Jemusi 4 - Baibo Busansulushi Bwa Libuku Ili

Kulibombya kuli Lesa

¹ Anu cilengesha kulwana akwaambana pakati kanu nciinshi? Sa te njimiyeeyo yakuyandishisha kulikondelesha iyo ilwana muli ndimwe?

² Mulisuni kuba ashintu shimwi, sombi tamukoonshi kushicana, aboobo mulilibambite kucayana. Mulakumbwa shimwi shintu, sombi tamukoonshi kushicana, aboobo mulalwana akwaambana. Tamushicaani ceebo tamusengi kuli Lesa.

³ Alimwi nabi mwaseenga inga tamushitambuli ceebo miyeeyo njemucitila boobo njibiibi. Mulasenga shintu kwaamba ayi mushisebenseshe mukulikondelesha mwebo nobeene.

⁴ Mwebo nobantu batashomeki! Sa tamwishi kwaamba ayi kupanga bushicibusa abuumi bwa cishi ca panshi nkuba mulwani wakwe Lesa? Ee, uyo woonse usuni buumi bwa cishi cino ulalilengesha kuba mulwani wakwe Lesa.

⁵ Mutayeeyi ayi Malembo akwe Lesa alabeca ndyaamba ayi, “Muuya Lesa ngwaakabika muli ndiswe ulayandishisha shamubili.”

⁶ Sombi Lesa ulatupa luse lwakushikoma. Nceceeco Malembo ncaambila ayi, “Lesa ulakaka bantu balisumpula sombi ulapa luse kubaabo baliceesha.”

⁷ Ono aboobo amulibombye kuli Lesa. Amupikishe Mubiibi, lyalo ulaakumutalamuka.

⁸ Kamusena pafwaafwi aLesa alakwe ulaakusena pafwaafwi amwebo. Amusambe kumaansa mwebo nobamucita shibi! Amusalashe myoyo yanu nobantu baamba nshemutaciti.

⁹ Amuungumane, mulile buumpute amibila, kuseka kwanu mukwaalule kulila akwalo kusangalala kwanu mukwaalule buumba!

¹⁰ Amuliceeshe pameenso a Mwaami Lesa, lakwe ulaakumusumpula.

Kucenjesha shakoomboloshanya

¹¹ Nobamakwesu, mutanoofuyana. Uyo ufuya nabi woombolosha mushominyina, ulacobola akoombolosha Milawo yakwe Lesa. Ono na woombolosha Milawo, ingayi wacileka kwiikonkela, akuba shikuyoombolosha.

¹² Ono Lesa eenkabo ngoshikupa Milawo akoombolosha bantu. Lakwe eenkabo ngweenga wapulusha muntu nabi kumunyonyoola. Ino webo ulayeeya ayi ndiwaani, pakoombolosha muntunyoko?

Kucenjesha shakulumbaisha

¹³ Amunyumfwe mwebo nomwaamba ayi, “Sunu nabi ciilo tulaakuya kundabala inene imwi tukekaleeko mwaaka katusambasha makwebo esu akucana mpindu inene.”

¹⁴ Sombi tamwishi ambweshi bukace ciilo. Mwebo mulibo anga mbwiishi ubo bubonekabo ciindi ciniini akushimingana.

¹⁵ Mwebo mulyeelete kwaamba ayi, “Mwaami Lesa na nkuyanda kwakwe tulaakubukila buumi akucita boobo aboobo.”

¹⁶ Ono mwebo mulalisumpula akulilumbaisha. Kulilumbaisha koonse kwa mushobo uyo nkubisha.

¹⁷ Kulilabo muntu ushi nshaaelete kucita ono kaatashiciiti, ulabisha.