Jobo 14 - Baibo Busansulushi Bwa Libuku Ili

¹ “Anu muntu ushalwa kumwanakashi taaku mbwaabete. Ulicitebo nshiku shiniini shiswite mapensho.

² Ulakula anga ndiluba linefuma kwaciindi ciniini akunyana. Ee, buumi bwakwe bulibo anga ncimfule ico cishiminganashiminganabo.

³ NobaLesa, sa mwebo mulalanga muntu uli mbuli wooyo? Sa mulamuleta akunembo lyanu ayi mumoomboloshe?

⁴ Anu ngani ukonsha kukusha cintu cisalalite kuswa mucintu citasalalite? Ncakwiila taaku nabi womwi weenga wacita boobo.

⁵ Inshiku sha buumi bwa muntu shilibambitwe kale. Ee, myeenshi ya kweendela buumi kwakwe ilibelengetwe. Mwakabika kale pakweela apo mpwaatakoonshi kwiindilisha.

⁶ Anu amukusheeko meenso anu akumulekabo mwiine kwaamba ayi asangalale ndyaacisebensa mbuli shincito.

⁷ “Cisamu calo mbubo cilicite kulangila mukwiinga na catemwa cilasonsa alimwi. Lyalo nsonseela shiswa shileendaawo kushimpa.

⁸ Ee, nabi miyanda ya ncico yacembela alimwi acalo cishiki cayuma mubulongo,

⁹ kukumanabo akatonto ka maanshi cilasonsa anga ndicamenabo.

¹⁰ Sombi muntu ulafwa woona mubulongo. Na watula kale moyo, camana uyo weenda.

¹¹ Ncakwiila bweenka maanshi mbwaamana mucishiba, nabi na bweenka maanshi mbwaayuminina mumulonga,

¹² mbweeke ubo muntu alakwe mbwaaona cakutabuka. Ee, teshi akashinshimukeewo kushikila liculu likamaane. Ndushinisho uloonesha cakutaswaawo mutulo twakwe.

¹³ “Ono nicabota abuumbi nimwanshisa mumusena wa bafu, kunshisa kushikila bukali bwanu bukeende, lyalo inga mwabamba ciindi cakunjibaluka.

¹⁴ Na muntu wafwa, sa inga wayoya alimwi? Munshiku shoonse sha mulimo wangu uyumu ndanoolindilila kushikila nkaswe mumapensho.

¹⁵ Lyalo mwaakunjita, nebo ndaakukumbula. Mulaakusangalala pali ndime necilengwa canu.

¹⁶ Paciindi ico mulaakulangisha nyendelo shangu shoonse, nakubi boobo teshi mukanoolangoola milandu yangu, sobwe.

¹⁷ Ceebo shilubo shangu mulaakushilekelela. Ncakwiila shibiibi shangu mulaakushifwekelesha.

¹⁸ “Ono bweenka kalundu mbokamana kusekemuka alimwi bweenka mwaandami mbookulumuka,

¹⁹ bweenka maanshi mbwaatolelela lubwelubwe, alimwi bweenka mukuuku mbootolelela bulongo, mbweeke ubo amwebo mbomumanisha kulangila kwa muntu.

²⁰ Muntu mwebo mulamukomenabo limwi tibili weenda woona. Ciwa cakwe mulacisandula akumutandila kutaaku buumi.

²¹ Na mwanaakwe musankwa wapekwa bulemu, lakwe taaku kwishiba. Na bana bakwe abo basebaanishikwa, lakwe taaku kubonaako.

²² Ncakwiila ngushikunyumfwabo shitoocisa mumubili wakwe. Aboobo ngushikunoolilililabo palwaakwe mwiine.”