Jemusi 1 - Baibo Busansulushi Bwa Libuku Ili

¹ Ndime Jemusi musebenshi wakwe Lesa aMwaami Jesu Klistu. Ntoolembela ndimwe nomikowa ili likumi ayobilo yakapalanganina mushishi shimwi shoonse. Ndamwaansha.

Lushomo abusongo

² Nobamakwesu, kamusangalala abuumbi na mwashikilwa mapensho apusenepusene,

³ mukwiinga mulishi kwaamba ayi na mwayuminina kushoma ciindi ndimutoosunkwa muleeya kutaboola pesule.

⁴ Kutaboola pesule kwanu kulyeelete kutolelela kushikila mukabule kampenda nakaceyi mulushomo lwanu.

⁵ Sombi na umwi pakati kanu taacite busongo, asenge kuli Lesa uyo upa bantu boonse camaansa obilo akutatongooka, ncakwiila ulaakupekwa.

⁶ Ono ulyeelete kusenga cakutatonsha napaceyi. Ceebo uyo utonsha uli anga ndyaaba palweenge ilyo litolaanishikwabo amuuwo.

⁷ Muntu wa mushobo wooyu teelete kuyeeya ayi ulaakupekwa ncaatosenga kuMwaami Lesa.

⁸ Ceebo ulicite myoyo yobilo alimwi ngushikwaaloka mushintu shoonse nshaacita.

Bukandu abuboni

⁹ Mushomi mukandu ulyeelete kusangalala na Lesa wamusumpula.

¹⁰ Alakwe mushomi mubile ulyeelete kusangalala na Lesa waceesha buboni bwakwe. Mukwiinga mubile ulaakumana bweenka mbuli liluba lya muluundu.

¹¹ Lisuba lilaswa akubala abuumbi, aboobo lilayumya kasamu ka liluba, lyalo liluba lya nkako lilalokaako alimwi bubotu bwa ndilyo bulanyonyooka. Mbweeke ubo mubile ulaakunyonyoolwa kaaciya cicita milimo yakwe.

Kweeleshekwa akusunkwa

¹² Ulicite coolwe uyo utolelela kushoma na weeleshekwa mukwiinga na wakoma masunko, ulaakutambula mushini wa buumi butamaani uyo Lesa ngwaakashomesha baabo bamusuni.

¹³ Muntu na wasunkwa ataambi ayi, “Lesa ngowansunka,” ceebo Lesa taasunkwi abubi alimwi taaku muntu ngwaasunka.

¹⁴ Sombi muntu woonse ulasunkwa na wayungoolwa akucenjeekwa alunkumbwa lwakwe mwiine.

¹⁵ Ono lunkumbwa lwakwe na lwakula lulashala cibiibi alimwi cibiibi ici na cakula cilashala lufu.

¹⁶ Mutanoocenjeekwa nobamakwesu basunikwi!

¹⁷ Shipo shoonse shibotu shitacite kampenda shilaswabo kwiculu kuli Lesa Mulengi wa mimuni yoonse ili mwiculu. NguLesa utapilooki mbuli shimfule shilongalonga.

¹⁸ Mukuyanda kwakwe mwiine wakatupa buumi kwiinda mumaswi a lushinisho, ayi pakati ka shilengwa shakwe shoonse tube anga nshisepo shitaanshi.

Kunyumfwa akucita

¹⁹ Nobamakwesu basunikwi, kamwiibaluka ayi mulyeelete kuba bantu bafwambaana kukutika, bacelwa kwaamba alimwi akukalala.

²⁰ Ceebo bukali bwa muntu tabukoonshi kuleta shiluleme isho nshaasuni Lesa, sobwe.

²¹ Aboobo amushiye shibiibi shoonse nshemushibite abubi ubo buli mumyoyo yanu. Amutambule cakulibombya maswi ayo Lesa ngaakashanga muli ndimwe, ayo akonsha kumupulusha.

²² Mutabi bantu balibeca kwiinda mukunookutikabo maswi ayo, sombi kamucita shaambwa muli ngawo.

²³ Uyo woonse ukutikabo kutacita shaambwa mumaswi ayo, uli anga ngumuntu ulilangilisha kumeenso mucilola.

²⁴ Na wamanabo kulibona akuswaawo, ciindi ceenka ico waluba mbwaaboneka.

²⁵ Milawo yakwe Lesa ililuleme alimwi ilapa lwaanguluko. Uyo woonse wiilangilisha cakuyanda kwiiya akutolelela kucita bweenka ubo alimwi cakutaluba sheesho nshaanyumfwa, sombi kushikonkela, Lesa ulaakumupa coolwe mushintu shoonse nshaacita.

²⁶ Na kuli muntu uyeeya ayi ulapaila Lesa, ono kaalilwa kulicata mukwaamba, ingayi kupaila kwakwe taaku mbokubete alimwi utoolibecabo mwiine.

²⁷ Kupaila kwiine kwiine kutacite kampenda pameenso akwe Lesa Ishiwesu, nkwakulama bana banshiwa abamukalubinje banakashi mumapensho abo. Peculu lya waawo, nkuloonda shibiibi sha mucishi ca panshi ayi inga shamubisha.