Jobo 1 - Baibo Busansulushi Bwa Libuku Ili

Satana mbwaakasunka Jobo

¹ Mucishi ca Usi mwakalinga muntu wakalinga kwiitwa ayi Jobo. Musankwa uyu taakalinga kucitewo kampenda nabi komwi alimwi wakalinga kululeme. Wakalinga kulemeka Lesa alimwi wakalinga kushomeka kuli nguwe.

² Wakalinga kucite baana basankwa bosanwe abobilo abaana banakashi botatwe.

³ Jobo wakalinga kufubite mbelele shili 7,000, ngamela shili 3,000, shipani sha ŋombe shili 500, mbongolo shili 500 alimwi abasebenshi baanji. Wakalinga mubile abuumbi pabantu bamwi boonse ba kwicwe.

⁴ Bana bakwe Jobo basankwa bakalinga kubalana kubamba kusekelela mumaandaabo. Bakalinga kwiita abanankashi babo botatwe kwaamba ayi balye akunwaabo.

⁵ Ono kwakalinga nkwishibila kwakwe Jobo kwaamba ayi na kusekelela kwamana, lakwe macuunsacuunsa wakalinga kubengela mwanaakwe womwi awomwi mulambu wakutenta mukumusalasha. Wakalinga kucita boobo mukwiinga wakalinga kuyeeya ayi, “Cimwi ciindi bana bangu bakabisha akushingana Lesa cakuteshiba.”

⁶ Bumwi bushiku baanjelo ndibakesa mukulitondesha pameenso a Mwaami Lesa, alakwe Satana wakesaabo.

⁷ Mpeeke Mwaami Lesa wakeepusha Satana ayi, “Ino waswita kuli?” Satana wakakumbula ayi, “Ndalinga kuya ceendeenda mucishi ca panshi coonse.”

⁸ Mpomunyaawo Mwaami Lesa wakeepusha Satana ayi, “Sa wabonaawo musebenshi wangu Jobo? Ngumuntu utacite kampenda, ululeme, undemeka alimwi ushomeka kuli ndime.”

⁹ Lyalo Satana wakakumbula Mwaami Lesa ayi, “Sa Jobo ulamulemekabo kwakubula mpindu?

¹⁰ Sa te nceebo cakwaamba ayi mulamutabilila pantu pomwi abamuŋanda yakwe alimwi ashintu shakwe shoonse? Shoonse shintu lakwe nshaacita shilaswitilila alimwi matanga a shifubwa shakwe alibo luundu loonse.

¹¹ Amweeleshe kumunyaya nshaacite mulinyumfwile mbweshi amushingane.”

¹² Mpeeke Mwaami Lesa wakaambila Satana ayi, “Ncibotu, buboni bwakwe boonse ndabubika mumaansaako, sombi lakwe mwiine kuteelesha kumukumya.” Mpomunyaawo Satana wakaswaawo pameenso a Mwaami Lesa.

Bana bakwe Jobo mbobakanyonyoolwa pantu pomwi abuboni bwakwe

¹³ Bumwi bushiku bana bakwe Jobo ndibakalinga kusekelela kuŋanda ya munenebantu,

¹⁴ kwakesa shinkombe kuli Jobo akwaamba ayi, “Twalinga kushaba mumuunda abasune, mbongolo kashilya pafwaafwi.

¹⁵ Mpeeke bene Sabeya besa mukushiipa shoonse. Bacaya basebenshi banu boonse akushiyoobo ndime. Ndime ndacicabo akwisa mukumulwiita shacitika.”

¹⁶ Shinkombe uyo kaacaamba aJobo, aumwi wakapola akwaamba ayi, “Kalumba kakwe Lesa katenta mbelele shoonse abeembeshi banu. Ndime ndacicabo akwisa mukumulwiita shacitika.”

¹⁷ Kacaamba uyo, aumwi wakapola akwaamba ayi, “Makoto otatwe a bene Kaludeya esa mukutulwana akubwesa ngamela shanu. Bacaya abasebenshi banu boonse. Ndime ndacicabo akwisa mukumulwiita shacitika.”

¹⁸ Kacaamba uyo, aumwi wakapola akwaamba ayi, “Bana banu balinga kusekelela kuŋanda ya munenebantu.

¹⁹ Mpeeke kwesa cipuupu kuswa kuluyanga. Cawisha ŋanda akubacaya boonse. Ndime ndacicabo akwisa mukumulwiita shacitika.”

²⁰ Mpomunyaawo Jobo wakanyamuka akukwamoona shakufwala shakwe ceebo ca buumba. Mpeeke wakalikulula misusu, waliwaala panshi mukulambila akupaila ayi,

²¹ “Ndakaswa maansabo kuswa mumala muli bama alimwi ndaakuya maansabo ndaakufwa. Mwaami Lesa ngowakampa shoonse ono bulya wanyaya shoonse. Liina lya Mwaami Lesa alilumbaishikwe!”

²² Mumapensho aya oonse, Jobo taakwe kubishaawo kwiinda mukucobola Lesa.