Jelemiya 6 - Baibo Busansulushi Bwa Libuku Ili

Ndabala ya Jelusalemu mboyakashingulukwa

¹ “Amucice kwaamba ayi mupuluke mwebo nobene Benjameni! Amucice muswe muJelusalemu! Amulishe lupeenga muTekowa! Amushimpike mbembela ya nkondo muBeti Akelemu ceebo mapensho atooswita kumatwa, ee, kunyonyoolwa kunene abuumbi.

² Ndaakunyonyoola Siyoni, ndabala iyo ibotu abuumbi.

³ Bamaami balaakwisa amakoto abo a bashilumamba mukulwana. Balaakuyaka matente abo kushingulusha ndabala. Womwi awomwi ulaakuyaka pamusena mpwaasuni.”

⁴ Balaakwaamba ayi, “Amulibambile kulwana andabala ya Jelusalemu! Amunyamuke tuye tulwane malumwi!” Kuswawaawo balaakwaamba ayi, “Maawe, lisuba lyepila kale, shimfule sha macolesha shatalika kulaampa.

⁵ Aboobo amunyamuke tuye tulwane mashiku akunyonyoola malinga a njiyo!”

⁶ Mwaami Lesa Shinkusu shoonse utokwaamba ayi, “Amuteme shisamu muyake cakutantaawo pakulwana ayi ndabala ya Jelusalemu twiishinguluke. Ndabala iyi ilyeelete kupekwa mulandu ceebo iliswitebo kulyatililana.

⁷ Bweenka mukalo mboopoomona maanshi, mbweeke ubo ndabala iyo mboipoomona bubi bwa njiyo. Shalunkutwe akunyonyooka nsheshinyumfwika lyoonse muli njiyo. Ono malwashi ashilonda sha njiyo ndashibona lyoonsebo.

⁸ Webo Jelusalemu, nyumfwa kucenjeshekwa. Kwabula boobo ntookufutatila akulengesha cishi cako kuba matongo cakwaamba ayi taaku muntu weshi akakonshe kwikalaamo.”

Bene Isilaeli baashu

⁹ Mwaami Lesa Shinkusu shoonse utookwaamba ayi, “Bene Isilaeli abayobololwe cakutashiyaako nabi womwi bweenka buyapwa minyansa mumuunda. Amuboololokeemo bweenka muntu uyapa minyansa mbwaacita.”

¹⁰ Mpomunyaawo ndakakumbula ayi, “Ngani ngweshi ŋambile akucenjesha? Ino ngani weenga wankutika? Matwi abo akashinkwa, aboobo tabakoonshi kunyumfwa. Maswi anu noBaami baLesa alabacima aboobo tabasangalalilimo, sobwe.

¹¹ Sombi nebo ndiswitebo bukali bwanu noBaami baLesa cakwaamba ayi nshikoonshi akuliciba, sobwe.” Lyalo Mwaami Lesa wakaŋambila ayi, “Koya ubupoomwete pabanike bali mumikwakwa apabacikula bwangu babungene pomwi. Musankwa amukaakwe pantu pomwi abacembele bacite myaaka iinji boonse balaakutolwa kubukali ubo.

¹² Maandaabo alaakupekwa kubantu bamwi pantu pomwi amyuunda yabo alimwi abamakaabo. Ico cilaakucitika na nkafungulule lyaansa kuuma babo bekala mucishi.

¹³ Kuswabo kubantu bataaku ambobabete kushika akubaabo balemekwa, boonse balicitebo miyeeyo yabumbilileewo. Balaluki abapailishi abalo ngumushobo womwibo, boonse balacenjeeka bantu.

¹⁴ Balaanga shilonda sha bantu bangu anga teshi shilonda shinene. Balaamba ayi, ‘Kuli luumuno! Kuli luumuno!’ Kakuli taaku aluumuno.

¹⁵ Sa bakafwa nsoni ceebo ca micito yabo ilensha bunya? Nabi na tabanyumfwiiwo nsoni napaceyi? Tabacite acoomba nkoye nabibo paniini. Paceebo ceeco balaakuwa bweenka mbuli bamwi. Ndaakumana kubapa mulandu, cilaakuba ngomeelelesho abo. Nebo neMwaami Lesa ndaamba.”

Bene Isilaeli mbobakakaka nshila yakwe Lesa

¹⁶ Ono Mwaami Lesa waamba ayi, “Amwiimikane pamampambaanwa amikwakwa mulangelange akwiipusha tushila tukulukulu akubete nshila ibotu. Mweende muli njiyo, lyalo mulaakucana luumuno. Sombi mwakakumbula ayi, ‘Sobwe, teshi tukeendeemo.’

¹⁷ “Ndakabika bantu beshikunoomulindilila akumwaambila ayi, ‘Kamunyumfwa kulila kwa lupeenga!’ Sombi mwebo mwakaamba ayi, ‘Teshi tukakutikeewo.’ ”

¹⁸ “Paceebo ceeco nebo neMwaami Lesa ndaamba ayi, ‘Amunyumfwe mwebo nomishobo ya bantu. Amulangilishe mwebo nobakamboni isho sheshi shikacitike kubantu bangu.

¹⁹ Nyumfwa ocishi ca panshi, ntooletela bantu aba mapensho. Ici nceshi cikatumbukwe mumiyeeyo yabo ibiibi ceebo bakakaka kunyumfwa maswi angu alimwi amilawo yangu.’

²⁰ Anu nimpindunshi iliimo mutununkila kabotu pakutenta twa kuSheba nabi tununkila kabotu mubuyani tuswa kucishi cakulaamfu? Milambu yanu yakutenta nshiitambuliiwo, sobwe. Ncakwiila milambu yanu teensangalashiiwo.”

²¹ Paceebo ceeco Mwaami Lesa utookwaamba ayi, “Ndakubika shakulisuntulako kunembo lya bantu aba. Bamashali basankwa abana babo balaakuwa, abalo beshimukobonyinaabo ababyaabo balaakumana kuloba.”

Balwani bakaswa kumatwa

²² Mwaami Lesa waamba ayi, “Amubone likoto lya bashilumamba litooswa kucishi cakumatwa, ee, mushobo uyumu abuumbi wa kweela cishi ca panshi utoosonkomonwa.

²³ Banyamuna mata amasumo, mbantu beshilunkutwe alimwi batacite nkumbu. Batooyoomabo anga ngamaaba apalweenge mbuli mbobatoosa kabatantite pamaaki. Balilibambite kale kwisa mukukulwana webo ondabala ya Jelusalemu.”

²⁴ Bene Jelusalemu baamba ayi, “Twakanyumfwa makani apali mbabo, aboobo maanseesu akatontola. Buumba bwatucata, tutoonyumfwabo anga ngumwanakashi uli pankata.

²⁵ Mutayi kumyuunda nabi kuya bweendeenda mumikwakwa ceebo balwani banu balicite mipeeni cakwaamba ayi koonse kutooloondesha.”

²⁶ Mwaami Lesa waamba ayi, “Mwebo nobantu bangu, amufwale masaka mwaalabangane mumilota. Amulile cakooloma anga ngumuntu utoolila mwanaakwe musankwa womwibo ndondoli ceebo shikunyonyoola utoopola cakufwambaana.

²⁷ “Webo Jelemiya ndaakulengesha kuba shikweelesha bantu bangu bweenka mbweenga weelesha ceela kwaamba ayi ubone akwishiba mbobabete.

²⁸ Boonse mbayumu myoyo, mbaashu alimwi mbafuyishi. Myoyo yabo njiyumubo anga ngubulonse nabi nshimbi. Ncakwiila boonse mbeshi kuya cifuyabo.

²⁹ Mulilo muminyumbi ulanyaka cankusu kwaamba ayi usungulule ceela, sombi ceela ico tacitooboteshekwaawo ceebo bantu babiibi tabatookushikwaamo.

³⁰ Bantu aba baleetwa ayi, ‘Silifa ikakitwe’ ceebo Mwaami Lesa wabakaka.”