Jelemiya 52 - Baibo Busansulushi Bwa Libuku Ili

Ndabala ya Jelusalemu mboyakakomwa

¹ Sedekiya wakaba mwaami wa bene Juda kaacite myaaka makumi obilo amwaaka womwi. Wakalela muJelusalemu myaaka likumi awomwi. Banyina bakalinga mbaAmutalu, mwanaakwe Jelemiya wa kundabala ya Libina.

² Mwaami Sedekiya wakabishisha Mwaami Lesa bweenka bwakacita mwaami Jeoiyakimu.

³ Mwaami Lesa wakakalala abuumbi pabene Jelusalemu apabene Juda cakwaamba ayi wakabakusha pameenso akwe. Ono mwaami Sedekiya wakabukila mwaami wa bene Babiloni.

⁴ Mpomunyaawo mumwaaka wasanu ayone wa bwaami bwakwe Sedekiya, pabushiku bwalikumi mumweenshi walikumi, Nebukadinesa mwaami wa bene Babiloni wakanyamuka abashilumamba bakwe kuya mukulwana abene Jelusalemu. Bakayaka misumba yabo pansengwe lya ndabala iyo akuyaka mukuti wakutantilaawo kushingulusha lubumbu lwa njiyo.

⁵ Ndabala yakalinga kushingulukitwe kushikila mwaaka walikumi awomwi wa bwaami bwakwe Sedekiya.

⁶ Lyalo pabushiku bwasanu ashone, mumweenshi wane wa mwaaka uyo weenka, mundabala iyo nsala yakakomena abuumbi cakwaamba ayi bantu tebakalinga kucitewo cakulya naciceyi.

⁷ Mpeeke bakatulula cilyango mulubumbu lwa ndabala. Nakubi kwaamba ayi bashilumamba bene Babiloni bakalinga kushingulukite ndabala inene iyo, bashilumamba bene Juda boonse bakamana kuloboka ciindi ca mashiku. Bakeenda mumuunda wa bwaami akuya mukuswita kumwinjililo apo pakalinga kukumanina lubumbu. Lyalo bakacica kululama kuCinyika ca Joodani.

⁸ Sombi bashilumamba bene Babiloni bakakonkela mwaami Sedekiya akumweensha kumawesa a Jeliko. Lyalo bashilumamba boonse bakamushiya eenka, mpeeke wakacatwa.

⁹ Mpomunyaawo Sedekiya bakamutola kumwaami Nebukadinesa, uyo wakalinga mundabala inene ya Libula mucishi ca Amati uko nkwaakaya mukupetwa mulandu kuli Nebukadinesa.

¹⁰ Mpeeke bakacaya bana bakwe Sedekiya boonse kaalangilisha. Wakacaya abacinenenene bene Juda.

¹¹ Kuswawaawo Nebukadinesa wakaamba ayi Sedekiya akushikwe meenso. Lyalo bakamwaanga ncetani sha bulonse akumutola kuBabiloni. Sedekiya wakekala muntolongo kuBabiloni kushikila bushiku mbwaakafwa.

Kunyonyoolwa kwa Ŋanda yakwe Lesa

¹² Lyalo pabushiku bwalikumi bwa mweenshi wasanu mumwaaka walikumi amyaaka yosanwe ayone wa bwaami bwakwe Nebukadinesa mwaami wa bene Babiloni, Nebusaladani uyo wakalinga mutanjilili wa beshikulindilila mwaami, wacinenenene wa mwaami wa bene Babiloni, wakenjila muJelusalemu.

¹³ Mpeeke wakatenta Ŋanda yakwe Lesa, ŋanda ya bwaami alimwi amaanda oonse a bacinenenene muJelusalemu.

¹⁴ Bashilumamba boonse bene Babiloni abo bakalinga kutanjililwa amutanjilili wa beshikulindilila mwaami uyo, bakamwayulula lubumbu lwa ndabala inene ya Jelusalemu.

¹⁵ Kuswawaawo Nebusaladani wakatola busha kuBabiloni bantu boonse bakacaala mundabala pantu pomwi abaabo bakalinga kucishi shakupangapanga abantu abo bakalinga baya kulubasu lwa bene Babiloni.

¹⁶ Sombi wakashiyabo bakandu abo batakalinga kucitewo buboni akubapa ncito yakulima mumyuunda ya minyansa amumyuunda imwi.

¹⁷ Mpomunyaawo bene Babiloni bakapwayoola macinko a bulonse, shikoci shakalinga mukati muŊanda yakwe Lesa pantu pomwi acingomo ca bulonse akutola bulonse woonse kuBabiloni.

¹⁸ Bakatola amwakubika milota, mafosholo, shakushimisha malampi, mbale shakubikaamo bulowa bwa milambu, mbale shakutentelaamo tununkila kabotu alimwi ashisebensesho sha bulonse shimwi shoonse sha muŊanda yakwe Lesa.

¹⁹ Mpeeke bakabwesa mbale shiniini, shikaye sha mulilo ambale shiniini shakusebensesha pakusanseela, mipika, shakubikawo malampi, mbale shifongomene sha shipo sha shakunwa, nkokwaamba ayi shoonse shintu shakapangwa agolodi nabi silifa.

²⁰ Ono bulonse kuswa kumacinko obilo, cingomo, bacende ba bulonse bali likumi abobilo abo bakalinga kubikwaawo cingomo ico, ashikoci sha muŊanda yakwe Lesa isho shakapanga Solomoni, shoonse shakalinga shilemu kushipima.

²¹ Licinko lyomwi alyomwi lyakalinga kulaampa mamita ali 8 amamita ali 5.4 kulishinguluka. Lyakalinga kucite bulyango pakati alimwi ceela ca ndilyo cakalinga kucite mutika wakalinga masentimita ali 7.5.

²² Citwi cakalinga palicinko lyomwi alyomwi cakalinga kulaampa mamita ali 2.2 alimwi cakashingulushikwa ancetani amapomegilaneti a bulonse mukucibotesha.

²³ Kwakalinga mapomegilaneti ali 96 kumbasu shoonse. Ono pancetani pakalinga mapomegilaneti ali 100 kwaasenkanya oonse.

Bene Juda mbobakatolwa kuBabiloni

²⁴ Kuswawaawo Nebusaladani, mutanjilili wa beshikulindilila mwaami wakacata busha Selaya mupailishi munene, Sefaniya mupailishi umukonkela kubikaawo abeshikulindilila mwinjililo wa Ŋanda yakwe Lesa botatwe.

²⁵ Pakati ka baabo bakacaala mundabala inene, wakabwesa mutanjilili wa bashilumamba alimwi abeshikupandaako maano mwaami bali bosanwe abobilo. Wakabwesa uyo wakalinga kucafwa mutanjilili wa bashilumamba mukulemba makani a bashilumamba alimwi abacinenenene bakalinga makumi osanwe alikumi lyomwi.

²⁶ Mpomunyaawo, Nebusaladani wakabatola kumwaami wa bene Babiloni uyo wakalinga mundabala ya Libula.

²⁷ Uko kuLibula, mucishi ca Amati, mwaami wakapingula ayi bacaikwe. Anu mboboobo bene Juda mbobakatolwa busha kuswa kucishi cabo.

²⁸ Ngooyu mweelo wa bantu Nebukadinesa mbwaakatola busha. Mumwaaka wasanu ayobilo wa bwaami bwakwe wakatola bene Juda bali 3,023.

²⁹ Mumwaaka walikumi amyaaka yosanwe ayotatwe wa bwaami bwakwe wakatola bali 832 kuswa kuJelusalemu.

³⁰ Mumwaaka wamakumi obilo amyaaka yotatwe wa bwaami bwakwe, Nebusaladani mutanjilili wa beshikulindilila mwaami wakatola busha baJuda bali 745. Boonse pantu pomwi bakalinga 4,600.

³¹ Mumwaaka Efilu Melodaki ndyaakaba mwaami wa bene Babiloni, wakanyumfwila nkumbu Jeoiyakini mwaami wa bene Juda akumwaangulula kuswa muntolongo. Ici cakacitika pabushiku bwa makumi obilo anshiiku shosanwe mumweenshi walikumi amyeenshi yobilo wa mwaaka wamakumi otatwe amyaaka yosanwe ayobilo kuswa ciindi Jeoiyakini ndyaakatolwa busha.

³² Efilu Melodaki wakamulela kabotu akumupa musena wiindaawo bulemu pamisena yakapekwa bamaami bamwi abo bakalinga basha mucishi ca Babiloni.

³³ Mpomunyaawo Jeoiyakini bakamusuminisha kufuula shakufwala shakwe sha bukaili akufwala shakufwala shibotu. Wakasuminishikwa kunoolya amwaami kwabuumi bwakwe boonse.

³⁴ Mpeeke bushiku abushiku mwaami wakalinga kupa Jeoiyakini maali akuula shintu nshaakalinga kuyanda mubuumi bwakwe.