Jelemiya 8 - Baibo Busansulushi Bwa Libuku Ili

¹ Mwaami Lesa waamba ayi, “Paciindi ico, mafuwa a bamaami abacinenenene bene Juda, bapailishi, balaluki alimwi aa bantu ba kuJelusalemu alaakukushikwa mushuumbwe shabo.

² Alaakubikwabo patuba akanoobalilwabo lumwi, mweenshi anyenyeenshi shoonse sha mwiculu isho nshebakalinga kusuni, kusebensela, kwiipushako akulambila. Teshi bakaabunjikeewo nabi kwaafukila. Sombi alaakubabo anga ngamatombe apantantaala peculu lya nshi.

³ Lyalo bantu ba mumushobo uyu ubiibi abo beshi bakacaaleewo akunoocishiite mumisena iyo njendakabatandilaamo, balaakusala kufwa kwiinda kunooli boomi. Nebo neMwaami Lesa Shinkusu shoonse ndaamba.”

Kubisha akupekwa mulandu

⁴ Mwaami Lesa wakandwiita kwaambila bantu bakwe ayi, “Na muntu wawa, sa taabuki? Na muntu waswa munshila, sa taapiluki alimwi?

⁵ Ceebonshi mwebo nobantu bangu mulamfutatila? Ceebonshi mwebo nobene Jelusalemu mulamfutatila lyoonse? Mulakakatila kushintu shabubeshi akukaka kupilukila kuli ndime.

⁶ Ndakakutikisha, sombi mwebo tamukwe kwaambawo lushinisho. Taaku usanduka kuswa kububi bwakwe akwiipusha ayi, ‘Nciinshi ncendalubisha?’ Womwi awomwi ulatolelela munshila shakwe anga ndiaki litoocicila nkondo.

⁷ Nkobokobo shilishi ciindi ncesheelete kuboolelamo. Ashalo mpolobe, tumimbya amatongola shilishi ciindi ncesheelete kulonga. Sombi balo bantu bangu tabeshi nsheensuni nebo neMwaami Lesa.

⁸ Ino inga mwaamba buyani ayi, ‘Tuli basongo mukwiinga tulicite milawo ya Mwaami Lesa?’ Nakubi boobo balembi babeshi balemba milawo iyo cakutashomeka.

⁹ Basongo banu balaakulenshekwa nsoni. Balaakulenshekwa buumba akucatwa. Abo bakakaka maswi a Mwaami Lesa, ino mbusongonshi mbobacite?

¹⁰ Paceebo ceeco, bamakaabo ndaakubapa kubasankwa bamwi, ayalo myuunda yabo kubantu bamwi. Kutalikilabo kumuntubo kushika kubalemekwa, boonse beenka basuni kubilila mubwiipi. Balaluki abapailishi boonse abalo mbeshikubeca.

¹¹ Balaanga shilonda sha bantu bangu anga teshi shilonda shinene. Balaamba ayi, ‘Kuli luumuno! Kuli luumuno!’ Kakuli taaku aluumuno.

¹² Sa bakafwa nsoni ceebo ca micito yabo ilensha bunya? Nabi na tabanyumfwiiwo nsoni napaceyi. Tabacite acoomba nkoye nabibo paniini. Paceebo ceeco balaakuwa bweenka mbuli bamwi. Ndaakumana kubapa mulandu, cilaakuba ngomeelelesho abo. Nebo neMwaami Lesa ndaamba.”

¹³ Mwaami Lesa waamba ayi, “Ndaakubanyaya butebushi bwabo. Teshi kukabewo minyansa kushisamu sha minyansa. Kushisamu sha nkuyu teshi kukabewo nkuyu amatewu a nshisho alaakuyuma. Isho nshendakabapa shoonse balaakunyaikwa.”

¹⁴ Bantu bakwe Lesa bakeepusha ayi, “Ino nciinshi ncetushiitile waano? Atubungane pomwi, twamana tucicile kumandabala acite malinga, tuye tufwite nkuko. Atucite boobo ceebo Mwaami Lesa, Lesa wesu watupa mulandu ayi tufwe akutupa maanshi akola ayi tunwe mukwiinga twakamubishisha.

¹⁵ Twakalinga kulangila luumuno, sombi taaku cibotu ncetwakabonawo. Twakalinga kulangila kushilikwa, sombi kwakesa shiloondesha.

¹⁶ Kufoomashika kwa maaki a balwani besu kutoonyumfwika kuDani, acishi coonse catenkaana pakunyumfwa kulila kwa maaki aya. Balwani besa mukunyonyoola cishi ashintu shoonse shiliimo, ndabala inene abantu boonse bekalaamo.”

¹⁷ Mwaami Lesa waamba ayi, “Amucenjele, ntoomutumina nsoka shicaya pakati kanu ee, nsoka isho shitakoonshi kufubwa. Ncakwiila shalo shilaakumulumoola.”

Buumba bwakwe Jelemiya pabantu bene mishaabo

¹⁸ Webo oŋumbulusha, ndi mubuumba, moyo wangu waciswa abuumbi.

¹⁹ Nyumfwa kulila kwa bantu bangu kuswa kucishi cakulaale. “Sa Mwaami Lesa taabete muSiyoni? Sa Mwaami wa njiyo taabete mumo?” Mwaami Lesa, Mwaami wabo wakumbula ayi, “Ceebonshi basonkomona bukali bwangu mukulambila shibumbwabumbwa akufukamina balesa beensu abo batacite ncito?”

²⁰ Bantu baamba ayi, “Kutebula kwamana, cilimo acalo cainda, sombi tatuna kupulushikwa.”

²¹ Ono bene misheesu mbobapwayoolwa, anebo ndapwayoolwa. Ndalila alimwi boowa bwancata.

²² Sa taamu musamu wakushilikisha muGilyadi? Sa taaku shikushilika kulya? Ino ceebonshi shilonda sha bantu bangu tashitooshilikwa?