Jemusi 5 - Baibo Busansulushi Bwa Libuku Ili

Kucenjesha kubabile

¹ Amukutike ono nobabile, amulile buumpute amibila ceebo ca mapensho atoosa pali ndimwe.

² Bubile bwanu bwabola, shakufwala shanu shalikwa tubambala.

³ Golodi asilifa yanu yaba andalabwa. Ono ndalabwa isho shilaakupa bukamboni bwakumushinina akunyonyoola mibili yanu anga ngumulilo. Mwalibunjikila bubile munshiku shino shakweelaako.

⁴ Abo batebula mumyuunda yanu tamukwe kubafoleshawo kale. Ono amunyumfwe mbobatootongooka! Kulilishaanya kwa bantu abo, Mwaami Lesa Shinkusu shoonse wakunyumfwa.

⁵ Pacishi ca panshi pano mwekala buumi bwakuliiba akulikondelesha. Mwalya mwaina kulibambila bushiku bwakucaikwa.

⁶ Mwapa mulandu akucaya bantu batacite milandu alimwi tabamupikishi.

Bushimoyonteeka akupaila

⁷ Ono mwebo nobamakwesu, amube beshimoyonteeka kushikila Mwaami wesu akese. Amubone mulimi mbwaakomenya moyo kulindila shishango mumyuunda yakwe ayi shicate. Ulalindila mfula itaanshi ayakweelaako camoyonteeka.

⁸ Mbweeke ubo amwebo amube beshimoyonteeka, muyume ceebo Mwaami wesu Jesu ulibo pafwaafwi kwisa.

⁹ Nobamakwesu, mutanootongookana kwaamba ayi Lesa atakamoomboloshi. Moomboloshi ulibo pafwaafwi kuboneka.

¹⁰ Amuyeeye balaluki bakulukulu abo bakalinga kushimikila muliina lya Mwaami Lesa. Amubone mbobakakomenya myoyo akutolelela kushoma mushiindi shamapensho abo. Amube bweenka mbobakalinga.

¹¹ Tulaamba ayi balicite coolwe ceebo tabakwe kuboola pesule mulushomo. Mwakanyumfwa shakutaboola pesule kwakwe Jobo asheesho Mwaami Lesa nshaakamucitila kumeelelesho ceebo Mwaami uyo ngushinkumbu shiinji abuumbi.

¹² Bunene bunene nobamakwesu, pakushomesha cimwi cintu mutanoolumbila kwiculu nabi cishi ca panshi nabi pacintu cimwi cili coonse. Nkwaambabo ayi, “Ee” na ulyeelete kusumina nabi ayi, “Sobwe” na ulyeelete kukaka, kwaamba ayi Lesa atakamupi mulandu.

Kupaila kwa lushomo

¹³ Na umwi pakati kanu uli mumapensho, aapaile kuli Lesa. Na kuli usangalete aimbe nyimbo shakulumbaisha.

¹⁴ Na umwi waciswa pakati kanu aaite bamatanjilili ba coonde kwaamba ayi bamupailile akumunanika mafuta muliina lya Mwaami Jesu.

¹⁵ Na bapaila calushomo, mulwashi ulaba kabotu. Mwaami wesu inga wamulengesha kuba kabotu alimwi shibiibi shoonse nshaakacita shilalekelelwa.

¹⁶ Anu kamwaambilana shibiibi shanu akupaililana kwaamba ayi Lesa amushilike. Ceebo mupailo wa muntu ululeme ulicite nkusu abuumbi.

¹⁷ Amubone Elija wakalinga muntu bweenka mbuli ndiswe. Wakapaila kuswa kuunshi kwa moyo kwaamba ayi mfula italoki, ncakwiila taikwe kuloka kwamyaaka yotatwe amusa.

¹⁸ Ono wakapaila alimwi, mpeeke yakaloka ashishango shoonse shiswa mubulongo shakamena akucata shisepo.

¹⁹ Nobamakwesu, na umwi pakati kanu waswa mulushinisho, ono mubye umwi wamuboosha,

²⁰ amulabilile kwaamba ayi uyo woonse ukusha mubye munshila shakwe sha shibiibi, ulaakupulusha buumi bwa muntu uyo kuswa mulufu lutamaani akulengesha ayi shibiibi shakwe shiinji shikalekelelwe.