Jemusi 3 - Baibo Busansulushi Bwa Libuku Ili

Shamulaka

¹ Nobamakwesu, baanji pakati kanu batanoolilila kuba bafundishi mukwiinga mulishi kwaamba ayi swebo sotwiisha, Lesa ulaakutoombolosha kwiinda bamwi.

² Ceebo swebo soonse tulabisha mushintu shiinji. Na muntu taalubishi mukwaamba ingayi uliluleme cakumaninina alimwi ulakonsha kulicata mushintu shimwi shoonse.

³ Tulabika nshimbi mukanwa ka liaki kwaamba ayi linootunyumfwila, aboobo tulalilengesha kuya kuli koonse nkotusuni.

⁴ Nabi na twaambe pabwaato bunene. Mubone mbobubete kukomena alimwi bulatolanishikwabo amuuwo upupa cankusu, sombi shikweensha ulabululamika koonse nkwaasuni kwiinda mukantu kaniinibo.

⁵ Mbweeke ubo mbocibete amulaka, awalo nguniini abuumbi, sombi ulalisumpula akwaamba shintu shiinji. Amuyeeye kalilo kaniini mbokatenta luundu lunene.

⁶ Awalo mulaka uli anga ngumulilo. Uli anga ncishi ca bubi pakati ka shipansha shoonse sha mubili. Mulaka uyu ulalengesha mubili woonse abwikaalo bwa muntu kubica. Mulilo wa nguwo ulaswa kuli Satana kumusena wa bafu.

⁷ Muntu ulakonsha kufuba alimwi wakafubawo kale shintu shiyoya sha mishobo yoonse mbuli shinyama, shiyuni, ntaale ashintu shimwi sha mushobo uyu alimwi answi,

⁸ sombi taaku muntu wakafubawo kale mulaka. Ngubiibi tawookeshi alimwi uliswite busungu bucaya.

⁹ Mulaka usebenseshekwa kulumbaisha Lesa, ngowomwi weenka ngotushinganishishaako bantu abo bakalengwa mucikoshanyo cakwe Lesa.

¹⁰ Mumulomo womwi mulaswa maswi akulumbaisha akushinganya. Nobamakwesu, tabwishi mboceelete kuba ubo!

¹¹ Sa maanshi abotu amaanshi aalula inga aswa pakantupu komwi?

¹² Nobamakwesu, sa mukuyu inga wacata maolifi, nabi shisamu sha minyansa kucata nkuyu? Mbweeke ubo akalo kantupu ka maanshi alula takakoonshi kukusha maanshi abotu.

Busongo buswa kwiculu

¹³ Ino ngani musongo ucite lushibo pakati kanu? Aatondeshe kwaamba ayi uli boobo mubwikaalo bwakwe bubotu amumicito iyo iswa mukuliceesha.

¹⁴ Ono na mumyoyo yanu muli munyono uyoosha alimwi akulisuna, mutacoboli lushinisho kwiinda mukulilumbaisha ayi muli basongo.

¹⁵ Ceebo busongo bwa mushobo uyu tabuswi kwiculu. Bulaswa mucishi ca panshi, mbwa buntu alimwi mbwa bushikaswa.

¹⁶ Mukwiinga apo pali munyono akulisuna, pali akutanyumfwana alimwi abubi bwa mushobo uli woonse.

¹⁷ Sombi bantu bacite busongo buswa kwiculu, citaanshi tabacite kampenda alimwi balisuni luumuno, balalicata mukwaamba, balalibombya, mbaankumbu lyoonsebo alimwi balacita shintu shibotu shimwi shoonse. Tabasalululi alimwi tabalyaambi mbobatabete.

¹⁸ Peculu lya waawo mbeshiluumuno abo bali anga batooshanga mbuto muluumuno, balatebula bululami.