Jelemiya 9 - Baibo Busansulushi Bwa Libuku Ili

¹ Mutwi wangu niwalinga mukalo wa maanshi aalo meenso angu kaali kantupu ka minsonshi, naakwiinga ndalila malumwi amashiku. Ncakwiila kulilila bantu bene misheesu abo bakacaikwa.

² Nindakalinga kucite ŋanda yakoonaamo beshikweenda muluyanga, naakwiinga ndakashiya bantu bene misheesu. Naakwiinga ndabashiya ceebo boonse mbafuule alimwi ndikoto lya bantu batashomeki.

³ Balabambabamba milaka yabo anga mbuta kwaamba ayi bakushe bubeshi. Teshi kwaamba lushinisho kubalengesha kukoma mucishi, sobwe. Mwaami Lesa waamba ayi, “Bantu bangu baleelika cibiibi pacibiibi Tabantambuliiwo ayi ndi Lesa wabo, sobwe.

⁴ “Jelemiya, cenjela ababyo, utashomi bamakwanu ceebo mukwanu woonse ngumubeshi amubyo woonse ngushikufuya.

⁵ Womwi awomwi ngushikucenjeeka mubye, taaku awaamba shalushinisho. Bakeeisha milaka yabo kubeca, akumana nkusu shabo shoonse mukubisha.

⁶ Mulishiite pakati ka bubeshi. Mububeshi bwabo balakaka akunshiba, nebo neMwaami Lesa ndaamba.”

⁷ Paceebo ceeco Mwaami Lesa Shinkusu shoonse waamba ayi, “Bona, ndaakubabotesha akubeelesha, mukwiinga taaku cimwi nceenga ndacita pashibiibi sha bantu bangu.

⁸ Milaka yabo ilacayabo anga ngumufwi, ncakwiila ilaambabo shakubeca. Womwi awomwi ulabandika kabotu kumubye, sombi mumoyo utooteya koose kuli nguwe.

⁹ Sa inga nshibapi mulandu pasheeshi? Sa inga nshipilushishi bubi pamushobo uli mbuli wooyu? Nebo neMwaami Lesa ndaamba.”

¹⁰ Ndaakulila buumpute akulila cakooloma kulilila tulundu, akulila cabuumba pamafulo ceebo shililishiitilebo alimwi taaku abeendaninaamo. Kulila kwa ŋombe takunyumfwikiimo. Bayuni abanyama bamuluundu bakacicaamo.

¹¹ Mwaami Lesa waamba ayi, “Ndabala ya Jelusalemu ndaakwiilengesha kuba matongo. Ilaakuba musena mwikala bamwaaba. Ndaakunyonyoola mandabala anene a muJuda cakwaamba ayi kulaakubula aukalaamo.”

¹² Mpeeke nebo ndakumbula ayi, “Anu ngumuntunshi uyo ucite maano akunyumfwisha sheeshi? Ngani wakeeya kuli ndimwe uyo weenga wakonsha kupandulwitako bamwi? Ceebonshi cishi cakanyonyoolwa akulengeshekwa kuba anga nduyanga umo muteendi amuntu?”

¹³ Mwaami Lesa waamba ayi, “Ishi shakacitika ceebo ca kusuula milawo yangu iyo ngondakabapa. Tabakwe kunyumfwila nabi kukonkela milawo yangu.

¹⁴ Sombi balo bakakonkela myoyo yabo iyumu mukulambila Baali kweelana abwakabeeisha bamashali babo bakulukulu.

¹⁵ Paceebo ceeco, nebo neMwaami Lesa, Shinkusu shoonse, Lesa wa bene Isilaeli ndaamba ayi, ‘Amubone, ndaakulengesha bantu aba kulya shakulya shilula akunwa maanshi akola.

¹⁶ Ndaakubapalanganishisha pakati ka mishobo iyo balo nabi bamashali babo bakulukulu njebatakwe kwishibaawo. Ndaakubatandaanya amakoto a bashilumamba kushikila nkabanyonyoole cakumaninina.’ ”

Bene Jelusalemu mbobakalila lucafwo

¹⁷ Mwaami Lesa Shinkusu shoonse waamba ayi, “Ono amuyeeye! Amwiite banakashi beshikulila ayi bese. Amwiite babalya bacibwene kulila.”

¹⁸ Bantu baamba ayi, “Bafwambaane kwisa, bese batulilile kushikila meenso esu asulebo minsonshi, ee, kushikila maanshi akunke kuswa mushikoye shesu.”

¹⁹ Kwanyumfwika mibila muSiyoni ayi, “Twanyonyoolwa! Tulicite nsoni abuumbi. Tulyeelete kushiya cishi cesu ceebo maanda esu akanyonyoolwa.”

²⁰ Mpeeke ndabaambila ayi, “Mwebo nobanakashi, amunyumfwe maswi a Mwaami Lesa. Amunyumfwe maswi ngaatokwaamba. Amwiishe bana banu banakashi kulila cakooloma. Amwiishanye nyimbo shamalila.

²¹ Lufu lwatunjilila pambwelyo akwinjila mumaandeesu acite malinga. Lwamana kucaya banike mumikwakwa abacikula bwangu mumisena icanikamo bantu baanji.”

²² Mwaami Lesa waamba ayi, “Baambile ayi, ‘Mituntu ya bantu ilaakunoolibo anga ngamatombe apantantaala muluundu. Ee, ilaakunoobonekabo anga ngamaila aceswabo kwakutaabunjika kwisule lya shikucesa.’ ”

²³ Mwaami Lesa waamba ayi, “Musongo atalilumbaishi ceebo ca busongo bwakwe. Muntu shinkusu atalilumbaishi ceebo ca nkusu shakwe. Alakwe mubile atalilumbaishi ceebo ca bubile bwakwe.

²⁴ Sombi uyo woonse ulilumbaisha, aalilumbaishishe ceebo cakwaamba ayi wakanyumfwisha shapali ndime alimwi ulinshi. Ncakwiila kunshiba ayi ndime Mwaami Lesa utondesha nkumbu, woombolosha cakutanyengelela alimwi ucita bululami pacishi ca panshi. Ishi nsheshintu moonsangalalila. Nebo neMwaami Lesa ndaamba.”

²⁵ Mwaami Lesa waamba ayi, “Ciindi cilaakushika ndyeshi nkape mulandu abo boonse bakapalulwa, sombi batanambili.

²⁶ Nkokwaamba ayi bene Ijipiti, Juda, Edomu, Amoni, Moabu abaabo boonse bekala muluyanga kulaale. Ndaakucita boobo ceebo mishobo iyi yoonse teenyumfwili ndime. Abalo bene Isilaeli boonse tabashomeki kucipangano cangu.”