ampapaatileeko kuli Lesa bweenka muntu mbwaapapaatilako mubye.

²² “Ndacaashabo myaaka iniini kwaamba ayi ntole nshila itaboolwa.