Jobo 15 - Baibo Busansulushi Bwa Libuku Ili

Elifasi mbwaakakumbula

¹ Mpeeke Elifasi mwine Temani wakakumbula ayi,

² “Sa muntu musongo alakwe ulaambabo ashintu shitacite kumutwi? Sa te mweelanabo aususha muuwo mulifumo akuyeeya ayi wakuta?

³ Sa ulaambabo caambaambe pakupikishanya? Sa ulaambabo shintu shitacite mpindu?

⁴ Ono webo kuloonda Lesa wakubika palubasu, akwalo kupaila kuli Lesa koonse wakushinkilisha.

⁵ Cibiibi cako ncakwiila ceeisha mulomo wako shakwaamba. Mulaka wako wababo anga ngwa muntu ucenjete cabusulwe.

⁶ Ono mulomo wako, kuteshi waangu, utookupa mulandu. Ncakwiila myaambo yako webo omwiine itookushinina.

⁷ “Sa utooyeeya ayi ndiwe wakataanguna kushalwa? Sa webo uli mutaanshi kulengwa tulundu katutana?

⁸ Sa miyeeyo Lesa njaabambite kucita webo wakeenyumfwa pakwiibamba? Sa utooyeeya ayi ndiwebo wakapekwa busongo boonse pakati ka bantu?

⁹ Anu nciinshi webo ncooshi ico swebo ncetuteshi? Ndushibonshi ndoocite ulo swebo ndotutacite?

¹⁰ Bacite mfwi abacembele bali kulubasu lwesu, ncakwiila abo bakashalwa baiso kabatana.

¹¹ Sa kuumusha kwakwe Lesa nkotutoocita kwakuceyela? Sa maswi akwe Lesa abombu ngotutokwaamba ngwaakuceyela?

¹² Ino nceebonshi moyo wako utookubeca? Ino meenso ako asaamukilanshi kubukali?

¹³ Sa nkwaamba ayi ukalalile Lesa kwiinda mukwaamba maswi a mushobo uyo ngootokwaamba?

¹⁴ “Anu muntu nciinshi kwaamba ayi abule kampenda? Anu muntu uyo ushalwabo kumwanakashi nciinshi ayi alulame?

¹⁵ Lesa taashomi baanjelo bakwe bali kwiculu. Ono na abaanjelo tabasalalite kuli nguwe,

¹⁶ ino mbuyani kumuntu ulensha nsoni alimwi shikubisha? Ndushinisho kumuntu kubisha kulibo anga nkunwa maanshi!

¹⁷ “Kutika kuli ndime nkusansulwite mbocibete, ee, nkulwiite shintu nshindakabona ameenso angu.

¹⁸ Shintu isho mbasongo bakandwiitaako, abalo bakashiiya kubamashali babo bakulukulu. Ncakwiila taaku ncebakashisaawo nabi comwi.

¹⁹ Mucishi cabo temwakalinga baswamashi. Tekwakalinga muntu ukonsha kubakusha kuli Lesa.

²⁰ “Mucita shibi ulapenga mubuumi bwakwe boonse, alimwi uyo ulyatilila bamwi ulapenga mumyaaka yakwe yoonse.

²¹ Matwi akwe ngeshi kunyumfwabo maswi ayoosha. Peenka mpaabonena ayi waba muluumuno, bapambi nkumutuula.

²² Taakoonshi kuloboka kuswa kumunshinshe wa lufu uyo. Ncakwiila kumwi kulubasu mupeeni utoomulindila ayi umucaaye.

²³ Makubi atoolindililabo kulya mutuntu wakwe, alakwe mwiine ulishi kwaamba ayi lufu lwakwe luli pafwaafwi.

²⁴ Buumba alimwi amapensho shamulenga boowa. Shilamukonga anga ngumwaami shinkusu ulibambite kulwana.

²⁵ Ono ico ncecicitika kumuntu ufungila Lesa likoofi. Ee, uyo ulisumpula pameenso akwe Lesa Shinkusu shoonse

²⁶ akwiimika liyawo lyakwe lyabushicimpamya kuli Lesa.

²⁷ “Nakubi kwaamba ayi ngumubile ucite ciwa ciinite alimwi ucite bukome bwiinite abuumbi,

²⁸ ulaakunookala mumandabala akanyonyoolwa mumaanda a baabo bakacica akuloboka. Aalo maanda ayo alaakunyonyoolwa munkondo.

²⁹ Bubile bwakwe bulaakumana cakufwambaana. Taaku buboni bwakwe bweshi bukanooliiwo. Ayalo myuunda yakwe yoonse ilaakuloba pacishi ca panshi.

³⁰ Munshinshe wa lufu teshi akoociceewo. Ulaakuba anga ncisamu ico capitwa misampi. Lyalo cipuupu cinene ciswa kuli Lesa cilaakumupepelusha akumutola.

³¹ Ono atalibeeci kwiinda mukucinka manungo mushintu shitacite ncito mukwiinga taaku cilambu nceshi akatambule nabi comwi.

³² Ciindi cakwe kacitana kushikila ulaakutambula cilambu cakwe coonse. Ayalo misampi yakwe ilaakuyuma nta.

³³ Lyalo ulaakuba anga ngumunyansa uyo ulosha shisepo sha nguwo kashitana kupya. Ee, ulaakuba anga ncisamu ca maolifi ico cilosha maluba a ncico.

³⁴ Batashomi Lesa teshi bakabeewo abamulunyungu. Mulilo ulaakutenta maanda a baabo batambula makulo.

³⁵ Bantu aba balamita mapensho akutumbuka bubi. Ncakwiila myoyo yabo iliswitebo bubeshi lyoonse.”