Jemusi 2 - Baibo Busansulushi Bwa Libuku Ili

Mbwaakabacenjesha shakusalululana

¹ Nobamakwesu mwebo nomushoma muMwaami wesu Jesu Klistu shibulemu, mutanoosalululana.

² Twaambe bobulya, na muntu umwi wenjila momubungene kaafwete ninga ya golodi ashakufwala shibotu abuumbi, ono alimwi kwesa amuntu mukandu ufwete masempele,

³ na mwalemeka wooyo ufwete kabotu akwaamba ayi, “Amwikale waawa pacuuna cibotu!” Sombi mwaambila mukandu uyo ayi, “Imikana uko nabi ayi kwesa ukale panshi apa.”

⁴ Na mwacita boobo, sa te mulicite mulandu wakusalululana pakati kanu akoombolosha kwiimfwi pamiyeeyo ibiibi?

⁵ Amukutike nobamakwesu basunikwi, Lesa wakasala baboneka ayi mbakandu mucishi ca panshi ayi bakabe babile mulushomo akwinjila muBweene bwakwe Lesa ubo mbwaakashomesha baabo bamusuni.

⁶ Sombi mwebo tamulemeki muntu mukandu. Sa te babile mbobamulyatilila alimwi akunoomutola kunkuta shipusenepusene?

⁷ Sa te abo mbobacobola liina lilemekwa lyakwe Klistu ilyo ndyemwiitwa?

⁸ Na ncakwiila mulakonkela mulawo wa Mwaami Lesa ulembetwe muMalembo akwe ayi, “Suna mubyo bweenka mboolisuni omwiine,” ingayi mulacita kabotu.

⁹ Ono na mulasalulula ingayi mulabisha. Mulawo weenka uyu ulaakumushinina mbuli beshikusotoka Milawo yoonse.

¹⁰ Ceebo uyo woonse usotoka mulawo womwi ulapekwa mulandu wakusotoka yoonse.

¹¹ Mukwiinga Lesa ngowakaamba ayi, “Utaciti bulale” alimwi ngowakaamba ayi, “Utacaayi.” Nkokwaamba ayi webo na wabula kucita bulale ono wacaya muntu, ngumushobo womwi waba shikusotoka Milawo.

¹² Nshemwaamba anshemucita ashibe sheelete bantu bacishi ayi balaakoomboloshekwa amulawo uyo uleta lwaanguluko.

¹³ Ceebo Lesa teshi akanyumfwilewo nkumbu pakoombolosha muntu utanyumfwili nkumbu babye. Sombi abo banyumfwila nkumbu tabeelete kuloonda loombolosho lwakwe Lesa.

Lushomo amilimo

¹⁴ Ino nimpindunshi icite muntu waamba ayi ulicite lushomo, sombi taaciti micito ibotu? Sa lushomo lwa mushobo uyo inga lwamupulusha?

¹⁵ Ono twaambe ayi mushominyineesu umwi, musankwa nabi mwanakashi, taacite shakufwala acakulya,

¹⁶ umwi pakati kanu na wamwaambila ayi, “Lesa akupe coolwe ucane shakulifweka acakulya,” sombi wabula kumupa shiyandika, ino ici inga camucafwanshi?

¹⁷ Mbweeke ubo lushomo lutacite micito lulifwite.

¹⁸ Ono umwi muntu inga waamba ayi, “Webo ulicite lushomo, nebo ndicite micito ibotu.” Nebo palwaangu inga ndamwaambila ayi, “Ntondeshe mbweenga muntu waba alushomobo lutacite micito, nebo ntookutondesha lushomo kwiinda mumicito yangu.”

¹⁹ Mulashoma kwaamba ayi kulibo Lesa womwi. Ncakwiila, sombi abalo bashikaswa balashoma ubo alimwi balaloonda akututuma.

²⁰ Webo omuntu muluya sa ulisuni kwishiba kwaamba ayi lushomo lutacite micito taaku mbolubete?

²¹ Ishiwesu mukulukulu Abulaamu wakalulamikwa pameenso akwe Lesa ceebo ca ceeco ncaakacita cakubenga Isaki mwanaakwe pacipaililo.

²² Sa te waboona ono kwaamba ayi lushomo lwakwe amicito sheendela pantu pomwi? Lushomo lwakwe lwakashika payanda Lesa ceebo ca micito.

²³ Ono cakacitika cancinencine kweelana aMalembo akwe Lesa aamba ayi, “Abulaamu wakashoma Lesa, aboobo kwiinda mulushomo lwakwe, Lesa wakamubona ayi uliluleme akumutambula.” Paceebo nceeco Lesa wakamwaamba ayi ngumubye.

²⁴ Ono waboona ayi muntu ulalulamikwa pameenso akwe Lesa kwiinda mumicito kuteshibo mulushomo lweenka.

²⁵ Mbweeke ubo Laabu mufuule ulya, wakalulamikwa pameenso akwe Lesa ceebo ca micito yakwe ndyaakatambula beshikusensa bene Isilaeli, akubacafwa ayi baloboke mukubeensha nshila imwi.

²⁶ Ono aboobo bweenka mubili utacite muuya mbotwaamba ayi ulifwite, alwalo lushomo na talucite micito lulifwite.