Jobo 13 - Baibo Busansulushi Bwa Libuku Ili

¹ “Ndalibonena ameenso angu shintu shoonse ishi, alimwi ndalinyumfwila amatwi angu akushinyumfwisha.

² Isho nshemushi anebo ndishishi, nshibete panshi kuli ndimwe napaceyuubo.

³ Sombi ndisunishi kwaambila kuli Shinkusu shoonse, ncakwiila kukumbushanya aLesa pacikani cangu ici.

⁴ Ono mwebo mutoobotesha makani kwiinda mububeshi. Mwebo noonse mulibo bashiliki batakoonshi kushilika muntu.

⁵ Anu nimwalinga kuumwitebo, naakwiinga mwaboneka basongo!

⁶ Ono amukutike makani ngooncite. Ee, mukutike nceeco nceshi ŋambe.

⁷ Sa ncakwiila mutokwaambililako Lesa mushabubeshi shanu? Sa ndushinisho mutokwiimikanina Lesa mukucenjeeka kwanu?

⁸ Sa mutootondesha kasalulushi kuli nguwe? Sa mutokwiimikaninako Lesa mulandu wakwe?

⁹ Sa na Lesa wamulangalanga kabotu inga taamucanini cilubo? Sa mutooyeeya ayi inga mwamwiinda kumaano bwiindwa bantubo?

¹⁰ Ncakwiila ulakonsha kumukalalila, na mwacanikwa ayi mubushishi kuli mbomucitila kasalulushi.

¹¹ Lyalo bulemu bwakwe bulaakumulengesha boowa. Ncakwiila mulaakuba aboowa ceebo ca nguwe.

¹² Tushimpi twanu tatucite ncito bweenka mbuli milota, awalo mubandi wanu toocafwi ceebo ngwa bulongo bulongo.

¹³ “Ono amuumunebo mundeeke ŋambe, na kuli ceshi cicitike acicitikebo.

¹⁴ Ndilibambite kuliwaala mumeeno ankalamu, ncakwiila kubika buumi bwangu mumaansaangu.

¹⁵ Nabi ayi Lesa utooncaya, ndanoocinkite manungo muli nguwe. Sombi ndaakutondesha pameenso akwe ayi nshicite mulandu mucikani cangu ici.

¹⁶ Mpashi munshila iyo nebo ndaakupulushikwa ceebo taaku mucita shibi wiimikana pameenso akwe Lesa.

¹⁷ Amukutike kabotu kumaswi angu, ee, munyumfwishishe nceshi ŋambe.

¹⁸ Ono ndilibambite kwaamba cikani cangu ceebo ndishi kwaamba ayi nshicite mulandu.

¹⁹ Anu ngani ukonsha kwiimikana anebo akunshinina? Na nkwaali ingayi ncibotu ngumunebo akufwa.

²⁰ “Ono nobaLesa, amunsuminishe shintu shobilo, lyalo teshi nkayubeewo kuswa kuli ndimwe napaceyi.

²¹ Amukushe lyaansa lyanu lya mapensho pali ndime. Amucileeke kunengesha boowa mukucita shiyoosha pali ndime.

²² Lyalo mukanjiite, anebo ndaakukumbula, nabi kundeka ayi ŋambe mwebo mukakumbule.

²³ Ino shilubo ashibiibi shangu shili shongaye? Amuntondeshe shilubo ashibiibi nshindakacita.

²⁴ Ino ceebonshi mwamfutatila? Ceebonshi mwananga ayi ndi mulwani wanu?

²⁵ Sa inga kamupensha ndime nemuntu ulibo anga nditewu kuuba? Ee, mutoolwana muntu ulibo anga mbuungu buululukabo kumuuwo.

²⁶ Muleebaluka milandu iindaawo kubica pali ndime, kuswabo kumilandu njendakacita kaancili mwanike.

²⁷ Mulaŋanga ancetani kumyeendo. Nshila shangu shoonse mulashilangisha abuumbi mukulangishisha moonse moonja cilyata.

²⁸ Ono mbulya ntoosekemukabo anga ncisamu cabola, ncakwiila kubabo anga ncakufwala calikwa tubambala.