Jelemiya 7 - Baibo Busansulushi Bwa Libuku Ili

Jelemiya mbwaakashimikila muŋanda yakwe Lesa

¹ Aya ngamaswi Mwaami Lesa Shinkusu shoonse, Lesa wa bene Isilaeli ngwaakatumina Jelemiya. Wakaamba ayi,

² “Koya wiimikane pamwinjililo wa kuŊanda yangu neMwaami Lesa, uye waambe maswi aya: “Amunyumfwe maswi angu neMwaami Lesa mwebo noonse nobene Juda nomwiinda paminjililo iyi kuya mukunambila.

³ Amuleke nshila shanu amicito yanu ibiibi. Lyalo ndaakumuleka ayi mwikale mumusena uno.

⁴ Mutanooshoma mumaswi abubeshi akwaamba ayi shoonse shilibo kabotu akunokwaamba ayi, ‘Ino niŊanda ya Mwaami Lesa, niŊanda ya Mwaami Lesa, niŊanda ya Mwaami Lesa!’

⁵ Amuleke nshila shanu amicito yanu ibiibi. Kamucitilana shintu cakutanyengelela.

⁶ Amucileeke kulita masuku pamitwi ya baswamashi, banabanshiwa alimwi abamukalubinje. Amucileeke kucaya bantu batacite milandu mucishi cino. Amucileeke kulambila balesa bamwi mukwiinga ico inga camulengesha kunyonyooka.

⁷ Na mwacileka shintu ishi, ndaakumuleka ayi munookala mucishi ico ncendakapa bamashali banu bakulukulu ayi cibe cabo kwalyoonse alyoonse.

⁸ “Sombi amubone, mwebo mwacinka manungo mumaswi akubeca atacite ncito.

⁹ Mwebo muleepa, mulacaya bantu, mulacita bulale, mulabeca nabi mwashomesha cakulumbila, mulatentela Baali tununkila kabotu akulambila balesa abo mbomwatakalinga kwishiiwo.

¹⁰ Mwamana kucita shintu ishi shilensha bunya, mulesa mukwiimikana pameenso angu muŊanda yangu ino akwaamba ayi, ‘Swebo tatucite cakulisukama.’

¹¹ Sa Ŋanda yangu ino mwayaalula yaba momwakuyubila beepi? Sombi nebo ndishibwene nshemutoocita! Nebo neMwaami Lesa ndaamba.

¹² “Ono kamuya kuShilo, musena uyo ngondakataanguna kusala ayi noolambililwaako akubona ncendakacita ceebo ca bubi bwa bantu bangu bene Isilaeli.

¹³ Ndimwakalinga kucita shintu shoonse ishi, nakubi kwaamba ayi ndakamwaambilaawo pashintu isho mankanda aanji aanji, tamukwe kukutika. Ndakamwiita, sombi tamukwe kukumbula.

¹⁴ Paceebo ceeco isho nshendakacita kuShilo, bulya ntooshicita kuŊanda yangu ino iyo njemucinkitemo manungo. Nkokwaamba ayi ntooshicita kumusena ngondakapa ndimwe alimwi abamashali banu bakulukulu.

¹⁵ Ndaakumutanda kuswa pameenso angu bweenka mbuli mbondakacita bamakwabanu bene Efuleemu. Nebo neMwaami Lesa ndaamba!”

Kutanyumfwila kwa bantu

¹⁶ Mwaami Lesa waamba ayi, “Aboobo Jelemiya utapaililiiko bantu aba. Utabasengeliiko cakubalililaako. Utabakombeleliiko kuli ndime mukwiinga teshi nkunyumfwileewo.

¹⁷ Sa shintu nshebatoocita mumandabala a mucishi ca Juda amumikwakwa ya ndabala inene ya Jelusalemu tooshibwene?

¹⁸ Baana batootepa nkuni. Bamashali babo batookunka mulilo. Abalo banakashi batookanda fulaulo akupanga shinkwa wa mise wakupa lesa umwi mwanakashi wiitwa ayi Mwaami mwanakashi wa Kwiculu. Batoopa shipo sha shakunwa balesa bamwi kwaamba ayi bankalashe.

¹⁹ Sa batookalasha ndime? Sa tabatooliletelabo mapensho beene alimwi akulilensha nsoni?

²⁰ Paceebo ceeco nebo neMwaami Lesa Shinkusu shoonse ndaakutila bukali bwangu buyoosha paŊanda yangu ino. Ndaakubutilila pabantu, pabanyama pashisamu alimwi apashishango. Bukali bwangu bulaakuba anga ngumulilo uyo muntu ngwaatakoonshi kushimya.

²¹ “Mwaami Lesa Shinkusu shoonse, Lesa wa bene Isilaeli waamba ayi, ‘Amutolelele, musenkanye milambu yanu yakutente amilambu imwi ibengwa, mulye anyama iyo nobeene.

²² Mukwiinga ndyendakakusha bamashali banu bakulukulu muIjipiti, nshikwe kubapabo milawo ya pamilambu yakutenta nabi pamilambu imwi.

²³ Sombi ndakabapa amulawo wakwaamba ayi kabanyumfwila ingaawo nkabe Lesa wabo abalo bakabe bantu bangu. Beende munshila shangu isho nshendakaambila kwaamba ayi shintu shinoobeendela kabotu.

²⁴ Sombi balo tabakwe kunyumfwila nabi kubikako maano. Bakakonkela miyeeyo ibiibi ya myoyo yabo ya bushicimpamya. Bakalinga kuya ciboolabo pesule cakutayawo kunembo, sobwe.

²⁵ Kuswa ciindi bamashali banu bakulukulu ndibakaswa muIjipiti kushikila sunu, bushiku abushiku, mankanda aanji ndakalinga kumutumina basebenshi bangu balaluki.

²⁶ Sombi tamukwe kunyumfwila nabi kubikako maano. Mwakayumya myoyo yanu akubisha kwiinda bamashali banu bakulukulu.’

²⁷ “Ono webo Jelemiya, nabi ubalwiite shoonse ishi, teshi bakakutikeewo. Ulaakubeeta, sombi teshi bakakumbuleewo.

²⁸ Aboobo baambile ayi, ‘Uyu ngomushobo utanyumfwili Mwaami Lesa, Lesa wa nguwo alimwi ukaka kululikwa. Kushomeka kwaloba. Takunyumfwikiiwo nabibo paniini.’

Shintu shibiibi shakacitwa mucinyika ca Inomu

²⁹ “Amucese misusu yanu mwiisoowe. Amwiimbe lwiimbo lwakulila pakalundu katacitewo bwiisu ceebo nebo neMwaami Lesa ndakalala abuumbi akumukaka mwebo nobamulunyungu lwa bantu bangu.”

³⁰ Mwaami Lesa waamba ayi, “Bene Juda bacita shintu shibiibi pameenso angu. Bakabika shibumbwabumbwa shabo shilensha bunya muŊanda yangu akwiibisha.

³¹ Bakayaka shipaililo kuTofeti muCinyika ca Inomu pakunootentela bana babo basankwa abanakashi. Ico ncintu nceentakwe kubaambila nabi kuciyeeyaawo.

³² Aboobo amucenjele, ciindi cilaakushikila bantu ndyeshi bakabule kwiita musena uyu ayi Tofeti nabi ayi Cinyika ca Beni Inomu. Sombi ulaakunokwiitwa ayi Cinyika ca Kucailaamo ceebo balaakunoofukilako bafu kushikila musena woonse ukamaane.

³³ Lyalo mituntu ya bantu aba ilaakuba cakulya ca bayuni abanyama bamuluundu kwakubula amuntu nabi womwi ubakonga.

³⁴ Ndaakumanisha ciyobeyobe cakusangalala akukondwa kwabo aciyobeyobe cakusangalalila bwiinga mumandabala a muJuda amumikwakwa ya muJelusalemu ceebo cishi cilaakubula aukalaamo.”