Jelemiya 51 - Baibo Busansulushi Bwa Libuku Ili

Koombolosha pacishi ca Babiloni mbokwakatolelela

¹ Mwaami Lesa waamba ayi, “Amubone, ndaakusonkomona mushimu wakwe shikunyonyoola uyo weshi akalwane cishi ca Babiloni abantu ba ncico.

² Ndaakutuma baswamashi kuBabiloni kuya mukunyonyoola cishi coonse anga ngumuuwo utoopupulusha matombe. Balaakucilwana kumbasu shoonse pabushiku bwa mapensho a ncico.

³ Mutalekeli bashilumamba kusakila mata abo, nabi kubapa ciindi cakufwala shilwanisho shabo. Kutalekelela bacikula bwangu babo mukutabacaya, sombi bashilumamba babo mubanyonyoole cakumaninina.

⁴ Balaakuwa kabayasweetwe mundabala ya Babiloni, ee, balaakufwita mumikwakwa ya njiyo.

⁵ Nebo neMwaami Lesa Shinkusu shoonse nshikwe kusuulaawo bene Isilaeli abene Juda nakubi kwaamba ayi cishi cabo ciliswitebo milandu kunembo lyangu neUsalalite wa bene Isilaeli.

⁶ “Amucice kuswa kuBabiloni! Mucice kufuna buumi bwanu! Mutanyonyooki ceebo ca shibiibi sha bene Babiloni. Cashikila ciindi cakwaamba ayi nebo neMwaami Lesa mbooshe cishole kundabala iyo. Ndaakwiipa mulandu kweelana amicito ya njiyo.

⁷ Babiloni wakalinga anga ninkomeshi ya golodi mumaansaangu akulengesha cishi coonse ca panshi kukolwa. Mishobo ya bantu yoonse yakanwa waini wakwe. Aboobo paciindi cino ilicinkukite.

⁸ Babiloni ulaakuwa cakufwambaana akupwayooka. Amumulilile cakooloma! Amuyandoole musamu wakushilika shicisa shakwe, mpashi mukuba acoolwe inga washilikwa.”

⁹ Baswamashi bakaamba ayi, “Twakeelesha kushilika Babiloni, sombi ciindi cakushilika cakeenda. Atumushiyebo, tuboolele mwesu mwesu ceebo mulandu wakwe ulishikite akwiculu. Ncakwiila ulishikite amumakumbi.”

¹⁰ Bene Isilaeli bakaamba ayi, “Mwaami Lesa watula patuba kululama kwesu, amwise tuye twaambilishe muSiyoni isho Mwaami Lesa, Lesa wesu nshaatucitila.”

¹¹ Mwaami Lesa waamba ayi, “Amunone masumo, mubese amayawo! Nebo neMwaami Lesa ndasonkomona bamaami bene Mediya mukwiinga ndiimfwibo pakunyonyoola Babiloni. Ndaakuboosha cishole ceebo ca Ŋanda yangu.

¹² Amunyamune mbembela, muye mukapwaye lubumbu lwa Babiloni! Amufushefushe bashilumamba. Amubike beshikulindilila akubamba bantu beshikubelamina. Nebo neMwaami Lesa ntooyanda kucita kweelana amboompingite, ee, kweelana amulasho wangu pabene Babiloni.

¹³ Mwebo nomushiite kufwaafwi amilonga iinji nomucite buboni buunji, ono bwamweela, cashikila ciindi canu cakufwa.

¹⁴ Nebo neMwaami Lesa Shinkusu shoonse ndashomesha cakulumbila ayi, ‘Ndushinisho ndaakuleta bashilumamba baanji anga ncisoshi kwisa mukulwana Babiloni. Bashilumamba abo balaakoolobesha ceebo cakukoma.’ ”

Lwiimbo lwakulumbaisha Mwaami Lesa

¹⁵ Mwaami Lesa wakalenga cishi ca panshi kwiinda munkusu shakwe. Wakalenga cishi mubusongo bwakwe akufungulula liculu kwiinda mumaano akwe akunyumfwisha shintu.

¹⁶ Na waluluma, maanshi a mwiculu alayooma. Ulalengesha makumbi kunyamuka kuswa mweela cishi ca panshi. Lyalo ulalengesha kubeka mumfula akuleta muuwo kuswa mumisena yakwe yakusungilamo shintu.

¹⁷ Boonse mbaluya alimwi tabacite lushibo. Beshikufula golodi boonse balicite nsoni ceebo ca shibumbwabumbwa shabo. Balesa babo mbabubeshi alimwi tabayooyi.

¹⁸ Taakuuwo mbobabete, balyeelete kusuulwa. Ciindi cakoomboloshekwa kwabo caakushikila, balaakumana kuloba.

¹⁹ Lesa wa bamulunyungu lwakwe Jakobo taaeleneewo ambabo ceebo lakwe ngowakalenga shintu shoonse. Wakasala bene Isilaeli ayi babe bantu bakwe. Mwaami Lesa Shinkusu shoonse ndyeliina lyakwe.

Nsando ya Mwaami Lesa

²⁰ Mwaami Lesa waamba ayi, “Babiloni uli nsando yangu, ee, uli cakulwanisha cangu. Ndaakusebensesha kupwayooshako mishobo ya bantu akunyonyoola malelo abo.

²¹ Kwiinda muli ndiwe ndapwayoola maaki abeshi kwaatanta, ndapwayoola shikoci abeshi kusheensha.

²² Kwiinda muli ndiwe ndapwayoola basankwa abanakashi, bacembele abanike, bacikula bwangu abalindu.

²³ Kwiinda muli ndiwe ndapwayoola beembeshi ambelele shabo, balimi abasune babo, baleli alimwi abacinenenene babo.”

Mulandu wakapekwa cishi ca Babiloni abantu ba mumo

²⁴ Mwaami Lesa waamba ayi, “Ndaakuboosha cishole kucishi ca Babiloni abantu ba ncico mumeenso anu ceebo cakubisha nkobakacita muJelusalemu.

²⁵ Webo Babiloni uli anga nkalundu kanyonyoola cishi ca panshi coonse, sombi nebo neMwaami Lesa ndi mulwani wako. Ndaakutandabika lyaansa lyangu kukulwana. Ndaakukumwayoola cakukushishabo apanshi peene akukushiya kooli kalundu kashukutite.

²⁶ Taaku libwe nabi lyomwi lyeshi likasebenseshekwe kuyaka likonko, nabi lyeshi likabwesekwe ayi ndyakuyakisha mulwiimbi. Ncakwiila ulaakuba anga nduyanga kwalyoonse alyoonse. Nebo neMwaami Lesa ndaamba.

²⁷ “Amwiimike mbembela mucishi, amulishe lupeenga pakati ka mishobo ya bantu. Amubambe mishobo ayi baye mukulwana Babiloni. Amwiite bulelo bwakwe Alalati, Mini abwakwe Ashikenasi kwaamba ayi balwane cishi ici. Amusale mutanjilili wa bashilumamba akuleta maaki aanji mbuli cisoshi.

²⁸ Amubambe mishobo ayi baye mukulwana Babiloni. Amwiite bamaami bene Mediya bamatanjilili abacinenenene babo pantu pomwi amakoto a bashilumamba a mushishi nshebeendelesha.

²⁹ Cishi catenkaana akututuma ceebo nebo neMwaami Lesa ntoocita kweelana amuyeeyo wangu pacishi ca Babiloni. Ndaakucinyonyoola akucisandula kuba luyanga cakwaamba ayi kulaakubula amuntu weshi akekaleemo.

³⁰ Bashilumamba ba kuBabiloni bacileka kulwana, balishiitebo mushiyubilo shabo. Nkusu shabo shamana. Bababo mbuli banakashi. Maanda a mundabala iyo apya ampingilo sha kuminjililo ya njiyo, shamana kutyoloolwa.

³¹ Beshikutumwa balikonkenebo, ee, beshinkombe balitungenebo kalongo kuya mukulwiita mwaami wa bene Babiloni ayi ndabala yakwe yakomwa kuswa kweela kuya mukushika ankoyeela.

³² Shito shoonse shashinkilwa. Shitolo shoonse shatentwa. Bashilumamba boonse batutuma kuboowa.

³³ Babiloni waba anga ndubansa lwakulupwitaawo ciindi ndyelulyatoolwa pakulupula shili anga ngamaila. Ndushinisho ciindi cakwe cakumutebula cilaakushikila cakufwambaana. Nebo neMwaami Lesa Shinkusu shoonse, Lesa wa bene Isilaeli ndaamba.”

³⁴ Bene Jelusalemu baamba ayi, “Nebukadinesa mwaami wa bene Babiloni wakatumana. Watulengesha kufulungana akutusandula kuba nongo itacite cintu. Watuminabo anga ninsato akususha lifumo lyakwe ashoonse nshaakalinga kusuni. Lyalo wakashipulula mbwaatakalinga kusuni.”

³⁵ Bantu bekala kuSiyoni baamba ayi, “Bene Babiloni abapekwe mulandu palunkutwe ndobakacita pali ndiswe.” Bene Jelusalemu baamba ayi, “Bulowa bwesu abutikile pabaabo bekala muBabiloni.”

Mwaami Lesa ulaakucafwa bene Isilaeli

³⁶ Paceebo ceeco, Mwaami Lesa waamba ayi, “Amubone, ndaakumwiimikanina mucikani canu akuboosha cishole kuli baabo batoomupensha. Ndaakuyumya maanshi a bene Babiloni akulengesha milonga yabo kuyuminina.

³⁷ Cishi ca Babiloni cilaakuba matongo umo mweshi mukanookalabo bamwaaba. Cilaakuba cintu ceelete kuloondwa akusekwa. Taaku muntu nabi womwi weshi akekaleemo.

³⁸ Bene Babiloni boonse balabuluma anga ninkalamu akulila anga mbana ba nkalamu.

³⁹ Ono kabacinyumfwite nsala, ndaakubabambila kusekelela akubalengesha kukolwa cakwaamba ayi bakanoosekabo micelo. Kuswawaawo balaakoona cakutabukawo tubili.

⁴⁰ Ndaakubaleta kwisa mukucaikwa mbuli mbelele, ee, kucaikwa mbuli mbelele shisankwa nabi mpongo. Nebo neMwaami Lesa ndaamba.”

Sheshi shikacitike kucishi ca Babiloni

⁴¹ Mwaami Lesa waamba ayi, “Cishi ca Babiloni cilaakukomwa, cishi ico cakalinga kulumbaishikwa mucishi coonse ca panshi, cilaakubwesekwa! Babiloni ulaakuba cintu ciloondwa abuumbi pakati ka mishobo yoonse!

⁴² Lweenge lulaakupisha Babiloni akumufwekelesha kumaaba a ndulo awoota.

⁴³ Mandabala a mumo alaakuba matongo. Ncakwiila cishi ico cilaakuba matongo, cishi ciyumu nta akuba luyanga. Taaku muntu weshi akanookalaamo alimwi teshi mukanokwiinda muntu nabi womwi.

⁴⁴ Ndaakupa mulandu Belo, lesa wa bene Babiloni akumulengesha kushipulula nshaakamina. Mishobo ya bantu teshi ikawuumukileko tubili. “Lubumbu lwa cishi ca Babiloni lulaakuwa.

⁴⁵ Amuswe muli nguwe nobantu bangu! Amupulushe buumi bwanu! Amucice kuswa kubukali bwangu buyoosha nebo neMwaami Lesa.

⁴⁶ Mutakatutumi nabi kuloonda mwaakunyumfwa mikutukutu iyo njeshi mukanyumfwe. Mwaaka amwaaka kulanyumfwika mikutukutu, inga yaba yakulwana mucishi canu nabi mwaami kubukila mwaaminyina.

⁴⁷ Ndushinisho ciindi cilaakushikila ndyeshi nkape mulandu shibumbwabumbwa sha kuBabiloni. Cishi coonse cilaakulisenda aboonse beshi bakacaikwe, balaakukungubala mukati muli ncico.

⁴⁸ Mpeeke liculu acishi ca panshi alimwi ashoonse isho shiliimo shilaakoolobesha cakusangalala ceebo cakukomwa kwa cishi ca Babiloni, kukomwa kubantu abo beshi bakaswe kumatwa mukucinyonyoola.

⁴⁹ Cishi ca Babiloni cakacaisha bantu baanji mucishi coonse. Ono cishi ca Babiloni cilaakuwa ceebo cakucaisha bene Isilaeli baanji. Nebo neMwaami Lesa ndaamba.”

Mwaami Lesa mbwaakatuma nkombe kubene Isilaeli bakalinga muBabiloni

⁵⁰ Mwaami Lesa wakatuma nkombe kubantu bakwe muBabiloni yakwaamba ayi, “Mwebo nomwapuluka munkondo, amunyamuke, mutashingooki! Nabi muli mucishi cakulaale kamuyeeya ndime neMwaami Lesa alimwi kamuyeeya andabala ya Jelusalemu.

⁵¹ Mulaamba ayi, ‘Swebo tulicite nsoni ceebo twacobolwa. Aboobo tulilisendete cibiibi mukwiinga baswamashi bakenjila mumisena isalalite ya muŊanda yangu nebo neMwaami Lesa.’

⁵² “Sombi ciindi cilaakushikila ndyeshi nkape mulandu shibumbwabumbwa sha bene Babiloni. Lyalo beshibakacisikwe balaakutongela mucishi coonse ca Babiloni.

⁵³ Nabi Babiloni akatante kwiculu akuyaka ciyubilo ciyumu uko, ndaakutuma beshikunyonyoola kuya mukumulwana. Nebo neMwaami Lesa ndaamba.”

Kunyonyoolwa kwa cishi ca Babiloni kumwi

⁵⁴ Mwaami Lesa waamba ayi, “Amunyumfwe mibila itooswa kuBabiloni, nkulila kwakunyonyooka kunene kwesa mucishi ca bene Babiloni.

⁵⁵ Nebo ndaakunyonyoola Babiloni akumanisha ciyobeyobe cakusangalala kwakwe. Balwani bakwe balaakuyooma anga ngamaanshi aanji, ncakwiila kubuluma kwa maswi abo kulaakunyumfwika kuyooma.

⁵⁶ Shikunyonyoola ulaakulwana Babiloni. Bashilumamba bene Babiloni balaakucatwa amata abo alaakutyoloolwa. Ceebo nebo neMwaami Lesa ndi Lesa uboosha cishole. Ncakwiila ndaakuboosha cishole kweelana ambobakacita.

⁵⁷ Ndaakulengesha bacinenenene abasongo bakwe kukolwa. Ndaakulengesha abeendeleshi, bamatanjilili ba bashilumamba abashilumamba babo kukolwa. Kuswawaawo balaakoona cakutabukaawo. Nebo neMwaami ndaamba. Nebo ndime Mwaami Lesa Shinkusu shoonse.

⁵⁸ Lubumbu luyumu lwa ndabala ya Babiloni lulaakuwishikwa. Ayalo minjililo ya njiyo ilaamfu ilaakutentwa. Bantu batoolipenshabo kwakubula mpindu. Milimo yabo yoonse ilaakubabo mafuta akunyashisha mulilo. Nebo neMwaami Lesa Shinkusu shoonse ndaamba.”

Nkombe yakwe Jelemiya kubene Babiloni

⁵⁹ Iyi ninkombe nebo neJelemiya njendakaambila Selaya mutanjilili wa bashilumamba, mwanaakwe Neliya, mwishikulu wakwe Maseiya, ndyaakaya kuBabiloni aSedekiya mwaami wa bene Juda mumwaaka wane wa bwaami bwakwe.

⁶⁰ Mapensho oonse ayo eshi akacitike muBabiloni ndakaalemba mulibuku. Nkokwaamba ayi ndakalemba shoonse shakalinga kwaambwa pacishi ca Babiloni.

⁶¹ Ndakaambila Selaya ayi, “Waakushika kuBabiloni, ukabelenge maswi aya oonse cakoolobesha.

⁶² Kuswawaawo ukapaile ayi, ‘NoBaami baLesa, mwakaamba ayi mulaakunyonyoola musena uno akuulengesha ayi kubule muntu nabi munyama wikalaamo tubili. Sombi ayi ulaakuba matongo kwalyoonse alyoonse.’

⁶³ Ono waakumanisha kubelenga libuku ili, ukaangilileko libwe akulisowa muMulonga wa Yufuletisi.

⁶⁴ Mpomunyaawo ukaambe ayi, ‘Bweenka bulya aBabiloni mbweshi akepile cakutafumpulukawo tubili ceebo ca mapensho ayo ngweshi nkamuletele. Ncakwiila bantu bakwe boonse balaakufwa.’ ” Makani akwe Jelemiya mpwaaela peenka apa.