Jobo 10 - Baibo Busansulushi Bwa Libuku Ili

¹ “Buumi bwangu ndabucimwa, cakwaamba ayi ndanootongooka abuumbi. Ndanokwaambabo ceebo cakucisa kwa moyo wangu.

² NobaLesa mutampi mulandu, sobwe. Sombi amundwiite ncendamubishisha.

³ Sa cilamukonda kundyatilila akunsebaanya nemulimo wa maansaanu, sombi kamukondwa milimo ya bamucita shibi?

⁴ Sa mulicite meenso mbuli a muntu? Sa mulabona shintu mbuli mbotushibona?

⁵ Sa nshiku sha buumi bwanu shilyeelene asha muntu? Sa myaaka yanu ayalo ili bweenka mbuli ya muntu?

⁶ Ceebonshi mutoolangoola shibiibi shangu? Ee, ceebonshi mutooya buyandoola cilubo cangu comwi acomwi?

⁷ Mulishi kwaamba ayi nshicite mulandu alimwi taaku ukonsha kumfuna kuswa mumaansaanu.

⁸ “Maansaanu ngaakanenga, ono sunu mwansandukila akunyonyoola.

⁹ Amuyeeye kwaamba ayi mwakamumba abulongo. Sa mulisuni kumpilushisha kulusuko alimwi?

¹⁰ Sa teshi ndimwe mwakapa bata nkusu ayi banshaale? Sa te ndimwe mwakalengesha ayi nkomene mulifumo lya bama?

¹¹ Mwakamfwalika cikanda anyama, akukumanya shifuwa shangu amishisa.

¹² Mwakampa buumi munkumbu shanu shiinji. Ee, mulusuno lwanu mwakatabilila buumi bwangu,

¹³ kakuli shoonse ishi mwakalinga mwashishisa mumoyo wanu. Ono sunu ndindeshiba ayi wakalinga ngomuyeeyo wanu.

¹⁴ Mwakalinga kunjebelabo kubona na inga ndabiisha kwaamba ayi mutakandekeleli shibiibi shangu.

¹⁵ Kulilabo na ndabiisha, ingayi ndalipengela kuli ndimwe. Ono na ndacita ciluleme muloomunabo, taaku ncemwaambawo. Aboobo ndicite nsoni abuumbi ceebo ca mapensho angu.

¹⁶ Ncakwiila na kuli ncendaswitilila, mulamfwima mbuli nkalamu akumpensha ashintu shiyoosha.

¹⁷ Mulaleta bakamboni banu ciindi coonse mukundwana. Bukali bwanu kuli ndime butooya bufulilakobo. Ciindi coonse muli beshikuyeeyabo bwakumpensha.

¹⁸ “Ceebonshi mwakasuminisha ayi nshalwe? Calinga kwiinda kubota neenga ndakasansulwa.

¹⁹ Ndushinisho kuswabo mulifumo kuya kubulongo, naakwiinga ceendaawo kubota kwiinda kuba abuumi.

²⁰ Sa te bulya buumi bwangu bwaya kumateelo? Amundeeke nsangalaleewo muciindi ici ciniini cicaalite.

²¹ Nsangalaleewo kaantana kuya kutaboolwa, ee, kumusena uko kutaaku mumuni nooceyi.

²² Ncakwiila ngumusena ushiyabo mbi, upyopyongene, taaku mumuni, sombibo munshinshe.”